Astanalyq poliseiler alaiaqtyq jasaǧan 28 jastaǧy elorda tūrǧynyn anyqtady. Ol kurerdı jalǧan chekpen jıberıp, düken satuşysyn aldaǧan. Düken satuşysy polisiiaǧa jügınıp, belgısız adam aiaq kiım satyp alamyn dep aldap, 18 myŋ teŋge somasynda aqşa qarajatyn iemdengenı turaly aryzdanǧan.
Qaskünem dükennıŋ saitynda özıne krossovki taŋdap, satuşymen bailanysyp, chektegı mälımetterdı aldyn ala bılıp alǧan. Tölem jasalǧany turaly chektı qoldan jasaǧannan keiın kurerdıŋ qyzmetıne jügınıp, oǧan jalǧan chek jıbergen. Kurer öz kezegınde ony satuşyǧa körsetken. Eşteŋeden küdıktenbegen satuşy oǧan tauardy bere salǧan.
Jedel-ızdestıru ıs-şaralaryn ötkızu barysynda Astana qalasy Saryarqa audany Polisiia basqarmasynyŋ kriminaldyq polisiia qyzmetkerlerı alaiaqty anyqtady. Onyŋ osyǧan ūqsas 4 alaiaqtyq faktıge qatysy bary belgılı boldy. Er adam qylmysyn moiyndady. Qazır onyŋ elorda aumaǧynda jasalǧan basqa da osyǧan ūqsas qylmystarǧa qatysy bar-joǧy tekserılude.
Atalǧan faktıge qatysty QR QK 190-baby (alaiaqtyq) boiynşa sotqa deiıngı tergeu amaldary jürgızılude. Astana qalasynyŋ Polisiia departamentı azamattarǧa saq boludy, beitanys adamdarǧa senbeudı eskertedı
