Niu-Iorkte Qazaqstandyq ūlttyq saiabaqtar men tabiǧatqa ūqypty qarauǧa baǧyttalǧan jobalarǧa arnalǧan «Winds of Change» immersivtı körmesı öttı. Körme Manhettendegı (Niu-Iork, AQŞ) The Canvas 3.0 galereiasy men dükenınde Qazaq National Parks qoldauymen ūiymdastyryldy, dep habarlaidy astana-akshamy.kz.
Qazaqstan Respublikasynyŋ Turizm jäne sport vise-ministrı Erjan Erkınbaev: «Qazaqstan ärqaşan tabiǧi mūrasy mol jäne qorşaǧan ortaǧa qūrmetpen qaraityn el bolǧan jäne bolady. «Winds of Change» körmesı – būl bızdıŋ ūlttyq saiabaqtarymyzdyŋ sūlulyǧyn körsetu ǧana emes, sonymen qatar ıs-äreketke şaqyru. Bız küş bırıktıru arqyly bolaşaq ūrpaq üşın tabiǧi mūrany saqtap, jahandyq ekologiialyq özgerısterge üles qosa alamyz dep senemız», – dep atap öttı.
«Winds of Change» körmesı amerikandyq keluşılerdı qazaqstandyq ūlttyq tabiǧi saiabaqtarmen bıregei kreativtı jobalar arqyly tanystyrady:
• «Ile-Alatau tarihy» kıtaby — attas ūlttyq saiabaqpen bailanysty adamdardyŋ äŋgımelerı. Kıtaptyŋ basty keiıpkerlerı – öz ömırın tabiǧatpen bailanystyrǧan naqty adamdar: ǧalymdar, zoologtar, botanikter, arheologtar, gliasiologtar, astronomdar, ormanşylar men aŋşylar, alpinister, turister men erıktıler, olardyŋ ärqaisysy oqyrmanmen öz ömırın Ile-Alatau tabiǧi parkımen bailanystyratyn özındık, erekşe tarihymen bölısedı.
• «Adam-Tabiǧat» jobasy — lend-art installiasiiasy, qazırgı adam tabiǧattyŋ bır bölıgı bolyp qala ma degen sūraqty zertteitın joba. Qysqartylǧan, bıraq öte simvoldyq «TJ» degen ataumen de belgılı joba bır kezderı Aiusai şatqalynda turister qaldyrǧan qoqyspen taulardyŋ bıteluınıŋ özektı mäselesın köteredı. «TJ» – Almaty taularyndaǧy Wild Nature Volunteers erıktılerdıŋ qoǧamdyq senbılıkter kezınde tapqan vintajdy qoqystarǧa (20-70 jas aralyǧyndaǧy) arnalǧan körme.
• The ROOTS — būl installiasiia Tianşan şyrşasynyŋ zaqymdalǧan tamyrlaryn lend-art türınde jandandyrady. Adamnyŋ qolyndaǧy näzık tabiǧattyŋ üş beinesı adam men tabiǧat arasyndaǧy üilesımdılıktıŋ maŋyzdylyǧyn körsetedı.
Qazaq National Parks kreativtı direktory Dinara Gujavina: «Qazaq National Parks Altyn-Emel, Şaryn jäne Ile-Alatau ūlttyq parkterınde ekologiialyq turizm men turistık infraqūrylymdy damytuda. Bız qoǧamdaǧy tabiǧatqa ūqypty jäne jauapkerşılıkpen qarau ideialaryn damytuǧa ūmtylamyz».
Körme kuratory Nargiz Magaevanyŋ pıkırınşe: «Qazaqstandyq ūlttyq saiabaqtar – būl jusannyŋ iısı, şöldı jeldıŋ sybdyry jäne tauly aŋǧarlardyŋ güldengen alqaptary. «Winds of Change» körmesı tabiǧatpen bailanysta bolǧan ärbır adamnyŋ ışkı älemın özgertetın jobalar jasauǧa şabyttandyrady».
Körmege keluşıler Şaryn, Altyn-Emel jäne Ile-Alatau ūlttyq parkterıne arnalǧan Qazaq National Park önımderın satyp aldy.
