Elordadaǧy «Astana Triatlon» saiabaǧynda Memlekettık rämızder künıne orai qalalyq «Tolaǧai» alyptar saiysynyŋ jeŋımpazdary belgılı boldy, dep habarlaidy astana-akshamy.kz
Ūly Dalanyŋ batyrlaryn nasihattap, qazaqtyŋ etno-oiyndaryn därıpteu maqsatynda ötkızılgen turnirde bılegı toqpaqtai, jauyryny qaqpaqtai qalamyzdyŋ 11 sportşysy baq synady.
Bılektı batyrlar saiystyŋ 5 türı boiynşa, iaǧni 1,5 m ūzyndyqtaǧy temırdı moiynǧa salyp maiystyru, salmaǧy 100 kelılık tasty mejelı qaşyqtyqqa deiın köterıp aparu, 130 kelı auyr börenenı jelkege salyp otyryp-tūru, 200 kelılık jük artylǧan arbany süireu, on kelılık naizany qaşyqtyqqa laqtyru sekıldı erekşe saiys türlerı boiynşa synǧa tüstı.
Ūiymdastyruşylar temırden tüiın tüiıp, nar köteru – baiyrǧy ūlttyq dästürımız ekenın aitady. Jarystyŋ ūiymdastyruşysy ärı joba avtory Timur Spataev qazaq baluandaryn älemdık deŋgeige tanytu maqsatynda igı ıs-şara osymen ekınşı jyl qatarynan Astana törınde ötıp jatqanyn atap öttı.
«Tolaǧai alyptar saiysy Astana qalasynda ekınşı ret ötkızılıp otyr. Būl saiys qyrküiek aiynda ötetın V Düniejüzılık köşpendıler oiyndaryna Astana qalasy boiynşa ırıkteu kezeŋı bolyp sanalady. Qalalyq bırınşılıkter būǧan deiın Türkıstan, Almaty, Aqtau qalalarynda öttı. Endı mūndai ırıkteu aldaǧy uaqytta basqa öŋırlerde ötedı. Jarystyŋ basty maqsaty – būqaralyq sportty damytu. Alyptar saiysyna qoldau bıldırgen Astana qalasy äkımdıgıne jäne qalalyq Dene şynyqtyru jäne sport basqarmasyna alǧysymdy bıldıremın» – dedı ol.
Bes saiystyŋ nätijesı boiynşa bırınşı oryndy Mautan Jannūr ielense, ekınşı jäne üşınşı oryndardy Toqqūlov Qanat pen Şaimerden Bırjan enşıledı. Aldaǧy respublikalyq turnirde Astana qalasynyŋ namysyn Mautan Jannūr qorǧaidy.
Aita keteiık, jalpy jülde qory bır million teŋgenı qūraityn turnir Astana qalasy äkımdıgınıŋ qoldauymen öttı.
