Astanada «Erıktı bolu oŋai» ūranymen qysqy aptalyq aiasynda volonterler jalǧyzbasty zeinetkerdıŋ üi şaruasyna kömektestı.
Qart adamdarǧa qamqorlyq jasau, ūrpaqtar sabaqtastyǧyn qalyptastyru jäne jastarǧa patriottyq tärbie beru maqsatynda «Astana jastary» jastar resursy ortalyǧy qūramyndaǧy erıktıler jalǧyz tūratyn qart kısılerdıŋ aulasynyŋ qaryn küreudı, üi şaruasyna qolǧabys bıldırudı dästürge ainaldyryp keledı.
– Halyqaralyq erıktıler künın merekeleu aiasynda, sondai-aq 4-11 jeltoqsan aralyǧynda «Erıktı bolu oŋai» qysqy aptalyǧy negızınde bırqatar ıs-şaralar josparlandy. Bız jalǧyzbasty zeinetkerlerge, tyl ardagerlerıne, mümkındıgı şekteulı jandarǧa kömektesemız. Azyq-tülık sebetterın jetkızıp, aulasyn, üi ışın tazartuǧa volonterler jūmyldyrylady. Mūndai aksiialardy olar şyn nietımen jasap, qalap tūrady, – dedı «Astana jastary» jastar resurstyq ortalyǧynyŋ volonterlık qozǧalysty damytu bölımınıŋ basşysy Elvira Esmūhanova.
Kezektı aksiia barysynda volonterler Köktal tūrǧyn alabynyŋ tūrǧyny Raida Miftahova bardy. Jastar 82 jastaǧy zeinetkerge üi şaruasyna kömektesıp, gülderdı suaryp, azyq-tülık sebetın jetkızdı. Al zeinetkerler bolsa kömek qolyn sozǧan erıktı jastarǧa alǧysyn bıldırdı.
«Jylda volonterler bızdı eskerıp, ülken kömek körsetedı. Üi maŋyn qar basyp qalǧanda, şyǧuǧa mümkındıgımız jete bermeidı. Mūndaida volonter jastar barlyq qardy tazartyp, baryn salyp kömektesuge tyrysady. Olar menıŋ balalarym desem de artyq emes. Jastarymyzdyŋ meiırımge, adamgerşılıkke toly janaşyr ısterdı jasauǧa ūmtyluy quantady. Bızge, zeinetkerlerge qamqorlyq jasap jatqandary üşın alǧysymyz şeksız» dedı qala tūrǧyny Raida Miftahova.
