Asa qamqor erekşe meiırımdı Allanyŋ atymen bastaimyn! Barlyq maqtau Allaǧa tän. Ardaqty Paiǧambarymyz Mūhammedke Allanyŋ salauaty men sälemı bolsyn!
Qadırlı otandastar!
Sızderdı mūsylman qauymynyŋ ūlyq meiramy – Qūrban ait merekesımen şyn jürekten qūttyqtaimyn. Ait qabyl bolsyn! Barşaŋyzǧa myqty densaulyq, otbasylaryŋyzǧa amandyq, jūmystaryŋyzǧa bereke tıleimın.
Qūrban ait – şynaiy niet pen Allaǧa degen süiıspenşılıktı paş etetın meiram. Ūlyq merekenıŋ tärbielık mänı men maǧynasy tereŋde jatyr. Qasiettı Qūranda: «Ūmytpaŋdar, olardyŋ etı de, qany da eşqaşan Allaǧa jetpeidı. Oǧan jetetın närse – jürekterıŋızge ūialaǧan taqualyqtaryŋ (şynaiy nietterıŋ)» («Haj» süresı, 37-aiat), – delıngen. Aiatta aitylǧandai, Qūdai jolynda jaqsylyq jasauǧa niettengen pende būl amaldy riiasyz oimen oryndaidy.
Adam balasy qūrbandyq şalu arqyly Allanyŋ bergen rizyq-nesıbesıne şükır etedı. Qūdaidyŋ näsıp etken nyǧmettıŋ bır bölıgın kömekke mūqtaj jandarǧa ülestırıp, olardyŋ da aqysyn berıp, quanyşqa böleidı. Öitkenı Paiǧambarymyz Mūhammed (oǧan Allanyŋ salauaty men sälemı bolsyn): «Paryz amaldan keiıngı Allaǧa ūnamdy ıs – mūsylmannyŋ jüregıne quanyş syilau» degen.
Ülkennıŋ, kömekke mūqtaj jandardyŋ alǧysyn alyp, batasyna bölenu – ait kezınde oryndalatyn sauapty ıstıŋ bırı. Mūsylman balasynyŋ ūlyq künde şynaiy nietpen qūrban şalyp, ony mügedekter men jetımderge, köpbalaly otbasylar men qarttarǧa taratyp, alǧysyn aluǧa tyrysatyny sondyqtan.
Osy rette elımızdegı barşa käsıpker azamattardy Qūrban aittyŋ qūrmetıne mal qūnyn qoldan kötermei, halyqtyŋ äleumettık jaǧdaiyn eskerıp, oŋtaily baǧa ūsynuǧa, jūrtymyz künde tūtynatyn azyq-tülıkke mümkındıgınşe jeŋıldık jasauǧa şaqyramyn. Qūrban aitty atap ötudıŋ negızgı maqsaty – mūsylmandar arasynda özara meiırımdılık, jomarttyq, qaiyrymdylyq, qanaǧat syndy adamgerşılık qūndylyqtardy qalyptastyru. Allanyŋ raqym nūry tögıletın berekelı sätterde halqymyzǧa jaqsylyq jasap, köpşılıktıŋ rizaşylyǧyna böleneiık.
Qūrmettı halaiyq!
Alla qalasa osy jyly da elımızde qūrban şalu räsımı oflain jäne onlain formatta ötedı. Dıni basqarma el azamattaryna, äsırese qala tūrǧyndaryna qolaily jaǧdai jasau maqsatynda qūrban şalu räsımın qaşyqtan ötkızuge arnalǧan qurban2024.kz saityn ıske qosty. Qūrbandyq şalu räsımın basqa bıreuge tapsyryp, ony osy ıste ökıl etuge dınımızde rūqsat berılgen.
Özderıŋızge belgılı, ötken jyly müftiiat qyzmetkerlerı «Rabbyŋ üşın qūrban şal» qaiyrymdylyq jobasy aiasynda 1 104 tonna qūrbandyq etın 123 594 otbasyǧa, sonymen qatar mügedekter, zaǧiptar qory, auruhanalar men ardagerler üiıne jetkızıp berdı. Būiyrsa, biyl da osy baǧyttaǧy qaiyrymdylyq ıs-şaralardy jüzege asyramyz.
Qūrbandyq etı äsırese su tasqynynan zardap şekken otandastarymyzǧa, qarausyz qalǧan qarttarǧa, jalpy äleumettık az qamtylǧan otbasylarǧa taratylady. Elımızdegı barşa mūsylman qauymyn sauapty ıske üles qosyp, belsendı boluǧa ündeimın.
Qadırlı jamaǧat!
Bügınde älem mūsylmandary qasiettı Mekke qalasynda qajylyq jasauda. Solardyŋ qatarynda paryzyn ötep jürgen 5 myŋnan astam otandasymyzdyŋ nietı, halqymyzǧa jasap jatqan dūǧasy qabyl bolyp, elımızge aman-esen oraluyn tıleimız. Alla Taǧala baitaq dalamyzǧa berekesın jaudyryp, şalǧan qūrbandyqtarymyzdy, bergen sadaqalarymyzdy, ait künderı amalǧa asyrǧan Allaǧa ūnamdy ärbır igı ısterımızdı qabyl etkei. Ämin!
Nauryzbai qajy TAǦANŪLY,
Qazaqstan mūsylmandary dıni basqarmasynyŋ
töraǧasy, Bas müfti
