Astana qalasynyŋ äkımı Jeŋıs Qasymbek Instagram paraqşasynda magistraldyq kärız kollektorynyŋ qūrylysy jürıp jatqanyn mälım ettı, dep habarlaidy astana-akshamy.kz
«Qūrmettı tūrǧyndar! Özderıŋız bıletındei, 21 aqpannan bastap bız Tūran daŋǧylyndaǧy (Orynbor men Baǧlanova köşelerınıŋ arasy) uchaskenıŋ bır bölıgın uaqytşa japtyq. Qazır mūnda magistraldyq kärız kollektorynyŋ qūrylysy boiynşa jūmys jürgızılıp jatyr. Būl nysannyŋ qalaǧa qanşalyqty maŋyzdy ekenın qysqaşa aityp öteiın.
Qazırgı uaqytta qalanyŋ sol jaǧalau bölıgınıŋ şaruaşylyq-tūrmystyq suy Mäŋgılık el daŋǧyly, Kerei Jänıbek handar köşesı jäne Tūran daŋǧyly arqyly ötetın magistraldy kollektordyŋ kömegımen aǧyzylady. Kollektor 16 jyl būryn salynǧan. Onyŋ ūzyndyǧy – 6 km.
Qalanyŋ damuy jäne aǧyndy sulardyŋ kölemı ūlǧaiǧany eskerılıp, kollektor öz mümkındıgınıŋ şegınde jūmys ısteidı.
Kollektorǧa tüsetın jüktemenıŋ artuyna bailanysty jūmysynda üzılıster bolady, al avariialyq-qalpyna keltıru jūmysy kütken nätijenı bermei otyr.
Elordanyŋ däl osy audanynda aǧyndy sulardy aǧyzudyŋ özge joly joq. Al qoldanystaǧy qūbyrdy odan ärı paidalanudyŋ saldarynan aǧyndy su jer betıne köterılıp, bırqatar köşenı basyp qaluy mümkın. Sol siiaqty tehnogendık, ekologiialyq sipattaǧy jaǧymsyz saldarǧa äkeluı mümkın.
Şaruaşylyq-tūrmystyq sudy aǧyzu üşın arnaiy joba äzırledık jäne osy aida Tūran daŋǧylyndaǧy magistraldyq kärız kollektorynyŋ qūrylysyn bastadyq. Onyŋ ūzyndyǧy – şamamen 8 km. Aiaqtalu merzımı – 9 nauryz. Qūrylys qarqynyn jyldamdatudy jäne merzımınen būryn jol qozǧalysyn qamtamasyz etudı tapsyrdym», – dep jazdy Jeŋıs Qasymbek.
