«Qytaidaǧy Qazaqstannyŋ turizm jyly» aiasynda QR-dyŋ QHR-daǧy Elşılıgı QR Mädeniet jäne aqparat ministrlıgınıŋ qoldauymen Dechjou (Şandun ölkesı) jäne Lanfan (Hebei) qalalarynda Roza Baǧlanova atyndaǧy «Qazaqkonsert» memlekettık konserttık ūiymynyŋ gastrolın ūiymdastyrdy, dep habarlaidy astana-akshamy.kz.
Dechjou qalasynda ötken konserttıŋ aşylu saltanatynda Qazaqstannyŋ Qytaidaǧy Elşılıgınıŋ keŋesşı-uäkılı Asqar Şalqarbaev jäne Şandun ölk. Syrtqy ıster basqarmasy basşysynyŋ orynbasary Sun Ebao söz söiledı.
Qazaqstandyq diplomat körermenderdı Qazaqstan men Qytai arasyndaǧy yntymaqtastyq pen özara ıs-qimyldyŋ negızgı jetıstıkterı turaly habardar ettı. Biylǧy jyl «Qazaqstannyŋ Qytaidaǧy turizm jyly» aiasynda ötıp jatqanyna nazar audaryp, qatysuşylardy Qazaqstannyŋ körıktı jerlerıne baruǧa şaqyrdy.
Sun Ebao öz sözınde Qazaqstan Qytaidyŋ jaqyn dosy jäne senımdı serıktesı ekenın atap öttı. Ol ekı el arasyndaǧy mädeni yntymaqtastyqtyŋ ösıp kele jatqan serpının atap, būl ekı el arasyndaǧy mäŋgılık jan-jaqty strategiialyq ärıptestıktı damytuǧa qosymşa serpın beretındıgıne senım bıldırdı.
Konsert baǧdarlamasyna «Astana sazy» Qazaq memlekettık folklorlyq ansamblı, «Gülder» bi ansamblı, dästürlı oryndauşylar Elmūr Jaŋabergen, Erbolat Şaldybekov, Ardaq Balajanova, opera änşılerı Saltanat Ahmetova, Medet Chotabaev, sondai-aq tanymal änşı Ädılhan Makinnıŋ qoiylymdary kırdı.
Is-şaralar tolyq zalmen ötıp, qonaqtardyŋ jalpy sany 2000 astam körermendı qūrady.
