Elordada mügedektıgı bar adamdardyŋ eŋbek qūqyqtaryn qamtamasyz etu mäselelerı talqylandy

Elordada «Qazaqstandaǧy mügedektıgı bar adamdardyŋ eŋbek qūqyqtary men mümkındıkterı» taqyrybynda dialog alaŋy öttı. QR Eŋbek jäne halyqty äleumettık qorǧau ministrlıgınıŋ (būdan ärı – Eŋbekminı), QR Oqu-aǧartu ministrlıgınıŋ, ÜEŪ jäne biznestıŋ ökılderı erekşe qajettılıkterı bar adamdardy jūmysqa ornalastyru jäne inkliuzivtı saiasatty damytu mäselelerın talqylady, dep habarlaidy astana-akshamy.kz. 

QR Eŋbek jäne halyqty äleumettık qorǧau vise-ministrı Oljas Anafin özınıŋ alǧy sözınde Qazaqstan inkliuzivtı qoǧam qūruǧa ūmtylatynyn, onda ärbır adam, dene mümkındıkterıne qaramastan, teŋ qūqyqtar men eŋbekke qol jetkıze alatynyn atap öttı.

«Mügedektıgı bar adamdar jūmysqa ornalasu jäne özın-özı jüzege asyru jolynda bırqatar kedergılerge jiı tap bolady. Būl fizikalyq kedergıler ǧana emes, sonymen qatar stereotipter, alalauşylyq jäne aqparattyŋ jetıspeuşılıgı boluy mümkın. Bızdıŋ mındetımız – ärbır azamat qoǧamnyŋ damuyna öz ülesın qosyp, öz äleuetın ıske asyra alatyn jaǧdailar jasau.

Elımızde jaǧdaidy jaqsartu üşın maŋyzdy qadamdar qabyldanuda: jūmyspen qamtudy qoldau baǧdarlamalary äzırlenude jäne engızılude, arnaiy jūmys oryndary qūryluda, zaŋnamalyq baza jaqsaruda. Osy baǧyttaǧy negızgı jobalardyŋ bırı mügedektıgı bar adamdardyŋ qoǧamdyq jäne eŋbek ömırıne tolyqqandy qatysuy üşın jaǧdai jasauǧa baǧyttalǧan İnkliuzivtı saiasat tūjyrymdamasyn äzırleu bolyp tabylady», – dedı ol.

Öz kezegınde Eŋbekminı Jūmyspen qamtu departamentınıŋ direktory Asqar Niiazov Qazaqstanda mügedektıgı bar adamdardy jūmyspen qamtu boiynşa qabyldanyp jatqan şaralar turaly baiandady.

«Elımızde 725 myŋ mügedektıgı bar adamnyŋ ışınen eŋbekke qabılettı jastaǧy azamattar sany 385,8 myŋ adamdy (53,6%) qūraidy. Al jūmys ıstep jatqan mügedektıgı bar adamdardyŋ sany 138,8 myŋ adamdy, iaǧni eŋbekke qabılettı mügedektıgı bar azamattardyŋ 36%-yn qūraidy.

Mügedektıgı bar adamdardy jūmyspen qamtudyŋ qajettı şarasy retınde äkımdıkter ştat sany 50 adamnan asatyn käsıporyndardaǧy jūmys oryndaryna 2-den 4% – ǧa deiıngı kvotany bekıtu jönınde şaralar qabyldaidy. Kvotany oryndamaǧany üşın zaŋnamada aiyppūldar qarastyrylǧan.

Būdan basqa jūmyspen qamtuǧa järdemdesudıŋ belsendı şaralaryna közdelgen qarajattyŋ 3,7%-y nemese 3,5 mlrd teŋge mügedektıgı bar adamdardy jūmysqa ornalastyrudy qamtamasyz etuge jūmsalady», – dedı Asqar Niiazov.

Jalpy, azamattardy jūmyspen qamtu jönındegı şaralar ūlttyq jobalardy ıske asyru aiasynda, bos jūmys oryndaryna, Memleket basşysynyŋ «Ärbır 10 myŋ tūrǧynǧa 100 jūmys orny» bastamasy şeŋberınde, memleket subsidiialaityn jūmys oryndaryna, sondai-aq memlekettık granttar beru jolymen jürgızıledı. Ötken jyldyŋ qorytyndysy boiynşa 28,2 myŋ mügedektıgı bar azamat jūmysqa ornalastyryldy.

«Jūmysqa ornalasuǧa järdemdesu üşın jergılıktı jūmyspen qamtu organdaryna baryp ta, enbek.kz nemese eGov onlain portaly arqyly üiden şyqpai da jügınuge bolady. Biznes-prosess öte qarapaiym: mansaptyq ortalyqtar jūmys ızdeuşılerge bır jūmys künı ışınde joldama beredı, odan ärı äŋgımelesu jūmys beruşı men jūmys ızdeuşınıŋ qatysuymen ötedı, oŋ şeşım qabyldanǧan jaǧdaida tiıstı şart jasalady», – dep tolyqtyrdy Asqar Niiazov.

Is-şara barysynda erekşe qajettılıkterı bar adamdardy jūmysqa ornalastyru täjıribesı jäne inkliuzivtı saiasatty damytu boiynşa ūsynystar qaraldy.