Astanada mektepışılık lagerlerdıŋ ekınşı mausymy aşyldy. Osyǧan orai, press-tur ūiymdastyryldy. Onyŋ aiasynda №79 mektep-lisei men №32 mektep-gimnaziiaǧa at basyn būrdyq.
Astana qalasy Bılım basqarmasy qosymşa bılım beru jäne tärbie jūmysy bölımınıŋ basşysy Gülfara Sarambetova oquşylardyŋ jaqsy demalyp, oi örısın keŋeituge, lagerde är kündı köŋıldı ötkızuıne tılektes ekenın jetkızdı. Saltanatty aşylu räsımınde qūttyqtau söz söilegen №79 mektep-lisei direktory Qūralai Mūqūşeva baldyrǧandarǧa sättılık tıledı.
– Qadırlı oquşylar, sızder lagerde qazaq halqynyŋ mädenietımen, dästürımen, tūrmys-tırşılıgımen, ana tılınıŋ töl erekşelıgımen tanysasyzdar. Sonymen qatar mūnda sızderdı jarqyn äserler, jaǧymdy emosiialar, ekskursiialar men joryqtar kütıp tūr. Oǧan qatysu arqyly intellektualdyq jäne şyǧarmaşylyq qabılettı damytasyzdar. Sondai-aq akterlık şeberlık, modeldeu, mobilografiia jäne blog jürgızu sabaǧy da oqytylady, – dedı Qūralai Balǧabaiqyzy.
Atalǧan mektepte «Jūldyz» lagerı, «Daryndylar jazy» lagerı, IT lager, turistık lager, etnolager ornalasqan.
Balalar aǧylşyn tılı, än-küi, qazaq tılı, dizainer-modeler, şyǧarmaşylyq, STEM mamandyqtar siiaqty üiırmelerge qatysady. Är üiırmenıŋ berer tärbiesı men üireterı mol. Mysaly, qazaq tılı üiırmesıne barǧanymyzda, balalar qazaq tılınıŋ qūndylyǧy turaly sabaq alyp, ertegı jattap, maqal-mätel aityp, jūmbaqtar şeşedı. STEM üiırmesındegı oquşylar tehnologiia tılın meŋgerıp, robot qūrastyryp, kompiutermen jūmys ısteidı. Än älemı üiırmesınde balalar qazaqtyŋ qara dombyrasyn sairatyp, halyq änderın qalyqtatsa, etnolagerdegı baldyrǧandar qazaqtyŋ ūlttyq taǧamdaryn äzırlep, ädet-ǧūryp, salt-sanasymen tanysady. Şyn mänınde, salt-dästürlerımızdıŋ jas ūrpaq sanasynda qaita jaŋǧyruy bolaşaǧymyzdyŋ nūrly ekenın körsetedı.
Al №32 mektep-gimnaziia lagerınıŋ özgeşelıgı sol, balalardy sportpen ainalysuǧa şaqyrady ärı osy baǧytta oiyndar oinatyp, jattyqtyrady.
Jalpy biyl qalalyq bılım beru ūiymdarynyŋ bazasynda mektep janyndaǧy 97 lager, oquşylar qyzyqqan ärtürlı baǧyt boiynşa 75 beiındık lager jūmys ıstep tūr. Qalalyq Bılım basqarmasynyŋ mälımetınşe, būl lagerler 1-10-synyptyŋ 200 myŋnan astam oquşysyn qamtyp otyr.
Şapaǧat Äbdır
