Qalibek Quanyşbaev atyndaǧy memlekettık akademiialyq qazaq muzykalyq-drama teatrynda erteŋ körnektı teatr jäne kino akterı, Qazaqstannyŋ eŋbek sıŋırgen ärtısı Asylbolat Smaǧūlovtyŋ «Tüs. ūiqysyz tünder» performans körmesı ötedı.
– Şedevrler jazyp, käsıbi suretşılermen bäigege tüsetın oidan aulaqpyn. Ne sosializm, ne kapitalizm emes, qazırgı bızdıŋ qoǧam siiaqty, menıŋ de jūmystarym primitivizm men realizmnıŋ arasynda adasyp jürgen «izmderdıŋ» bırı bolar. Bügınde aty älemge äigılı suretşı Van Gog marqūm közı tırısınde bırde-bır kartinasyn sata almai, bar ömırı joqşylyqta ötken ǧoi. Al qazır onyŋ bır «Künbaǧystary» pälen million dollar! Sol siiaqty bızdıŋ suretter de bır zamandarda baǧalana jatar, – deidı körme iesı.
A.Smaǧūlov Qūrmanǧazy atyndaǧy konservatoriiany bıtırıp, «drama akterı» mamandyǧyn alyp şyqqannan keiın eŋbek jolyn Torǧai oblysynda bastap, keiın Astanadaǧy Q.Quanyşbaev atyndaǧy drama teatrynda jalǧastyrǧan. «Qyz Jıbek» spektaklınde Bekejan rölın somdaǧany üşın «QR eŋbek sıŋırgen ärtısı» ataǧyna ie bolǧan. Tbiliside ötken halyqaralyq jastar teatrlary festivalınıŋ diplomanty atanǧan. Orta Aziia men Qazaqstan teatrlarynyŋ halyqaralyq baiqauynda gran-pri jeŋıp alǧan. «Apiyn», «Ūmytpa menı», «Köşpendıler», «Bırjan sal», «Elım-ai», «Qazaq handyǧy» filmderınde basty jäne qosalqy rölderdı beinelegen. Belgılı teatr synşysy Äşırbek Syǧai «Mūzbalaq qaraqşy, qarajürek käzzap Bekejandy säl-päl süikımdılıkke süirelegen, onyŋ sūsty jüzıne az-kem qan jügırtken Alaş akterı Asylbolat Smaǧūlov boldy» dese, Qazaqstannyŋ Halyq jazuşysy Säken Jünısov «Qyz Jıbektegı» «Asylbolat-Bekejan» – qazaq teatry sahnasyndaǧy ülken qūbylys» ekenın atap körsetken.
