Elımızdegı aqyly joldardyŋ tarifı köterıledı. Būl turaly bügın Senat otyrysynda Kölık ministrı Marat Qarabaev aitty, dep habarlaidy astana-akshamy.kz.
«İä, biyl negızgı tranzittık dälızder aiaqtalady. Onyŋ ūzyndyǧy – 2 091 şaqyrym. Sondyqtan da eŋ bırınşıden, taǧy 1 800 şaqyrym jaŋa uchaskede aqy alu jüiesı engızıledı. Ekınşı – tariftı arttyru jaǧyna qarai qarau. İä, sözsız qarastyratyn bolamyz. Nelıkten ekenın tüsındıreiın. Sebebı, 2013 jyldan berı tarif 11 jyl boiy özgergen joq. Ötken jyly 20 paiyzǧa qymbattady. Bızdıŋ tariftı körşı elmen salystyrsaŋyzdar, Qazaqstanda – 1 teŋge 20 tiyn bolsa, Reseide – 7 teŋge. Sızder salyq töleuşılerdıŋ emes, «QazAvtoJoldyŋ» biudjetı esebınen bolǧanyn qalaisyzdar ǧoi. Onda bır ǧana joly bar, ol – aqyly joldar tarifın köteru», – dedı ministr Senattyŋ jalpy otyrysynan keiın BAQ ökılderınıŋ saualyna orai.
Degenmen, ol aqyly joldar tarifı kürt qymbattamaityndyǧyn basa aitty.
«Sızderge şegınıŋ bırden eselenbeitındıgın aittym ǧoi. Jekelegen adamdar 2-3 ese kötereiık deidı. Men bırden 2-3 ese bolmaityndyǧyn aittym. Degenmen, paiyzben bolady. Mamandarymyz joldy kütıp ūstau, qosymşa 1 100 tehnika satyp alu üşın qanşa qarajat kerektıgın esepteidı. Ärine, mūnyŋ bärın bırden aqy aluǧa qospaimyz», – dedı ol.
Sonymen qatar ministr aqyly joldar tarifı qaşannan bastap köterıluı mümkın ekendıgın aitty.
«Būl mäsele zaŋǧa säikes 14 kün talqylauǧa şyǧarylatyn NQA portalyna ornalastyrylady. Qoǧammen talqylaimyz. Talqylaudy nauryzda bastaudy josparlap otyrmyz», – dedı Marat Qarabaev.
foto: https://kz.qaj.kz/tollroads/
