Astanada temır tūlpar tızgının ūstap, taksi jürgızuşısı bolyp jürgen näzık jandar sirek kezdesedı. Solardyŋ bırı – äleumettık jelıdegı belsendılıgı arqyly tanylǧan elordalyq Aqgül Şärıpova. Jyly jüzımen köp tūrǧynǧa tanys jürgızuşı – bügınde köpbalaly ana.
«Men Aqtöbe öŋırınen elordaǧa joldasymmen bırge arman quyp, 5 jyl būryn köşıp keldım» dep bastady äŋgımesın keiıpkerımız.
«Joldasym ekeumız balabaqşada da, mektepte de bırge oqyp, östık. Ekeumız bas qalaǧa qyzyǧyp, köşıp kelgen soŋ, öz basym elorda menı qūşaq jaia qarsy alady dep oiladym. Bıraq, Astana älsızderdıŋ qalasy emes ekenın tüsındım. Mūnda bırden jūmys ornyn tappasaŋ, kündelıktı tūrmysyŋda qiyndyqtar bolatyny sözsız. Köpbalaly ana bolǧan soŋ, menı özıme tiımdı oryndarǧa eşkım jūmysqa almady. Äuelı kadr bölımınde jūmys ıstep kördım, bıraq būl qyzmette ekı-üş mamannyŋ mındetın qosa jükteitın edı. Balalardyŋ bılım beru ortalyǧynyŋ äkımşısı men tärbieşısınıŋ jūmysyn qosa ıstep, 80-90 myŋ teŋge ailyq alatynmyn. Eŋbegımnıŋ qūnsyzdanǧanyn bılıp, soŋynda jūmys ornymdy bosatuǧa tura keldı. Mūnyŋ barlyǧy otbasymyz üşın bır synaq bolǧandai, osy sekıldı bırşama qiyndyqtarǧa kezıktık. Odan soŋ, naryqtaǧy eŋ arzan degen kölıktı satyp alyp, joldasym ekeuımız şopyr boluǧa bel budyq» dep jalǧastyrdy ol.
38 jasar Aqgül Şärıpova 1 jyl 9 ai uaqyt boiy astanalyq taksi jürgızuşısı bolyp qyzmet atqaryp keledı. 2008 jyldan berı kölık tızgının ūstaǧan ol bügınde temır tūlpardy ömırlık serıgıne ainaldyrdy. Kölıktı tızgındeuıne otbasy da sebepşı bolsa kerek. Öitkenı atasy da, äkesı de ūzaq jyldar boiy şopyr bolǧan. Joldasynyŋ kölık jürgızu mänerın ūnatyp jürgen özı de ıştei osy jūmysqa qyzyǧa qaraǧan körınedı.
Jūmys kestesı tyǧyz. Astanalyq jolauşylardy tasymaldauǧa keşke jaqyn şyǧyp, taŋ atqanǧa deiın kölık jürgızedı.
«Taŋerteŋ bala-şaǧama taŋǧy as berıp, mektebıne aparyp tastaimyn. Odan keşkı uaqytqa deiın üi şaruasymen ainalysamyn. Saǧat 8-9-darda jūmysqa şyǧyp, taŋǧy 7-ge deiın qyzmette bolamyn. Mūndai kün tärtıbıne otbasym üirendı, balalarym jauapkerşıl boluǧa daǧdylandy. Jūmys öz babymen bolsa da, otbasymyzda barlyǧymyz mındettı türde bır dastarhan basynda as ışemız. Tüngı uaqytta jürudı balalarymnyŋ üide, alaŋsyz otyratyndyǧynan bılıp taŋdadym. Özımnıŋ de köŋılım mäz bolady» dedı keiıpkerımız.
Kündelıktı ondaǧan ömır iesın tasymaldaǧan soŋ, jürgızuşı moinyndaǧy jauapkerşılık orasan. Aqgül Şärıpova är jolauşyny A-nüktesınen B-nüktesıne deiın aman-esen jetkızu basty mındetım deidı. Basqa salalarda özın synap körgen ol osy qyzmetı janyna jaqyn ekenın jetkızdı. Ärdaiym köterıŋkı köŋıl-küide jürıp, kölıgıne otyrǧan jandarmen de oryndy qaljyŋdasatynyn aitady. Sözınşe, özıne de aqjarqyn elordalyqtar kezdesedı.
«Taksi jürgızuşısı bolu – būl kündelıktı adamdarmen tıldesu, äŋgıme qūru. Az ǧana uaqytta täjıribe jinap, osy qyzmetten menıŋ oiǧa tüigenım, bızdıŋ qyzmette eŋ bırınşı psiholog boluy kerek eken. Öitkenı ärtürlı şaqyrtuǧa barǧanda ol jerdegı adamdy bır körgennen-aq onyŋ mınezın «tanyp-bılıp» alasyŋ. Ömırındegı qyzyǧy men şyjyǧyn bölısetın jandar köp. Neşe türlı taǧdyrlardy estıp jatamyn. Osy aitqandarynan oŋ närse tauyp, köŋılıne tittei de bolsa jaqsylyq ūialatuǧa tyrysamyn. Özım de sabaq alamyn. Sözsız barlyǧy kölıkke külıp kelıp jatpaidy. Keibırınıŋ mınezı jıbektei emes. Halyqpen ünemı bailanysta bolǧannan keiın türlı adamdar kezıgedı. Bırı raqmet aityp, sättı kün tılese, endı bırı şu şyǧaryp, sözge keluge daiyn-aq tūrady. Mūndaida bastysy, sabyrlyq tanytu kerek. Kez kelgenge qabaq şytpai, külıp qarasaŋ, künıŋ de däl solai ötedı. Sondyqtan taksi jürgızuşısı eŋ äuelı är jaǧdaida sabyrlyq tanytuy öte qajet.
Qalalyqtar kölıkten tüsıp bara jatyp «öte jeŋıl ärı baiyppen jürgızedı ekensız» dep şynaiy rizaşylyǧyn bıldırıp jatady. Ondai sözderdı estıgende quanamyn. Keide keudemdı erekşe sezım kerneidı. Jalpy men öz käsıbımdı öte jaqsy köremın. Sondyqtan bolar qiyndyqty sezbeitınım. Üirenşıktı jūmysym bolǧan soŋ, barynşa ūqypty ısteuge tyrysamyn» dedı ol.
Tünı boiy temır tūlpar tızgındeitın «şopyr» äiel kündız de şyǧyp, tabysyŋ eselep arttyruǧa bolady deidı. Bıraq tüstegı keptelıstıŋ jüikenı tozdyratyny bar. Sondyqtan tünı boiy jūmys ıstep, ärı odan läzzat alu Aqgül Şärıpova üşın äldeqaida tiımdırek.
– Ärine taksi jürgızuşısı retınde köp ailyq tapqyŋ kelse, säikesınşe köp uaqyt rölde otyruyŋ qajet. Özımdı täulıgıne 10 myŋ teŋgeden 50 myŋ teŋge aluǧa deiın synap kördım. Bıraq ekı-üş kündei qaita qalypqa kelu qiyn bolady. Qarajattyŋ ösuıne ärine taksi qyzmetınıŋ sanaty da äser etedı. Eŋ bırınşı «Ekonom» tariften azyraq tapsam, bügınde «Komfort» jäne «Komfort+» sanatynda jüruımnen näpaqam artty. Astana sekıldı megapoliste kün sanap kölıkter köbeiıp keledı. Byltyr künıne 35 myŋ teŋge tauyp jürsem, bügınde köp degende 20 myŋ teŋge şyǧaruǧa tyrysamyn. Onyŋ üstıne qazırgı kölıgımdı nesiege aldym. Sondyqtan ony jabu üşın qosymşa tabys közı retınde äleumettık jelıde blog jürgızudıŋ de paidasy bar. Qalalyqtardyŋ menı jiı tanyp jatuy sodan, – dedı A.Şärıpova.
Qalada özı sekıldı taksi jürgızuşısı bolyp jürgen näzık jandylar az emes. Äsırese, orta jastaǧy otbasyly äiel adamdar barşylyq. Bügınde barlyǧy tıl tabysyp, qūrby-qūrdasqa ainalǧan. Ömırlık jolyn jolauşy tasymalymen bailanystyrǧan Aqgül Şärıpova – üş ūl, bır qyz tärbielep otyrǧan köpbalaly ana. Tūŋǧyşy jas önertapqyş retınde robototehnika salasynda jetıstıkke jetıp jürse, ekınşı ūly futbolmen ainylasady. Al qyzy taekvondoda baq synap jürgenımen erekşelenedı. Äiel qyryq şyraqty ekenın körsete bılgen köpbalaly ana «bala – ata-ananyŋ ainasy» degendı ūstanym etken. Osylaişa, erekşe qyzmet iesı adal eŋbek etu arqyly balalaryna ülgı körsetıp, olardyŋ da bılıktı maman bolǧanyn armandaidy.
