Öner – jalpyǧa ortaq, eşqaşan mūqalmaityn, maŋyzyn joimaityn, jürek tükpırınen oryn alyp, jan tebırentetın erekşe qūbylys. Onyŋ san türlı tarmaǧy türlı janrdy qamtidy. Öskeleŋ ūrpaqty jastaiynan önerge baulu öresı keŋ, örkeniettı eldıŋ sanaly tūrǧyndarynyŋ sanyn arttyrary sözsız.
Sahna – kielı ūǧym. Onyŋ özındık mädenietı, tärtıbı men talǧamy bar. Örenderdıŋ önerın örge jüzdıru üşın eŋ aldymen sahna mädenietıne baulyp, ädeptılıktıŋ maŋyzyn därıpteuımız qajet. Äsırese teatr sahnasynda mült ketuge jol joq. Men atalmyş salanyŋ mamany retınde bılım aluşylardyŋ barynşa önerge degen qūrmetın qalyptastyrudy alǧaşqy orynǧa qoiamyn. Sebebı öz ısıne, ainalasyna syilastyqpen qaraǧan adam şyǧarmaşylyqty şyŋdap qana qoimaidy, ony jan düniesımen ūǧynyp, özgelerge de darytuǧa tyrysady.
Teatr – jandy kino tärızdı. Oqiǧanyŋ bar bolmysy sahnada körınıs tabady. Qoiylymnyŋ körermennıŋ jüregıne jol tabuy, jalpaq jūrttyŋ önerge degen közqarasy akterlerdıŋ şeberlıgınıŋ üilesım tabuyna tıkelei bailanysty. Sondyqtan sahna mädenietın ūstanǧan jandardyŋ boiynda ülken jauapkerşılık jügı bar ekenın sezındıru qajet.
Oqu men tärbie egız ūǧym ekenın eskersek, oquşylardyŋ jauapkerşılıgın arttyru barysynda daiyndyqty sebepsız bosatpauyn qadaǧalau qajet. Sahnanyŋ är detalı, är sätı talqylanyp, aldyn ala pysyqtalatyn tūsta qoiylymǧa qatysatyn oquşylardyŋ sabaqty sebepsız bosatuy olqylyqtyŋ oryn aluyna negız bolary anyq. Sondyqtan jas ärtısterdıŋ önerge degen közqarasyn qalyptastyru barysynda onyŋ maŋyzyn därıptep otyru kerek.
Ärine, sahnada boi körsetıp, jalpaq jūrttyŋ aldynda öner körsetu oŋai emes. Būl, ülken jauapkerşılık pen daiyndyqtan bölek, balalardyŋ öz-özıne degen senımdılıgın baiqatady. Qobalju, qorqynyş sezımınıŋ boidy bileuı – zaŋdy qūbylys. Degenmen būl ülken eŋbektı joqqa şyǧaryp, tıptı tolyq qūramnyŋ qanşama tökken terıne de kedergı keltıruı mümkın. Sondyqtan daryndylyqpen qatar, är oquşynyŋ boiynda senımdılık sezımın qalyptastyru asa maŋyzdy.
Būl talaptardyŋ bärın oryndap, özın üzdık qyrynan körsetıp jürgen şäkırtter qatary jetıp artylady. Degenmen top ışınen daralanyp şyǧyp, bırden körermen közaiymyna ainalǧan, eŋbegı men önerge degen zor qūştarlyǧynyŋ arqasynda biık belesterdı baǧyndyryp jürgen şäkırtım Abai Jaŋabaidyŋ orny tym erekşe. 2020 jyldan berı därıs alyp, sahnaǧa äbden töselgen önerpaz osy jyldar aralyǧynda jetıstıkterge de jetıp ülgerdı. Mäselen, «Turkestan Music Festival» atty halyqaralyq konkursta qarsylastaryna des bermei, laureat atanyp, I oryndy qanjyǧaǧa bailady. Abaidyŋ būl halyqaralyq därejedegı jalǧyz jeŋısı emes, Almaty qalasynda ötken «Almaty Music Festival» baiqauynda da biıkten körınıp, 1-oryndy ielengen bolatyn. Odan bölek, respublikalyq balalar, jasöspırımder jäne ūstazdar arasyndaǧy «Ata önerı – balaǧa mūra» atty saiysta da III oryn aldy.
Önerdı janyna serık etken jan salauatty ömır saltyn da ünemı nazardan tys qaldyrmai, sportty da janyna serık etken. «Erkın küres» saiysynda 30 kelı salmaq därejesı boiynşa III oryn ielense, «Adlet Boxing Club» aşyq turnirınde qola medaldı qanjyǧaǧa bailady.
Önerge qadam basqan kezden bastap alǧa qoiǧan maqsatqa jetu jolynda tapsyrmalardy būljytpai oryndap, bar beiımı men qabıletın joǧary deŋgeide körsetken oquşym biyl Qazaq ūlttyq öner universitetıne «drama jäne kino akterı» mamandyǧyna oquǧa qūjatyn tapsyrdy. Mūnyŋ özı joǧary jetıstık dep oilaimyn. Boidaǧy qorqynyşyn seiıltıp, özıne degen senımı bekıgen şäkırtımnen bolaşaqta zor ümıt kütemın!
Ūlpan ASANOVA,
Astana qalasy №2 öner
mektebı teatr bölımınıŋ mūǧalımı, önertanu
ǧylymdarynyŋ magistrı
