Ūlttyq akademiialyq kıtaphanada Astana qalasy äkımdıgınıŋ qoldauymen «HHI ǧasyrdaǧy Ädılettı Qazaqstan: jaŋa jetıstıkter men damu perspektivalary» atty döŋgelek üstel öttı. Oǧan Parlament deputattary, zertteu instituttarynyŋ ǧalymdary jäne qoǧam belsendılerı qatysty.
– Prezident Qasym-Jomart Toqaev özınıŋ sūhbatynda eldıŋ saiasi, ekonomikalyq jäne äleumettık ömırınıŋ negızgı aspektısıne baǧa berıp, aldaǧy maqsat-mūratty aiqyndap berdı. Bır kündık nemese bır ailyq emes, jetıstıkke jetudıŋ josparly, jüielı baǧdaryn körsetıp, alǧa ılgerılep, damuda belsendı, sergek oily boludyŋ maŋyzyn tüsındırdı. Işkı jäne syrtqy saiasat ūlttyq bıregeilıkke qyzmet etuı keregın tüsındırdı, – dedı alǧy sözdı alǧan Mäjılıs deputaty Samat Nūrtaza.
Al kıtaphana direktory Ǧaziza Nūrǧalieva sūhbatta köterılgen ideologiialyq basymdyqtardy ıske asyruda qoǧamdyq jäne ǧylymi zertteu instituttarmen bırlese jūmys ıstep, aǧartuşylyq, ǧylymi, ruhani-mädeni mındetın atqara beretının söz ettı.
2012-2022 jyldary halyqty bırıktıretın 10-nan asa ideia ūsynylyp, qoǧamdyq sanany jaŋǧyrtuǧa män berıldı, alaida tūjyrymdar qarapaiym tūrǧyndarǧa sıŋıstı bolyp, mäselelerdı öz deŋgeiınde şeşpedı. Qasym-Jomart Toqaev basqaruyndaǧy airyqşalyq – «eskı jüiedegıdei» joǧarydan emes, tömennen joǧaryǧa qarai degen saiasat qalyptastyruǧa ūmtylysy. Būl öz kezegınde ärbır mäselenıŋ öz deŋgeiınde şeşıluıne alyp keluı kerek. Oi-talqy alaŋynyŋ moderatory, Memleket tarihy institutynyŋ direktory, PhD Nūrbek Pūsyrmanovtyŋ oiy osyǧan saiady.
Joşy ūlysyn zertteu ǧylymi instituty direktorynyŋ mındetın atqaruşy Jaqsylyq Säbitov ekı Prezident tūsynda tarihi tūlǧalardyŋ nasihattalu deŋgeiıne toqtaldy.
– Täuelsızdıktıŋ alǧaşqy kezeŋınde äl-Farabi, Abylai han, Abai Qūnanbaiūly, Şoqan Uälihanovtyŋ tarihi tūlǧasyna qūrmet bıldırılıp, nasihattalsa, odan keiıngı jyldary Nūrsūltan Nazarbaevty tūlǧa retınde därıpteu jappai jürgızıldı. Tıptı Alaş kösemı Älihan Bökeihanovtyŋ 150 jyldyǧy eleusız qaldy. Dınmūhamed Qonaevtyŋ aty atalmady. Qasym-Jomart Toqaev tūlǧalardyŋ tarihtaǧy ornyn baǧalap, ideologiianyŋ qūramdas bır bölşegı etuge män berude. Söitıp, Ä.Bökeihanovtyŋ 155 jyldyǧy atap ötıldı, D.Qonaevtyŋ esımımen Qapşaǧai qalasyn ataudy ūsyndy. Biyl ǧalym Qanyş Sätbaevtyŋ 125 jyldyǧy, daŋqty batyrlar Saǧadat Nūrmaǧambetov pen Raqymjan Qoşqarbaevtyŋ 100 jyldyǧy keŋ kölemde atalyp, Joşy ūlysynyŋ 800 jyldyǧyna män beremız, – dedı tarihşy.
Döŋgelek üstelde söz alǧan spikerler Prezidenttıŋ sūhbaty qoǧamdy eldık ısterge ūiystyratynyn söz ettı. Prezident janyndaǧy Qazaqstannyŋ strategiialyq zertteu instituty strategiialyq taldau bölımınıŋ basşysy, PhD Ermek Toqtarov biyl elımız 6 halyqaralyq ūiymǧa töraǧalyq etetının, iaǧni eldıŋ ışkı jaǧdaiyna ǧana emes, älem elderınıŋ qauıpsızdıgıne ün qosatynyn, būl öz kezegınde Qasym-Jomart Toqaevtyŋ diplomat retındegı bedelın, Qazaqstannyŋ yntymaq pen bırlıktıŋ ūiasy ekenın aiǧaqtaidy.
Qazır elde qazaq ūltynyŋ ülesı 70 paiyzdan asty. Būl ūlttyq ideiaǧa basymdyq berudıŋ maŋyzyn körsetedı. Sūhbattyŋ mazmūnynan osyny da aŋǧaruǧa bolady.
Qoldanbaly etnosaiasi zertteuler instituty qoldanbaly zertteuler ortalyǧynyŋ direktory Aiaulym Saǧynbaevanyŋ aituynşa, Memleket basşysy sūhbatynda balalardyŋ qauıpsızdıgıne jäne äielderdıŋ zorlyq-zombylyǧyna qarsy ekenın bıldırıp, demografiialyq üderıstı qoldaitynyn bıldırdı.
Basqosu barysynda tarihşy ǧalym Bürkıt Aiaǧannyŋ «Qazaq handyǧy tarihyndaǧy Şibandar äuletı (Ibır-sıbır – Deştı-qypşaq – Mäuerennahr aimaǧynda)» atty kıtaptyŋ tūsauy kesılıp, köpşılıkke tanystyryldy.
