Qazaq poeziiasyna näzıktık pen biiazylyq äkelgen Marfuǧa Bektemırova tuǧan jerın süidı, kerbez de sūlu Kökşetaudy, jer jännaty Burabaidy, asqaq Oqjetpestı, tylsym Jūmbaqtasty, suy möp-möldır Ainaköldı jyrǧa qosty. Sosyn da elın süigen perzentın jerlesterı ūmytpai, qadırleidı. Aqmola oblysyndaǧy Burabai audanynyŋ ortalyǧy Şuche qalasyndaǧy bır köşege aqyn esımınıŋ berıluı – sonyŋ jarqyn aiǧaǧy.
Qaladaǧy joǧary pedagogikalyq kolledjdıŋ mäjılıs zalynda qazaqtyŋ körnektı aqyny, qoǧam qairatkerı Marfuǧa Bektemırova köşesınıŋ aşylu saltanaty öttı. Is-şaraǧa Burabai audandyq, qalalyq äkımdıktıŋ qyzmetkerlerı, ardagerler, mūǧalımder, Kökşetau, Astana qalalarynan kelgen aqyn-jazuşylar, BAQ ökılderı qatysty.
– Halqymyzǧa adal qyzmet etıp, mädenietımız ben ädebietımızdı damytuǧa zor eŋbek sıŋırgen qairatkerlerımızdıŋ, asyldarymyzdyŋ eŋbegın bız eşqaşan ūmytpai, este saqtauymyz kerek. Būl öskeleŋ ūrpaqty patriottyq ruhqa, adamgerşılıkke, meiırımdılıkke, jaqsylyqqa tärbieleuge kömektesedı. Qalamyzdaǧy bır köşenıŋ talantty aqyn Marfuǧa Bektemırova esımımen ataluynyŋ özı zaman men ūrpaqtyŋ ajyramas bailanysyn taǧy bır märte körsetedı. Aqyn ömırden erte ketse de, özınıŋ oişyl da jaqūt jyrlarymen halyq jadynda mäŋgılık saqtalady dep senemın, – dedı Şuche qalasynyŋ äkımı Ashat Mūhamedjanov.
Endı Burabai audanynyŋ ortalyǧy Şuche qalasyndaǧy būrynǧy Emelian Pugachev köşesı Marfuǧa Bektemırova esımımen atalady. Būl köşe şahardyŋ bır şetındegı Kökşetau tauynyŋ etegınen bastalyp, vokzalǧa deiın ūzynnan ūzaq sozylyp jatyr.
Jiynda aqynnyŋ jary, jazuşy Esengeldı Süiınov osy ıs-şarany oidaǧydai ötkızuge belsene atsalysqandarǧa otbasy, tuǧan-tuysqandar atynan alǧys aitty. Is-şarada Marfuǧa Bektemırovanyŋ syrşyl öleŋderı oqyldy, sözıne jazylǧan jäne töl äsem änderı oryndaldy. «Jan-düniemnıŋ jaŋǧyryǧy» atty kıtap körmesı ūiymdastyryldy.
Aqerke BAZARǦALİEVA,
L.Gumilev atyndaǧy universitetınıŋ studentı
