Erkeǧali Rahmadiev atyndaǧy Memlekettık akademiialyq filarmoniianyŋ konsert zalynda Astana qalasy äkımdıgınıŋ qoldauymen belgılı kompozitor, Qazaqstannyŋ eŋbek sıŋırgen qairatkerı Tıleuǧali Qyşqaşbaidyŋ elordanyŋ 25 jyldyǧyna arnalǧan «Astana – bas qala» atty şyǧarmaşylyq keşı öttı.
Bırqatar basşylyq qyzmettı atqarǧan keş iesı osydan şirek ǧasyr būryn Astana qalasy Mädeniet basqarmasynyŋ basşysy bolyp taǧaiyndaldy. Ekı jyl osy qyzmettı atqaryp, sol uaqytta Alataudan Arqaǧa endı köşıp kelgen jaŋa astana mädenietınıŋ aiaqqa tūruyna atsalysty. Sol jyldary belgılı aqyn Jeŋıs Qaşqynovtyŋ öleŋıne «Astana – bas qala» atty än jazdy. Būl tuyndyny Astananyŋ köşıp kelgen künı – 1997 jyldyŋ 10 jeltoqsanynda «Jastar» saraiynda Aqjol Meiırbekov pen Baian Esentaeva alǧaş ret oryndady. Säl keiın reseilık «Na-Na» toby repertuaryna qosyp, Astananyŋ halyqaralyq tūsaukeserı künı – 1998 jyldyŋ 10 mausymynda Esıldıŋ jaǧasynda şyrqady.
Tıleuǧali Qyşqaşbaidyŋ şyǧarmaşylyǧynda osy «Astana – bas qala» änınıŋ şoqtyǧy biık. Jalpy kompozitordyŋ änderınen basqa simfoniialyq orkestrge, halyq aspaptary orkestrıne, ışektı aspaptar kvartetıne arnalǧan muzykalyq şyǧarmalary bar. Öner iesı ǧylymmen de ainalysyp, pedagogika ǧylymdarynyŋ doktory, professor ǧylymi ataǧyn aldy. 6 monografiia men 5 oqulyq, 16 oqu qūralyn, ǧylymi maqalalardy jazdy. Biyl «Qazaq öner älemı» monografiiasy jaryq kördı.
Al şyǧarmaşylyq keşınde Ūlyqbek Esdäulet, Ǧalym Jailybai syndy körnektı aqyndardyŋ, basqa da avtorlardyŋ öleŋderıne jazylǧan änder şyrqalyp, tuyndylary oryndaldy. Keş barysynda Astana qalasynyŋ simfoniialyq orkestrı, belgılı änşıler Baqtiiar Tailaqbaev, Qūrmaş Mahan, Bauyrjan İsaev, Erkeǧali Rahmadiev atyndaǧy Memlekettık akademiialyq filarmoniianyŋ änşılerı öner körsettı.
