23 mausym – polisiia qyzmetkerlerınıŋ käsıbi merekesı. Polisiia – qoǧamdyq tärtıptıŋ küzetşısı. Al tärtıp – tynyştyǧymyzdyŋ kepılı.
Öitkenı olar qandai da bır merekede köŋılderı alaŋsyz bop, el qatarly demala da almaidy. Oǧan moiyndaryndaǧy mındettıŋ auyrlyǧy mümkındık bermeidı. Solai bola tūrsa da antyna adaldyǧyn būzbaǧan qyraǧy saqşylarymyz bır sätke de özderın bosaŋsytqan emes. Solardyŋ bırı – Astana qalasy Polisiia Departamentı arnaiy jūmyldyru jäne daiarlau basqarmasynyŋ erekşe tapsyrmalar boiynşa aǧa inspektory, polisiia podpolkovnigı Şalqar Barjaqsynov.
Ol Işkı ıster organdarynda qyzmetın 2002 jyldan bastap, Esıl audany polisiia basqarmasynyŋ jeke qūramyn tıkelei qadaǧalap, saqşylardyŋ käsıbi daiarlyǧyna jauapty bolyp qyzmet etıp keledı. Özı – qoian-qoltyq ūrystan jäne erkın küresten sport şeberı. Ol mıne, osy önerın qazırgı taŋda Astana qalasynyŋ 5 myŋǧa juyq polisiia qyzmetkerlerıne üiretıp jür. Keiıpkerımız qoǧamdyq oryndarda polisiia özın de, halyqty da qorǧai bıluı kerek dep esepteitının aitady.
– Men kündelıktı kestege säikes polisiialarǧa özımnıŋ bılgen täjıribemmen bölısemın. Onda sporttyŋ bırneşe türınen jäne qaru ūstaumen qatar qasköilerden qorǧanudyŋ amal täsılın üiretıp, sabaq beremın. Qazırgı taŋda basqarmada 25-ke juyq adam qyzmet etemız. Basşylyq qūramdy qospaǧanda 16-ǧa taiau bızdıŋ qyzmetkerlerımız künde jattyǧu alaŋynda polisiialardy türlı qorǧanu täsılderıne jattyqtyrady. Öitkenı polisiia qyzmetkerlerı halyqtyŋ bırden-bır qorǧanyşy bolǧandyqtan, eŋ äuelı olar özderın qorǧai aluy tiıs. Ärı qandai da bır jaǧdaiǧa tap bolǧanda ainalasyna zalal keltırmei şeşudıŋ jolyn qarastyryp, tez äreket etuı kerek. Al mūndaida kündelıktı jattyǧu jasap tūrǧannyŋ paidasy zor, – deidı.
Sondai-aq batyr babalarymyz jauǧa şapqanda bes qaruyn asynyp, neşe türlı önerge jattyqqany siiaqty polisiialardyŋ da bes qaruy qaşanda daiyn jüruı kerek dep bıletının aitqan ol, polisiia özınıŋ jüktelgen mındetın mült ketırmei oryndauy arqyly halyqtyŋ senımıne ie bola alatynyn alǧa tartady.
– Ärine, arnaiy polisiia ekendıgımızdı bıldırıp tūratyn forma kigen adamdar bolǧandyqtan, eldıŋ barlyǧy da bızge özınıŋ qorǧanyşy retınde qaraidy. Saqşylar ärtürlı jaǧdaida jol taba bıletın sergektıkke ie boluy kerek. Ärı polisiia qyzmetkerı bolǧan adam qaru ūstai bıluden bölek, suda jüzudı de, qylmyskerdı psihologiialyq türde qorqytudy da bıluı kerek. Mıne, ol sonda ǧana özınıŋ qyzmetın qai kezde bolsa da laiyqty atqara alady. Ärı sportpen ainalysyp tūrǧan adamnyŋ özın-özı sergek ūstaityny ekıbastan belgılı. Sondyqtan da polisiialarǧa kündelıktı jattyǧu jasatu barysynda öz densaulyqtaryn aialaudy, bılımderın arttyryp otyrudy aityp otyramyn. Menıŋ oiymşa, tärtıp saqşylary kün saiyn sport daǧdylaryna daiyndalyp, arnaiy synaq qabyldap, azamattardy qorǧai alatyndai qabıletı men dene şymyrlyǧyn damytyp, bılek küşı men nysanany däldeu daǧdysyna da jetık boluy şart, – deidı Ş.Barjaqsynov.
Söz arasynda ol Prezidenttıŋ polisiialarǧa jüktegen tapsyrmasynyŋ män-maŋyzyna toqtalyp jäne sol baǧytta qandai jūmystar atqarylyp jatqanyn da tılge tiek ettı.
– Batyr Bauyrjan Momyşūlynyŋ «Tärtıpsız el bolmaidy, tärtıpke baǧynǧan qūl bolmaidy» degen sözı bar. Rasynda da memlekettıŋ ösıp-örkendeuı üşın temırdei tärtıp qajet. Onsyz alǧa basu mümkın emes. Būl tūrǧyda Qazaqstan Respublikasynyŋ Prezidentı Qasym-Jomart Toqaevtyŋ tıkelei tapsyrmasymen qūqyq qorǧau organdaryn reformalau jūmystary jürgızılude. Osy baǧyttaǧy jaŋa bastamalar 2019 jyldan bastau alǧany belgılı. Sol jylǧy 17 säuırde ötken Işkı ıster ministrlıgınıŋ keŋeitılgen alqa otyrysyna qatysqan Memleket basşysy qūqyq qorǧau jüiesındegı reformanyŋ negızgı mındetı – qazaqstandyqtardyŋ qūqyqtaryn mültıksız qamtamasyz etu ekenın aityp, vedomstvonyŋ aldyna qūqyqbūzuşylyqtarǧa müldem tözbeuşılıktı qalyptastyru turaly mındet qoiu kerek ekendıgın aitqan Memleket basşysy «Qazır polisiia tıkelei öz mındetterıne jatpaityn jūmystarmen ainalysatyn uaqyt emes. Būl baǧytta alǧaşqy qadam jasaldy. IIM-nıŋ qūramynan tötenşe jaǧdailar jönındegı qyzmet bölındı. Işkı ıster organdary qūrylymdaryn odan ärı oŋtailandyru jūmystary Qūqyq qorǧau jäne sot jüiesın reformalau jönındegı komissiianyŋ şeŋberınde jüzege asyrylatyn bolady. Bıraq būl polisiianyŋ qyzmetın älsıretu degen söz emes. IIM jäne onyŋ qūrylymdyq bölımşelerı tärtıptı qamtamasyz etude memlekettıŋ negızgı tırek küşı bolǧan jäne solai bola beredı» dep aitqan bolatyn. Būl bız üşın şyn mänınde senım men artylǧan mındet dep bılemız. Sondyqtan Prezidenttıŋ tapsyrmasyn jüzege asyru maqsatynda tynbai eŋbektenıp jatyrmyz. Ainalyp kelgende, bärımız de – osy memlekettıŋ bolaşaǧy üşın ter tögıp jürgen jandarmyz. Sondyqtan men el azamattaryn qarapaiym jäne memlekettık qyzmetşı dep bölmeimın. Öitkenı Otan aldynda bırımız perzenttık boryşymyzdy atqaruǧa, bırımız adamdyq mındetımızdı öteu üşın barymyzdy salyp jürmız. Sondyqtan da polisiia ärqaşan halyqpen bırge, halyqtyŋ da bızben bırge bolǧany maŋyzdy, – deidı Şalqar Mūhambetūly.
Mıne, osyndai jūrty üşın ıstep, ūlt üşın eŋbek etıp kele jatqan Şalqar siiaqty saiypqyran saqşylardyŋ boluy – halqymyzdyŋ da ortaq quanyşy. Jastar, mıne, osyndai memlekettık qyzmetkerlerden tälım alsa, bolaşaǧymyz būdan da jarqyn bolatynyna senımımız kämıl qaşanda.
Şapaǧat ÄBDIR
