Erkeǧali Rahmadiev atyndaǧy Memlekettık akademiialyq filarmoniia ūjymdary Otan qorǧauşylar künıne jäne Jeŋıs künıne orai bırqatar ıs-şara ötkızdı. Filarmoniianyŋ konsert zalynda «Otan dep soqqan jürekter» atty merekelık konsert öttı.
Konsertke qatysuşylar muzykalyq aspaptarda oinau şeberlıgın körsetıp, än şyrqap, bi biledı. Atap aitqanda, filarmoniia änşılerı Altynbek Äbılda, Jandos İmanbai, Altynşaş Mūqataeva, Parasat Otan, Qymbat Jambylbek, Aidyn Jūmabai, Mūratbek Hairolda, Bauyrjan Tūrǧymbaev, Ūlttyq ūlannyŋ än-bi ansamblı, «Alem» zamanaui horeografiia baletı jäne «Jas sarbaz» balalar şeberlık studiiasy öner körsettı.
Esıl özenı jaǧalauyndaǧy jaiau jürgınşılerge arnalǧan köşede E.Rahmadiev atyndaǧy Memlekettık akademiialyq filarmoniianyŋ simfoniialyq orkestrınıŋ şeruı öttı.
Qalyptasqan dästür boiynşa tūrǧyndar köp jinalatyn elordanyŋ ortalyq saiabaǧynda muzykanttar qala tūrǧyndary men qonaqtaryn Jeŋıs künımen qūttyqtap, öner körsettı. Kenesary han eskertkışınen bastalyp, ortalyq saiabaqtyŋ «Amfiteatr» aumaǧyna deiın jalǧasqan şeru barysynda barşaǧa tanys ärı süiıktı şyǧarmalar oryndaldy.
Astanalyq filarmoniianyŋ ürlemelı aspaptar orkestrı men «Astana jastary» mekemesınıŋ jastary «Red bus» ekskursiialyq ekı qabatty avtobuspen Ūly Otan soǧysynyŋ ardagerlerı tūratyn mekenjailarǧa bardy. Erekeşe formattaǧy būl ıs-şarada maidangerler aldynda äskeri-patriottyq tuyndylar men soǧys jyldaryndaǧy änder oryndaldy.
