Erkeǧali Rahmadiev atyndaǧy Memlekettık akademiialyq filarmoniianyŋ konsert zalynda «Esıŋe menı alǧaisyŋ» atty Mūqaǧali Maqataevtyŋ şyǧarmaşylyǧyna arnalǧan än-jyr keşı öttı.
Konsert şymyldyǧy äigılı kompozitor Tūrsynǧazy Rahimovtyŋ Mūqaǧali Maqataevtyŋ sözıne jazylǧan «Qazaǧym-ai» änımen «Qazaqstan dauysy» megajobasynyŋ jeŋımpazy Mūratbek Hairolda aşyp berdı. Ärı qarai aqynnyŋ basqa da sözıne jazylǧan änderı oryndalyp, keştıŋ körkın qyzdyrdy.
Al keş qonaqtary QR eŋbek sıŋırgen ärtısı, «Parasat», «Qūrmet» ordenderınıŋ iegerı Maira İliasova, QR eŋbek sıŋırgen qairatkerlerı Sveta Aitbaeva, Arailym Rahym, Mädeniet salasynyŋ üzdıgı Altynşaş Mūqataeva, Halyqaralyq jäne Respublikalyq baiqaulardyŋ laureattary Zarina Omarova, Äkımhan Mäjenov, Aidyn Jūmabai, Qymbat Jambylbek, Parasat Otan qatarly änşıler körermennıŋ aiyryqşa yqylasyna bölense, «Alem» zamanaui bi baletı men «Ainalaiyn» balalar hory asa joǧary deŋgeide öner körsettı. Al qatysuşylar qazaq aqyndarynyŋ paiǧambaryna ainalǧan Mūqaǧalidai aqynnyŋ artyna qaldyrǧan mūrasynyŋ igılıgın bolaşaq ūrpaqtar da köre beretınıne senım bıldırıp, talant iesınıŋ tau tūlǧasy eşqaşan alasarmaitynyn aitty.
– Az ǧūmyrynda jazǧan 1834 öleŋımen milliondaǧan jürektı jaulap alyp, bırde jylatqan, bırde quantqan Mūqaǧali älı künge deiın halyqpen bırge jasap keledı. Nebärı 45 jyl ǧūmyr keşken aqynnyŋ 100-ge juyq öleŋıne än jazylǧan eken. Ol – şyn mänınde qazaq poeziiasyna jaŋa lep, jaŋa ün qosqan taudai tūlǧa. Öz zamanynda laiyq baǧasyn ala almasa da, onyŋ märtebesın öleŋı älı künge deiın biıkke köterıp keledı. Onyŋ sözıne jazylǧan änder älı künge deiın öz ömırşeŋdıgın joǧaltpai keledı. Bır sözben aitqanda, qazaq bar da, qara öleŋ patşasy bolǧan Mūqaǧali mäŋgı jasai beredı, – deidı halyqaralyq baiqaulardyŋ laureaty Parasat Otan.
İä, ūly aqynnyŋ ömırge kelgenıne 93 jyl tolu qarsaŋynda ötıp jatqan būl konsert körermenderdıŋ ruhani sanasyn bır sılkındırıp tastady.
Şapaǧat ÄBDIR
