Astanada qoǧamdyq kölık tızgındegen arular sausaqpen sanarlyqtai ǧana. Solardyŋ bırı – taǧdyrdyŋ qatal synaǧyna moiymai, ömırdıŋ qiyndyqtaryna qaisarlyqpen tötep berıp, 25 jyldan berı jolauşylar tasymaly salasynda jemıstı eŋbek etıp kele jatqan elordalyq Säken Pışenbaiqyzy.
Onyŋ balalyq bal künderı Aqmola oblysynyŋ Qorǧaljyn audanyna qarasty Amankeldı keŋşary men Jūmai bölımşesınde ötedı. Bastauyşty bıtırgennen keiın audan ortalyǧynda oqyp, 7-synypty bıtırgen jyly otbasy jaǧdaiymen qalaǧa köşedı. Mūnda kelgen soŋ №4 jalǧyz qazaq mektebınde bılımın jalǧastyrady. Orta mekteptı oidaǧydai tämamdaǧanmen, qarşadai qyz-qūrbylaryna ūqsap joǧary oqu ornyna tüsuge asyqpady. Bırge tuǧan bauyrlary bolmaǧandyqtan, egde tartqan anasynyŋ densaulyǧyna alaŋdap, sol kezdegı toqyma-jıp iıru fabrikasyna jūmysqa ornalasady.
Jalǧyz perzentın betınen qaqpai ösırgenmen, anasy ony eŋbekke erte jasynan baulyp, ūqyptylyq pen adaldyqqa üirettı. Sodan bolar, Säken Pışenbaiqyzy tym pysyq bolyp boi jettı. Eş jūmysty qiynsynbady. Myltyq atu, tennis oinau sekıldı er balalarǧa tän oiyndarǧa qūmartyp, tuysqan aǧalarymen bırge şöp şauyp, K-700, ZİL aidaudy üirenedı. Fabrikada da alǧyrlyǧymen airyqşalanyp, jūmysqa endı üirenısıp kele jatqanda qiyn-qystau zaman tuyp, käsıporyn jabylyp qalady. Būl el ışınde auyrtpalyq tudyrǧan 90-jyldar bolatyn.
Sol tūsta qalada jūmys ıstep tūrǧan bırden-bır mekeme trolleibus parkı edı. Qarşadai qyz qūjatyn alyp sonda keledı. Mūnda aldymen konduktor bolyp jūmysqa ornalasqan ol köp ūzamai trolleibus jürgızudı üirenıp alady. Būl kezde qalada trolleibus jürgızuşılerı jetıspeitın. Sonda jürıp toppen bırge bılımın jetıldırıp, özı aqşasy köbırek kranşynyŋ oquyna barǧysy kelgenmen, nūsqauşysynyŋ aituymen «trolleibus jürgızuşısı» kuälıgın alyp şyǧady. Söitıp, jürgızuşı bolyp jūmys ıstep jürgende park jabylyp qalady. Qaisar qyz būl kezeŋnen de sürınbedı. Taǧy bır jyldai oquyn jalǧastyryp, V, S, D kategoriialaryn alyp, qaladaǧy №3 parkke avtobus jürgızuşısı bolyp jūmysqa ornalasady.
Sol jerde jürıp taǧdyrdyŋ ülken synaǧyna tap bolyp, qaterlı ısık diagnozy qoiylǧan soŋ mügedektıkke şyǧarylsa da, qiyndyqqa moiymai, maŋdaiǧa salǧanǧa tözıp, basynan ötkergen auyr jaǧdaidan keiın tez boiyn jinap, №1 parkke baryp, jarty kündık jūmysqa auystyrylady. Odan soŋ MAN, İVEKO, SİTELOS, URBAN avtobustarynda jürgızuşı bolǧan Säken Leib bügınde №25 elektrobusta jürgızuşı bolyp eŋbek etıp jür.
– Qoǧamdyq kölıktı tızgındeu ülken jauapkerşılık pen batyrlyqty talap etedı. 2000 jyldary alǧaş ret trolleibus jürgızdım. Būl kölık qūraly avtobusqa qaraǧanda qiyndau. Avtobusta bır-aq jol bolsa, trolleibusta aldyŋnan köz almai otyryp, töbede de joldyŋ baryn esten şyǧarmau kerek. Aspaly ekı sym şyǧyp ketken jaǧdaida, jıpten tartyp ornyna keltıretınbız. Jol qozǧalysy kezınde būrylu da oŋai emes. Äsırese taiǧaq kezderde abailamasa bolmaidy. Bırde jūmys uaqyty aiaqtalǧan soŋ avtobusty trolleibuspen şatastyryp, dizel otynyn qūiudy ūmytyp, reiske şyǧyp ketkenım bar. Jaratylysy näzık jandar üşın qoǧamdyq kölık aidaudyŋ qiyndyǧy men qyzyǧy osylaişa qatar jüredı. Avtobusym būzylyp qalǧanda ärıptesterım kömekke keletın, keide solarmen bırge mai-mai bolyp jüretın kezder esıme tüsedı. Qazır bärı artta qaldy, – dedı jürgızuşı.
Aituynşa, taŋǧy 5-ten jūmysqa şyǧady. Keide rulde äiel adamnyŋ otyrǧanyn köre tūra jol bermeitınder kezdesıp qalady. Ondaida mınez körsetıp qoiatynyn jasyrmady.
– Men aidaityn avtobusqa ülken kısıler jiı mınedı. Kölıkten tüsıp bara jatyp «öte jeŋıl ärı baiyppen jürgızedı ekensız» dep şynaiy rizaşylyǧyn bıldırıp jatady. Ondai sözderdı estıgende şattanamyn. Keide keudemdı erekşe sezım kerneidı. Jalpy men öz käsıbımdı öte jaqsy köremın. Sondyqtan bolar qiyndyqty sezbeitınım. Üirenşıktı jūmysym bolǧan soŋ, barynşa ūqypty ısteuge tyrysamyn. Jaqsy jürgızuşı kölıktıŋ aldyndaǧyny ǧana emes, artyndaǧyny jäne jan-jaǧyndaǧynyŋ bärın bırdei körıp otyruy kerek dep oilaimyn. Maqtanǧanym emes, öz basym jürıp kele jatqan kölıkke qarap jürgızuşınıŋ mınezın jazbai tanimyn, – dedı Säken Leib.
Bügınde ol – üş jien nemerenıŋ süiıktı äjesı. Qyzynan örbıgen qūlynşaqtardyŋ bolaşaǧy jarqyn, jaqsy azamat bolǧanyn körgısı keledı. Parijge bır barsam dep armandaidy. Eŋ bastysy, Astana ülgılı qalaǧa ainalyp, ondaǧy qoǧamdyq kölıktıŋ saǧat sekıldı toqtausyz jürgenın, jürgızuşılerdıŋ tärtıptı, jolauşylardyŋ meiırımdı bolǧanyn qalaidy. Jaqsy tılekter qabyl bolsa eken deimız.
