Körnektı memleket jäne qoǧam qairatkerı, Parlament Senatynyŋ tūŋǧyş töraǧasy, «Otan» ordenınıŋ iegerı Ömırbek Baigeldı dünieden öttı. Memleket basşysy Qasym-Jomart Toqaev qairatkerdıŋ otbasy men jaqyn tuystaryna köŋıl aitu jedelhatyn joldady.
– Ömırbek Baigeldıūly egemendıktıŋ berık ırgetasyn qalasqan tūǧyrly tūlǧa, Otanymyzdyŋ damuyna qajyrly eŋbek sıŋırgen ūltjandy azamat boldy. Qazaqstan Respublikasy Parlamentınıŋ qalyptasuyna zor üles qosty. Ǧibratty ǧūmyr iesı özınıŋ naǧyz parasatty tūlǧaǧa tän qadır-qasietımen barşa jūrttyŋ syi-qūrmetıne bölendı. Soŋyna jarqyn ız qaldyrǧan Ömırbek Baigeldıūlynyŋ esımı men beinesı halqymyzdyŋ jadynda mäŋgı saqtalady. Marqūmnyŋ imany salamat, jany jännatta bolsyn, – dep jazylǧan jedelhatta.
Parlament Senatynyŋ töraǧasy Mäulen Äşımbaev:
– Ömırbek Baigeldıūly – egemen elımızdıŋ eŋse tıktep, ırge bekıtuıne zor eŋbek sıŋırgen tūlǧa. Azattyq alǧan kezeŋde özı tuǧan Jambyl oblysynyŋ alǧaşqy äkımı bolyp, öŋırdıŋ damuy jolynda aiqyn qoltaŋbasyn qaldyrdy.
1995 jyly Senat deputaty retınde sailanyp, täuelsız Qazaqstan tarihynda Parlament Senatynyŋ alǧaşqy töraǧasy boldy. Osylaişa, ūlttyq parlamentarizmnıŋ qalyptasuyna ülken üles qosty. Ömırbek Baigeldıūly būdan bölek, taǧy üş şaqyrylymda senator bolyp, ūltqa qyzmet etudıŋ ozyq ülgısın körsettı. Qyzmetten keiın de Senatorlar keŋesınıŋ müşesı retınde palata jūmysyna, jalpy el ömırıne belsendı aralasyp keldı.
Aǧamyzdyŋ ǧibratty ǧūmyry qaşanda köpke ülgı, ūrpaqqa önege bolyp qala beredı. Onyŋ jarqyn beinesı ärdaiym bızdıŋ jadymyzda saqtalady, – dep jazdy äleumettık jelıdegı paraqşasynda.
Belgılı jurnalist, kösemsözşı Meirambek Tölepbergen Ömırbek Baigeldı şyn mänınde şyŋyraudan şyŋdalyp şyqqan asa jıgerlı, qoǧamşyl, eŋbekşıl, talapşyl basşy, sonymen qatar ūlt ruhaniiatynyŋ ülken janaşyry bolǧanyn atap öttı. El men jer tarihyna qatysty köne tarihty tereŋırek tüsınıp, zamandar ürdısınde tanyp, bıluge naqty qadamdar jasaǧanyn, sonysymen memlekettıŋ biık lauazymynda tynymsyz qyzmet atqarǧan tūlǧalarǧa qadırlı bolǧanyn aityp öttı.
– Qaşan da qūşaǧy keŋ, bauyrmaşyl jäne ülken-kışımen bırdei emen-jarqyn oi bölısuge etene jaqyn, el bırlıgı, erteŋgı keleşek, adamdarǧa jaqsylyq jasau taqyrybynda oi-tolǧamdary erekşe ızdenıster men qamqor köŋılge toly peiılde aitylatyn. Al memlekettık qyzmetterde ösu baspaldaqtary ūstamdylyq, bılıktılık, eŋbeksüigış jäne adaldyq qasietterımen tanyldy. Ol özı tuyp, ösken, aituly azamat, saiasi qairatker därejesınde qalyptasqan Jambyl oblysynyŋ basşysy boldy. Qazaqstan Parlamentı Senatynyŋ alǧaşqy töraǧasy retınde de el esınde. Köp jyl Senat deputaty boldy. İmanjüzdı, meiırımdı jannyŋ qūrmetı barlyq uaqytta sezılıp tūratyn.
El aǧasy kezeŋınde parasatty, sabyrly, meiırımdı, turaşyl qalpynda ūltqa adal qyzmet etudıŋ jaqsy ülgısın körsettı. «Qariiasy bardyŋ qazynasy bar» degen danalyqtyŋ törınde boldy. Seksen bes jastyŋ belesınde dünieden ozǧan qadırlı jannyŋ artynda qalǧan öşpes ızı el jadynda saqtalar, ol ızdeuşısı bar abzal aǧa! – dedı Meirambek Tölepbergen.
Qoǧam qairatkerı Darhan Myŋbai Ömırbek Baigeldı ata dästürdı jalǧap, täuelsız memleketımızdıŋ ırgesın bekemdegenın, joǧary zaŋ şyǧaruşy bilık tarmaǧyn basqaryp, parlamentarizmdı damytuǧa öz ülesın qosqan abyz aqsaqal bolǧanyn aityp öttı. Tūlǧany adamgerşılıgı, baisaldy mınezı, ǧylymi-täjıribelık közqarasy, şyǧarmaşylyq ızdenısı özge joǧary mansaptylardan erekşelep tūratynyn atap öttı.
– Ekonomika, auyl şaruaşylyǧy jäne öndırıspen qatar ol tarih, mädeniet, ädebiet, sport, dıni aǧartuşylyq salalaryna da şynaiy janaşyrlyq tanytyp, köp ıs tyndyrdy. Sonyŋ ışınde būryn beimälım bolyp kelgen İordaniia jerındegı Mūsa paiǧambardyŋ kesenesın Sūltan Beibarystyŋ salǧany jönındegı zertteuı, Baluan Şolaqtyŋ müsınıne qatysty, qazaqtyŋ atyn älemge şyǧaryp jürgen jas talanttar turaly tyŋ pıkırlerı tarihta jazylyp qaldy.
Qandai qoǧamdyq bastamada, ortaq ıste bolsyn, Ömırbek Baigeldıūly äuelı ūltymyzdyŋ märtebesı men müddesın oilady, memleketımızdı ädılettı, ozyq, örkeniettı elder qatarynan körgısı keldı. Ätteŋ, bır kem dünie. Halyq jazuşysy Şerhan Mūrtazanyŋ osyndai ataumen kıtap jazuyna sebep bolǧan da Ömekeŋ. Äsırese, toqsan toǧyz jiren qasqa hikaiasy taǧylymdy edı. Qaratau qoinauyndaǧy Qaraǧai eli duana qarǧysynan Eŋbek eri Baigeldiniŋ tūsynda ǧana arylǧan… Endı, mıne, qalamger bauyry attanǧan mäŋgılık sapardyŋ soŋyna özı de ılesıp kete bardy, – dep jazdy Darhan Myŋbai.
***
Keşe Astanada jūrtşylyq memleket qairatkerın soŋǧy saparǧa şyǧaryp saldy. Beibıtşılık jäne kelısım saraiynda qaraly jiyn ötıp, körnektı tūlǧa Ūlttyq panteonda jerlendı.
Parlament Senatynyŋ töraǧasy Mäulen Äşımbaev Memleket basşysy Qasym-Jomart Toqaevtyŋ köŋıl aitu jedelhatyn oqyp berıp, Ömırbek Baigeldınıŋ ömır jolyna, elge sıŋırgen eŋbegıne toqtala kele, otbasy men tuǧan tuysqandaryna köŋıl aitty.
Parlament Mäjılısınıŋ töraǧasy Erlan Qoşanov
«Ömekeŋ şynynda da öte önegelı, öte mändı, mazmūndy ömır sürdı. Täuelsızdıktıŋ alǧaşqy jyldardaǧy taǧdyrşeştı şeşımder qabyldanǧan kezde Ömekeŋ sol ısterdıŋ belortasynda jürdı. Būl turaly Respublika künıne arnalǧan saltanatty jiynda Memleket basşysy aityp, sol jyldary elımızdıŋ egemendıgınıŋ negızın qalaǧan azamattar arasynda Ömırbek Baigeldı esımın erekşe atap öttı. Öz basym Ömırbek Baigeldı Qazaqstan parlamentarizmı bastauynda tūrǧan tūlǧa dep aita alamyn» dedı.
Premer-ministrdıŋ orynbasary Tamara Düisenova Ükımet basşysynyŋ atynan köŋıl aita kele, Ömırbek Baigeldı täuelsızdıktıŋ alǧaşqy jyldary elımızdegı tūŋǧyş äkımderdıŋ bırı bolǧanyn, el üşın sol qiyn kezeŋde özı basqarǧan öŋırdı tyǧyryqtan alyp şyqqanyn atap öttı.
