Talapty jastarǧa bıregei mümkındık

Memleket basşysy Qasym-Jomart Toqaev Astanada ötken Prezidenttık jastar kadr rezervınıŋ forumyna qatysty. Jiyn aldynda Memleket basşysyna Prezidenttık jastar kadr rezervınıŋ qataryna är jyldary ötken mamandardyŋ jetekşılıgımen jüzege asyrylyp jatqan jobalar tanystyryldy. Atap aitqanda, Prezidentke «E-qyzmet» aqparattyq jüiesınıŋ artyqşylyqtary, Citix kompaniiasy önımderınıŋ eksporttyq äleuetı, «Kazakh Invest» ūlttyq kompaniiasynyŋ öŋdeuşı önerkäsıp pen energetika sektoryna investor tartu täjıribesı, sondai-aq biudjettık prosesterdı oŋtailandyruǧa arnalǧan «eAkimat365» aqparattyq jüiesı turaly mälımet berıldı.

Özgerısterdıŋ qozǧauşy küşı

Qasym-Jomart Toqaev forum qatysuşylarynyŋ aldynda söilegen sözınde jastardyŋ osynau innovasiialyq ızdenıs­terın oŋ baǧalap, tiıstı memlekettık organdar tarapynan mūndai bastamalarǧa qoldau körsetıletının jetkızdı. Onyŋ pıkırınşe, memleket basqaru ısıne oiy ūşqyr, bılımı ozyq, sana-sezımı tereŋ, naǧyz otanşyl azamattar köptep keluı kerek.

«Prezidenttık jastar kadr rezervı däl osyndai talapty jastarǧa bıregei mümkındık beredı. Bügınde rezervte 400 maman bar. Sonyŋ 280-ı, iaǧni 70 paiyzy ortalyq jäne jergılıktı atqaruşy organdarda jauapty lauazymdarǧa taǧaiyndaldy. Bırqatary kvazimemlekettık sektorda jäne biznes salasynda eŋbek etıp jür. Osy oraida men Memlekettık qyzmet ısterı agenttıgınıŋ būrynǧy töraiymy Anar Jaiylǧanova kezınde osy bastamany jüzege asyruǧa mol üles qosqanyn atap ötkım keledı. Qazırgı taŋda elımızde auqymdy reformalar jüzege asyrylyp jatyr. Memleketımızdı örkendetu üşın jaŋa, batyl qadamdar jasaluda. Sondyqtan özderıŋız siiaqty elımızdıŋ jalyndy jastary osy özgerısterdıŋ qozǧauşy küşıne, myqty tıregıne ainaluy kerek dep sanaimyn» dedı Qasym-Jomart Toqaev.

Memleket basşysy juyrda aimaqtyq jastar kadr rezervıne ırıkteu bastalatynyn mälımdedı. Äkımder onyŋ aşyq ärı ädıl ötuın qamtamasyz etuge tiıs. Sonymen qatar kadrlyq rezervtı jasaqtau barysynda är oblys­tyŋ äleumettık-ekonomikalyq erekşelıgın eskeru maŋyzdy.

Jaŋa mädeniet

Prezident memlekettık qyzmetşılerge tän jaŋa mädeniet qalyptastyru, qūndylyqtardy özgertu mäselesıne airyqşa toqtaldy. Onyŋ aituynşa, barlyq salada, äsırese memlekettık organdarda zaŋ men tärtıp üstemdıgı boluǧa tiıs.

«Zaŋ men tärtıp ornamasa, qazırgıdei kürdelı geosaiasi jaǧdaida elımızdı saqtap qalu qiyn bolady. Mūny bärı tüsıngenı jön. Tek memlekettık qyz­metşıler ǧana emes, jalpy qoǧam zaŋǧa baǧynuǧa tiıs. Būl demokratiia şekteledı degen söz emes, kerısınşe, elımızdıŋ egemendıgın nyǧaityp, demokratiiany damyta tüsedı» dedı Memleket basşysy.

Qasym-Jomart Toqaevtyŋ pıkırınşe, bilık ökılderı ärdaiym halyqpen bırge, iaǧni azamattarmen tyǧyz bailanysta jūmys ısteuı qajet. Kez kelgen mäselenı uaqytyly şeşıp otyru – negızgı mındet. «Halyq ünıne qūlaq asatyn memlekette» däl osyndai qūndylyqtar ornyǧuy kerek. Sonymen qatar Prezident memlekettık qyzmette bılıktı salalyq mamandardyŋ tapşylyǧy sezıletının aitty.

«Būl rette elımızdegı biznes, auyl şaruaşylyǧy, qarjy, medisina, bılım jäne basqa da sektorlarda tabysty eŋbek etıp jürgen adamdar jetkılıktı. Naqty nätijege ūmtylyp, tūtynuşynyŋ qajettılıgın öteu üşın jūmys ısteitın osyndai mamandardyŋ äleuetın jūmyldyru kerek. Memlekettık qyzmettıŋ gibridtı modelın engızudı jalǧastyrǧan jön. Ol üşın jeke sektordan bılıktı mamandardy memlekettık qyzmetke qabyldau erejesın anaǧūrlym erkın, jeŋıl etıp jasau mäselesın mūqiiat pysyqtau qajet» dedı Qasym-Jomart Toqaev.

Prezident memlekettık qyzmettıŋ tartymdylyǧyn arttyru üşın jeke sektormen bäsekeles eŋbekaqy belgıleu qajet ekenın atap öttı.

«Ärine jalaqy men syiaqyny şekten tys köp beruge bolmaidy. Bıraq taŋerteŋnen keşke deiın, uaqytpen sanaspai jūmys ısteitın memlekettık qyzmetkerlerge belgılı bır deŋgeide materialdyq ötemaqy tölenuı kerek dep sanaimyn. Mäsele öte özektı. Bız mūny memlekettık qyzmetşılerdıŋ paidasyna şeşemız. Olardyŋ baspana mäselesın de tiıstı deŋgeide şeşu kerek. Būl boiynşa Singapur jäne basqa da elderdıŋ täjıribesıne nazar audarǧan jön. Olardyŋ memlekettık basqaru jüiesındegı tiımdı ädıs-täsılderdı qarastyru qajet» dedı Qasym-Jomart Toqaev.

Genderlık teŋdık saqtalady

Sondai-aq Memleket basşysy ǧalymdardy, sarapşylar men belsendı azamattardy, äsırese, erıktılerdı qyzmetke tartudyŋ mänı zor dep sanaidy. Būl rette Prezident elımızdıŋ ädılettı memleket ärı inkliuzivtı qoǧam qūryp jatqanyna, genderlık teŋdıktı saqtau mäselesıne nazar audardy.

«Memlekettık apparattaǧy äielderdıŋ ülesı 55 paiyzǧa juyqtaǧanyna qaramastan, basşylyq qūramda būl körsetkış 39 paiyzdan aspaidy. Öz täjıribemnen bıletınım, äielderdı qyzmetke tartu kerek. Bırınşıden, er adamdar renjımesın, äielder jūmysqa öte mūqiiat, tiianaqty qaraidy. Er adamdarmen salystyrǧanda, jemqorlyq äreketterge beiım emes. Sybailas jemqorlyqqa qarsy küres jönındegı agenttıktıŋ statistikasy soǧan meŋzeidı. Saiasi qyzmetkerler arasynda da eleulı teŋsızdık baiqalady. Olardyŋ qataryndaǧy äielderdıŋ sany 10 paiyzǧa jetpeidı. Memlekettık qyzmettegı jastardyŋ ülesıne qatysty da disproporsiia bar. Memlekettık qyzmettegı äielderdıŋ, jastardyŋ jäne mümkındıgı şekteulı azamattardyŋ sanyn köbeitu kerek. Olardyŋ, äsırese, basşylyq qūramda qyzmet etuıne barynşa mümkındık bergen jön» dedı Prezident.

«Komandalyq köş» ürdısın synady

Qasym-Jomart Toqaev jas mamandardy memlekettık qyzmetke beiımdeu üşın Tälımgerlık institutyn jandandyru mäselesıne basa nazar audardy. Sonymen qatar memlekettık qyzmette «komandamen köşu» ürdısı älı tyiylmai otyrǧanyn synǧa aldy. Osyǧan orai Prezident Äkımşılıgıne, Memlekettık qyzmet ısterı jönındegı agenttıkke būl mäselenı qataŋ baqylauǧa aludy, mūndai äreketterge batyl tosqauyl qoiudy tapsyrdy.

«Jalpy, Memlekettık qyzmet ısterı jönındegı agenttıkke zaŋ jüzınde qosymşa qūzyret beru qajet dep sanaimyn. Olar elımızdegı kadr saiasatyna kon­s­truktivtı tūrǧydan yqpal ete aluǧa tiıs. Ärine, būl agenttık basşylyǧyna airyqşa jauapkerşılık jükteidı» dedı Qasym-Jomart Toqaev.

Memlekettık qyzmet qalai oŋtailanady?

Prezident memlekettık qyz­mettı neǧūrlym ozyq salaǧa ainaldyru qajet ekenın aitty.

«Jyldar boiy jauyr bolǧan biurokratiiaǧa, qaǧazbastylyqqa üzıldı-kesıldı tosqauyl qoiatyn uaqyt jettı. Memlekettık qyzmet jüiesınde barlyq üderıs aşyq boluǧa tiıs. «Memleket adam üşın» qyzmet etuı kerek. Elımızde azamattardyŋ müddesın tolyq qorǧaityn memlekettık qyzmet modelın, ülgısın qalyptastyru qajet. Sondyqtan uaqyt talabyna sai keletın jäne qoǧam sūranysyna jauap beretın jaŋa jūmys täsılderın engızgen jön. Memlekettık qyzmetşılerdıŋ jūmysyn şynaiy baǧalaityn naqty ölşemder boluǧa tiıs. Būl – baǧalau jüiesın ūdaiy jaŋartyp otyru qajet degen söz. Memlekettık qyzmetşınıŋ ıs jüzınde atqarǧan jūmysy mındettı türde eskerıluı kerek. Eŋ bastysy, ärbır qyzmetşı elımızdıŋ aldynda tūrǧan strategiialyq mındetterge säikes barynşa tiımdı jūmys ısteu­ge daiyn boluy qajet» dedı ­Prezident.

Būl rette IT-şeşımder arqyly memlekettık qyzmet jüiesın oŋtailandyru maŋyzdy.

«Jasandy intellekt tehnologiiasyn jäne auqymdy mälımetter qoryn, iaǧni Big Data-ny tiımdı qoldanu kerek. Zamanaui tehnologiialar arqyly halyqpen etene bailanys ornatudyŋ joldaryn jaqsartqan jön. Sebebı barlyq maŋyzdy şeşımder azamattardyŋ pıkırı negızınde qabyldanuǧa tiıs» dedı Qasym-Jomart Toqaev.

Elge qyzmet etuge daiyn bolyŋdar!

Prezident qaida jürse de, ünemı elımızdıŋ jas ūrpaǧy jönınde aitatynyn eske saldy.

«Men sızderge zor senım artamyn. Ekonomikada, memlekettık qyzmette nemese basqa sektorda jūmys ıstep jürgen jastarymyzǧa qoldau bıldıru üşın qoldan kelgennıŋ bärın jasaimyn. Sızder ömırdıŋ bazaryna endı kelgen, al bız qaityp bara jatqan adamdarmyz. Būl – qalypty dünie. Uaqyty kelgende, sızderge jol beremız. Bız zeinetke şyǧamyz, ornymyz­ǧa sızderdei jalyndy jastar keledı. Bıraq sızder tuǧan elge, Otanǧa qyzmet etuge daiyn bolularyŋyz qajet. Öitkenı kürdelı zamanǧa tap kelıp tūrmyz. Köptegen qiyndyqtardy bastan ötkerıp jatyrmyz» dedı Qasym-Jomart Toqaev.

Memleket basşysy Prezidenttık jastar kadr rezervıne ötken mamandarǧa zor jauapkerşılık jükteletının atap ötıp, olardyŋ negızgı maqsaty memleket müddesı boluǧa tiıs ekenın jetkızdı.

«Köp ūzamai memlekettıŋ igılıgı üşın eŋ jauapty şeşım qabyldaityn kezeŋge tap kelesızder. Ükımette bolsyn nemese kvazimemlekettık sektorda bolsyn, el basqaru ısıne aralasasyz­dar. Älbette, jeke sektorda da eŋbek etesızder. Sondyqtan men sızderge zor ümıtpen qaraimyn. Eŋ aldymen, osy zor jauapkerşılıktı dūrys tüsıngen abzal. Qai salada bolmasyn, negızgı maqsat memleket müddesı boluǧa tiıs. Barşaŋyzǧa mälım, men jaqynda Ükımette keŋeitılgen jiyn ötkızdım. Qazaqstannyŋ jaŋa ekonomikalyq saiasatyn jüzege asyruǧa arnalǧan naqty şaralarǧa toqtaldym. Qazır bızdıŋ aldymyzda öte auqymdy mındetter tūr» dedı Prezident.

Sonymen qatar forumda «Kazakhstan Investment Development Fund (KIDF) Management Company» institusionaldyq serıktester departamentınıŋ direktory Janar Nūrjanova, «Wand synthesis Al» maşinalyq oqytu jüiesın äzırleuşı Älıbek Sailanbaev, Aqtöbe oblysy Hromtau audanynyŋ äkımı Nūrhan Tıleumūratov, Sifrlyq damu, innovasiialar jäne aeroǧaryş önerkäsıbı ministrlıgı İnnovasiialardy damytu departamentınıŋ direktory Darhan Myrzabaev söz söiledı.