Keşe elordadaǧy «Keruen» sauda-oiyn-sauyq ortalyǧynda «Qauıpsız sauda» respublikalyq aksiiasy aiasynda Astana qalasy Tötenşe jaǧdailar departamentınıŋ ūiymdastyruymen adamdar köp şoǧyrlanatyn oryndarda ört qauıpsızdıgın saqtau jönınde auqymdy aldyn alu ıs-şarasy men ört-taktikalyq oqu sabaǧy ötkızıldı.
Saǧat taŋerteŋgı 9:15-te sauda-oiyn-sauyq ortalyǧynyŋ ekınşı qabatynda şartty türde arnauly ştab qūrylyp, ǧimarattan adamdardy şūǧyl syrtqa şyǧaru, iaǧni evakuasiia bastaldy.
Astana qalasy Tötenşe jaǧdailar departamentı memlekettık ört baqylau basqarmasy basşysynyŋ orynbasary Anar Rüstemovanyŋ aituynşa, mūndai oqu-jattyǧu sabaǧy qalada aiyna bır-ekı ret ötıp tūrady.
– Qazır qalada ört şyǧu oqiǧalary köbeiıp otyrǧany alaŋdatady. Onyŋ adam ömırı men densaulyǧyna, qorşaǧan ortaǧa jäne materialdyq qūndylyqtarǧa orny tolmas ziian keltıretını belgılı. Sondyqtan osyndai ört qauıpsızdıgın saqtauǧa bailanysty taktikalyq oqu-jattyǧu sabaqtary josparly türde jürgızılıp keledı. Şahardaǧy ırı sauda oryndarynyŋ bırı – «Keruende» osyndai ıs-şara ötıp, oǧan jeke qūramnyŋ qyzmetkerlerı men arnauly jasaq qatysty, – dedı ol.
Basty maqsat – ört şyqqan kezde adamdardyŋ özderın ūstauy men üreige boi aldyrmai, joǧary qabattan baspaldaq arqyly tüsıp, tez syrtqa şyǧu. «Evakuasiia, tez syrtqa şyǧyŋdar!» degen būiryq kezınde sauda ortalyǧyndaǧy 150-ge tarta adam sanauly minutta syrtqa şyǧyp ülgerdı. Al ışte örttı söndıru üşın su, köbık, kömır qyşqyly, inerttı gaz, qūm, ūntaq jäne brezent, kiız, asbest siiaqty türlı japqyş qūraldar qoldanyldy.
«Tūrmysqa kerek zattardy alaiyn dep ertemen «Keruen» sauda ortalyǧyna kıre qoiyp edım. «Ört şyqty, tez baspaldaqpen tüsıp, syrtqy esıkke betteŋder!» degende abdyrap qaldym. Jalma-jan tömen tüsıp syrtqa şyqsam, oqu-jattyǧu eken. Köŋılım ornyna tüstı. Dūrys, qazır ört köbeiıp kettı. Sondyqtan saqtanyp, bärıne saqadai sai bolǧanǧa ne jetsın!» deidı qala tūrǧyny Ainagül Bişaeva.
Sondai-aq būl künı elordalyq Tötenşe jaǧdailar departamentı qyzmetkerlerı ört qauıpsızdıgı erejelerın saqtau mäselelerıne bailanysty qaladaǧy hostelderge jospardan tys tekseru jürgızdı.
