Bügın Mäjılıstıŋ jalpy otyrysynda «Qazaqstan Respublikasynyŋ keibır zaŋnamalyq aktılerıne erekşe qorǧalatyn tabiǧi aumaqtardy paidalanǧany üşın tölem alu tärtıbın jetıldıru mäselelerı boiynşa özgerıster men tolyqtyru engızu turaly» zaŋynyŋ jobasy bırınşı oqylymda maqūldandy, dep habarlaidy astana-akshamy.kz.
Būl qūjat Parlament deputattarynyŋ bastamasymen äzırlendı jäne ol jalpy erekşe qorǧalatyn tabiǧi aumaqtardy paidalanu salasyndaǧy zaŋnamany odan ärı jetıldıruge baǧyttalǧan.
«Respublikalyq jäne jergılıktı maŋyzy bar erekşe qorǧalatyn tabiǧi aumaqtardy paidalanǧany üşın tölemaqyny alyp tastau bölıgınde Salyq kodeksıne, Biudjet kodeksıne özgerıster men tolyqtyrular engızu ūsynyldy. Qoldanystaǧy zaŋnamalarǧa säikes, erekşe qorǧalatyn tabiǧi aumaqtarǧa barǧan kezde azamattar biudjetke tüsetın erekşe qorǧalatyn tabiǧi aumaqtardy paidalanǧany üşın salyq jäne tabiǧat qorǧau mekemelerı ūsynatyn qyzmetter üşın alymdardy töleidı. Qyzmet üşın alymdar mekemelerdıŋ arnaiy esep-şotyna tüsedı. Qazır erekşe qorǧalatyn tabiǧi aumaqtarda ornalasqan turistık nysandardyŋ qyzmetkerlerı sanalatyn azamattar baqylau-ötkızu punktınen ötken kezde, är kün saiyn erekşe qorǧalatyn tabiǧi aumaqtardy paidalanǧany üşın salyq töleuge mäjbür. Köp jaǧdaida būl azamattar jalaqysy tömen mausymdyq jūmystardy atqarady. Būl jaǧdaiǧa azamattardyŋ tarapynan belgılı bır narazylyqtar bar», — dedı Mäjılıs deputaty Edıl Jaŋbyrşin.
Onyŋ aituynşa, mäselenı odan ärı şielenıstırmes üşın, sonymen qatar otandyq turistık biznestı odan ärı damytuǧa yŋǧaily jaǧdai jasau baǧytynda erekşe qorǧalatyn tabiǧi aumaqtardy paidalanǧany üşın salyqty alyp tastau ūsynyldy.
«Älemdegı osyndai nysandardaǧy täjıribenı qarasaq, köbıne turisterden salyq emes, arnaiy rekreasiialyq alym alynady. Mysaly, AQŞ-ta ūlttyq parkterge kırgenı üşın jaiau adamnan, motosiklden jäne kölıkten tek belgılengen mölşerde alym alynady. Al Reseidegı „Ugra“, „Valdai“ ūlttyq parkterınde vizit-ortalyqtarǧa nemese aqparattyq bölımşelerge kelgen keluşılerden alym alynbaidy, tek qonaq üi, ekskursiialar men jabdyqtardy jalǧa alu qyzmetterı üşın tölem alynady. Salyq tölemın alyp tastau erekşe qorǧalatyn tabiǧi aumaqtarǧa keluşılerdı köptep tartuǧa, ekoturizmnıŋ damuyna jäne azamattarymyzdyŋ ekologiialyq sauattylyǧynyŋ artuyna yqpal etedı. Sonymen qatar būl özgerıs tabiǧi aumaqtarda ǧylymi-zertteulerdı jürgızuge de mümkındıkterdı keŋeitedı, al ol öz kezegınde bioaluantürlılık pen ekojüienı saqtau üşın maŋyzdy. Erekşe qorǧalatyn tabiǧi aumaqtardy paidalanǧany üşın salyqty alyp tastaǧanmen, būl aimaqtarda turisterge körsetıletın qyzmetter üşın alynatyn tölemderdıŋ saqtalyp qalatynyn atap ötkım keledı», — dedı deputat.
