Syrǧanap sertten qaitpaǧan
Ataq-daŋqy, maqsat-abyroiy biık milisiia generaly Ömırzaq Qospanūly – naǧyz degdar azamat. Jūmys babynda aibynyn asqaqtatyp tūratyn qyzmet formasynda körseŋ sūsty, qaharly körıngenmen, tıldese qalsaŋyz meiırban, kışıpeiıl, qarapaiym qalpyna täntı bolasyz. Sözı şegemen qaqqandai nyq. Adamnyŋ ışkı oiyn, aitar sözın bırden sezıp, äŋgıme jelısın özı bastap, jyly jymiyp otyrady.
Ömırzaq Qospanūly Bolsambekov 1939 jyly 18 mausymda būrynǧy Aqmola qalasynda düniege kelgen. 1956 jyly orta mekteptı bıtırgennen keiın, ışkı ıster organdarynyŋ joldamasy boiynşa Omby qalasyndaǧy arnaiy milisiia orta mektebıne oquǧa tüsıp, 1958 jyly Aqmola stansiiasyndaǧy milisiianyŋ ızdestıru qyzmetıne taǧaiyndalady. Būl kezeŋ – Qazaqstanǧa tyŋ jäne tyŋaiǧan jerlerdı igeruge būrynǧy Sovet Odaǧynyŋ tükpır-tükpırınen adamdar aǧyla bastaǧan kezeŋ. Olardyŋ arasynda tyŋ igeretın, tyŋaiǧan jerlerdı halyq şaruaşylyǧyna paidalanyp, el ekonomikasyn arttyru üşın kelgen entuziastar boldy, sol aimaqtarǧa kezdeisoq kelgender de köp edı. Olar jer-jerde tärtıp būzyp, memleket qarjysyn ysyrap etu, ūrlyq jasau siiaqty keleŋsızdıkter jasap, jūmysşylar arasynda ırıtkı tuǧyzyp otyrdy. Būl oraida kölık polisiiasynyŋ qūqyqtyq tärtıptı qorǧaudaǧy zor eŋbegın atap ötu – paryz.
Jas ofiser Ömırzaq Qospanūly jaŋa jūmys uchaskesınde bılım men bılıgın, ūiymdastyruşylyq jäne käsıbi qabıletın körsetıp, naǧyz tärtıp saqşysy, qyraǧy, adal qyzmetker ekenın däleldedı. Joǧarǧy oryndardyŋ nazaryna ılınıp, 1962 jyly ol Qazaq KSR Işkı ıster ministrlıgınıŋ qoldauymen RKFSR Qoǧamdyq qauıpsızdık ministrlıgınıŋ Mäskeudegı joǧarǧy mektebıne kündızgı bölımge oquǧa jıberıldı. 1966 jyly bıtırıp, tuǧan qalasyna kölıktegı ışkı ıster organdaryna qyzmetke oraldy. Joǧarǧy mekteptı bıtırıp, tereŋ bılımmen qarulanyp kelgen myqty kadr retınde 1967 jyldan bastap Selinograd oblystyq atqaru komitetınıŋ ışkı ıster basqarmasynda türlı basşylyq lauazymda eŋbek etedı. Jūmys jeŋıl bolmasa da, qylmystyq ızdestırudıŋ jedel ökılı, anyqtauşy, tergeuşı bola bıldı. Qyraǧylyqtyŋ, tynymsyz ız kesudıŋ nätijesınde qanşama qylmystyŋ betın aşty. Kısı öltıru, barymta, memleket mülkın tärkıleu, qaraqşylyqpen küresu käsıbi şeberlıktı, jedel äreket jasaudy, batyldyq pen tabandylyqty talap etedı. Ärıptestermen bırlese otyryp şeşım qabyldau, auyzbırşılıkpen ortaq maqsatqa jūmyla bılu de maŋyzdy tetık. Sergektık, baiqaǧyştyq, analitika qabıletın damyta tüsedı. Osylar – Ömırzaq aǧanyŋ boiynan tabylatyn qasietter. Osyndai erekşelıkterımen aldyŋǧy saptan körıngendıkten, Selinograd oblystyq atqaru komitetı ışkı ıster bölımınıŋ bastyǧy 1979 jyly ştabtyq jūmysqa taǧaiyndaldy. 1989 jyldan 1999 jylǧa deiın Selinograd oblystyq atqaru komitetı Işkı ıster basqarmasynyŋ bastyǧy, Qazaqstan Respublikasy astanasynyŋ Almatydan Aqmolaǧa köşuı kezeŋınde ışkı ıster organdarynyŋ jūmysyn qaita ūiymdastyruǧa qosqan orasan zor ülesın aitpai ketsek ädıletsızdık bolar edı. Qajyrly eŋbegı baǧalanyp, Otanǧa sıŋırgen eŋbegı üşın Qazaqstan Respublikasynyŋ «Qūrmet» ordenın ielendı. KSRO jäne «Qazaqstan Respublikasy IIM eŋbek sıŋırgen qairatkerı jäne ardagerı», KSRO jäne Qazaqstan Respublikasy IIM köptegen medalımen marapattalǧan. Sonymen qatar Ömırzaq Qospanūly Aqmola oblysynyŋ qūrmettı azamaty atandy. Osynyŋ bärı – Otanǧa janqiiarlyqpen qyzmet etudıŋ jarqyn aiǧaǧy. Memleketımızdıŋ ışkı ıster organdarynyŋ qūryluyna, azamattardyŋ qauıpsızdıgın qamtamasyz etuge, olardyŋ zaŋdy qūqyǧy men müddesın qorǧauǧa qosqan zor ülesı üşın 1990 jyly milisiia generaly arnaiy joǧarǧy ataǧy berıldı.
Artynşa ūzaq jylǧy eŋbektıŋ zeinetın köretın uaqyt keldı. Qūrmettı demalysqa şyqqannan keiın de asyl aǧamyz qoǧamǧa qyzmet etuden tys qalmady. 2000-2007 jyldar aralyǧynda Qazaqstan Respublikasy qūqyq qorǧau organdarynyŋ «Dinamo» erıktı dene şynyqtyru-sport qoǧamy töraǧasynyŋ orynbasary boldy.
2007 jyldyŋ mamyr aiynan bastap milisiia general-maiory Ömırzaq Bolsambekov – «Işkı ıster organdary men Ūlttyq ūlan ardagerlerınıŋ qazaqstandyq ūiymy» qoǧamdyq bırlestıgınıŋ töraǧasy. Būl ūiymnyŋ da köterer jügı, atqarar mındetı jeterlık. Jastarǧa patriottyq tärbie berude ärbır ardagerdıŋ aitary da, körseter joly da bar. Jas ofiserler men joǧarǧy milisiia mektebınıŋ kursanttary tyǧyz bailanys ornatyp, ūrpaqtar sabaqtastyǧyn jalǧastyruda.
Ömekeŋ ömır jolynda mamandyq taŋdaudan da, jar taŋdaudan da jaŋylyspady. Ofiser bolu jürektıŋ batyrlyǧy, özıne senımdı adamnyŋ batyldyǧy degendei, mamandyǧyn jazbai tapqan.
55 jyl otasqan asyl jary Rysbike azamatynyŋ qauıp-qaterge toly, şytyrman oqiǧalardyŋ belortasynda jüretın jūmysyn jan jüregımen tüsıne bılıp, senımdı serıgı bola bıldı. Aǧamyz qanşa därejege jetse, oǧan erınıŋ qas-qabaǧyn baǧa bılgen aqyldy äieldıŋ ülesı zor dep bılemız. Ūl-qyz tärbielep, odan nemere-şöbere süiıp otyrǧan bır bäiterek, bır şynar Ömırzaq Bolsambekovtıŋ äuletı – tamyryn tereŋge tartyp, japyraǧy jaiqalyp otyrǧan üilı şaŋyraq.
Bügınde 85 jasqa tolyp otyrǧan, syrǧanasy sertten qaitpaǧan, ekı sözdı aitpaǧan, qandai jaǧdai tusa da, adaldyqty saqtaǧan milisiia general-maiory Ömırzaq Qospanūlyn mereilı jasymen qūttyqtaimyz!
Tau köşıp, tausylmaidy dariialar, el barda erdıŋ ısın tani alar demekşı, sapta tūryp, elge qyzmet etudıŋ ülgısın körsetıp, sara jol salǧan general aǧamyzdyŋ jankeştı eŋbegı men önegesın ömırderegınen tanyp, Abai hakım aitqandai, tolyq adamdy kördık, Prezident aityp jürgen adal adam beinesın tanydyq.
Qarlyǧaş QŪSPANOVA, Astana qalasy
Ardagerler keŋesınıŋ jurnalisı