Astana halyqaralyq universitetınde Nūra audany Ardagerler keŋesınıŋ ūiymdastyruymen Memleket basşysy Qasym-Jomart Toqaevtyŋ Egemen Qazaqstan gazetıne bergen sūhbaty talqylandy. Jiynǧa Ardagerler keŋesınıŋ müşelerı, universitet oqytuşylary men studentter qatysty.
Onda sūhbatta aitylǧan ideialardy halyq arasynda ılgerıletu mäselelerı aityldy. Aǧa buyn ökılderı atom elektr stansiiasynyŋ qūrylysy, Qazaqstandaǧy genderlık teŋdık, azamattardyŋ äleumettık mäselelerı, ūlttyq tarihty zertteu jäne damytu siiaqty mäselelerge qatysty öz pıkırın bıldırdı.
Nūra audany Ardagerler keŋesınıŋ müşesı Jeŋıs Bödeşev Prezident sūhbatyn ötken jyldyŋ dästürlı qorytyndysy dep sanaitynyn aitty.
«Būl kezdesudıŋ maŋyzy joǧary dep oilaimyn. Öitkenı Prezident sūhbat barysynda elımızdıŋ äleumettık-ekonomikalyq jäne halyqaralyq jaǧdaiyna toqtalyp öttı. Sūhbatta ötken 2023 jyldy qorytyndylap, aldaǧy uaqytta ıske asatyn basym baǧyttar men saiasi özgerıster turaly jan-jaqty aitty. Mıne, sondyqtan būl kezdesudıŋ jastarǧa maŋyzy zor dep esepteimın. İä, qazır jastar gazet oqymaityny belgılı. Sondyqtan da osyndai maŋyzdy ärı salmaqty sūhbattardy aǧa buyn ökılderı jastarmen bırlesıp talqylauy qajet. Sonymen qatar Prezident Qaŋtar oqiǧasyn tudyrǧan sebepterdı, olardyŋ keibır saldaryn atap körsettı. Şyn mänınde, Prezident elımızde demokratiialandyru prosesı joǧary ekenın jäne ol damyp kele jatqanyn atap öttı» dedı J.Bödeşev.
Professor Serık Djalmakanov öz sözınde Prezident Egemen Qazaqstan gazetıne bergen sūhbatynda osy künge deiıngı halyqty tolǧandyryp otyrǧan qoǧamdyq mäselelerge aşyq jauap bergenın atap öttı.
«Prezidenttıŋ «Bız ozyq oily ūlt retınde tek qana alǧa qarauymyz kerek» atty sūhbatyn oqyp, bıraz kerektı dünielerdı özıme türtıp aldym. Eŋ äuelı, būl sūhbattyŋ basty erekşelıgı – Prezident osy künge deiıngı saiasi oqiǧalarǧa, halyqty tolǧandyryp otyrǧan qoǧamdyq mäselelerge aşyq jauap berıptı. Däl qazır qoǧamda qyzu talqylanyp jatqan atom stansiiasy mäselesıne jauap berdı. Mūny endı halyq şeşetın boldy. Sonymen qatar elımız biyl bırneşe bedeldı halyqaralyq ūiymǧa töraǧalyq etedı. Atap aitsaq, Şanhai yntymaqtastyq ūiymyna, Ūjymdyq qauıpsızdık turaly şart ūiymyna, Aziiadaǧy özara ıs-qimyl jäne senım şaralary jönındegı keŋeske, Türkı memleketterı ūiymyna, Araldy qūtqaru halyqaralyq qoryna, Azyq-tülık qauıpsızdıgı jönındegı islam ūiymdary. Jalpy būl sūhbat ülkenderge de, jastarǧa da oi saldy dep paiymdaimyn. Sondyqtan da studentterdı osy sūhbatty tolyq oquǧa şaqyramyn» dedı professor.
Jiyn barysynda Nūra audany Ardagerler keŋesınıŋ özge müşelerı de oi-pıkırın ortaǧa salyp, jastarmen bırge sūhbatta aitylǧan mäselelerdı talqylady.
Zarina SÄRSENBAIQYZY
