Bügın – halyqaralyq volonterler künı. Soŋǧy jyldary elımızde erıktıler qozǧalysy qarqyndy damyp keledı. Äsırese, jastardyŋ volonterlık qyzmetke qyzyǧuşylyǧy arta tüsken. Astana qalasynda bügıngı taŋda 50-ge juyq volonterlık ūiym jūmys ısteidı.
BŪŪ Bas assambleiasynyŋ bastamasymen jyl saiyn 5 jeltoqsanda Halyqaralyq volonterler künı atap ötıledı. Bügınde elımızde qarqyndy türde damyp, memlekettık deŋgeide män berılıp kele jatqan volonterlık qyzmetke jastar köp qyzyǧady. Äsırese bas qalada erıktı türde Astananyŋ ruhani damuyna, örkeniettı orta qalyptastyruda jaqsylyq jasap jarysyp jürgen elordalyq erıktılerdıŋ erlıgı erekşe. Qalada jalpy sany 50-ge juyq volonterlık ūiym men qozǧalys jūmys ısteidı.
Damyǧan ärı damuşy memleketterde jastardyŋ äleuetı memlekettık ıs-şaralar men qoǧamdyq jūmystarǧa belsendı paidaǧa asady. Kei elderde volonterlık qozǧalystyŋ damyǧany sonşalyq, tıptı volonterlık korporasiialar qūrylyp, közdegen maqsattarǧa tez ärı oŋai jetuge mümkındık beredı. Halyqaralyq täjıribe bırqatar elderde volonterlık qozǧalys jastar üşın naqty äleumettık lift bolǧanyn körsettı. Bızdıŋ de öz elımızde osyndai jaǧdai jasauǧa tiıs ekenımız – uaqyt talaby.
Qoǧamda belsendı azamattar bastamaşyl toptarǧa jinalyp nemese ükımettık emes ūiymdarǧa qosyla otyryp, balalar üilerıne, arnaiy medisinalyq mekemelerge nemese mūqtaj jandarǧa erıktı türde kömektesedı. Qart adamdardyŋ üiınde tazalau, jinau jūmysyn jürgızıp, jasyl ekologiiaǧa atsalysyp, tazalyqty saqtauǧa, aǧaş otyrǧyzuǧa belsendı qatysatyn toptar da bar. Aǧartuşylyq, salauatty ömır süru baǧytynda da qyzmet etetın qozǧalystar jeterlık.
Al jastarǧa tegın jūmys ısteu ne üşın qajet? Ädette erıktılerdıŋ belgılı bır äleumettık nemese qoǧamdyq mındetı bolady. Jastar mūndai auqymdy ıs-şaralarǧa ärine, qyzyǧuşylyq tanytu arqyly ǧana jūmylady. Köbıne köp erıktıler ırı sporttyq, būqaralyq oqiǧalarǧa, mügedek jandarǧa kömek qolyn sozu, jastarǧa arnalǧan festivalder syndy ıs-şaralarǧa qatysady. Olar osy volonterlık arqyly qoǧamdaǧy türlı qyzyqty oqiǧalarǧa kuä bolady. Odan bölek turister, jaŋa tanystar, konsertter men qoiylymdardy tegın köru, oqiǧa ortasynda jürıp, bärınen habardar bolu, tegın tamaqtanu syndy faktorlar jastardy qyzyqtyrsa, äleumettık ıs-şaralarda studentter, jasöspırımder jürek qalauymen, mūqtaj adamǧa qol ūşyn sozu maqsatynda atsalysady.
Qaiyrymdylyq jasau üşın qaltaŋnyŋ qalyŋ boluy mındettı emes. Ol üşın jüregıŋ keŋ bolsa, jetkılıktı. Qazırgı kezde eŋbek etıp, tapqanymen bölısıp, jomarttyq tanytyp jürgen otandastarymyz barşylyq. Bas qaladaǧy volonterlık ūiymdar men qozǧalystar arasynda äleumettık osal otbasylarǧa qoldau körsetetın «Klub dobriakov Astany» siiaqty köşbasşylarmen tiımdı jūmys jolǧa qoiyldy. «Volontery Astany LIDER.KZ» joǧalǧan adamdardy ızdeu üşın qūqyq qorǧau organdarymen yntymaqtasyp jūmys ıstep jür. Sonymen qatar «Bız taza el üşın» qozǧalysy ekologiia mädenietın nasihattaidy. Al «Astana jastary» jastar resurstyq ortalyǧy bazasynda törtınşı jyl Volonterler jyly şeŋberınde jäne 2021-2023 jylǧy volonterlıktı damytudyŋ Jol kartasyn oryndau aiasynda qalalyq volonterler ştaby jūmys ısteidı. Tūraqty türde 30 volonterlık ūiymmen jäne 20 bastamaşyl toppen, 4 ÜEŪ-men bırlese qyzmet atqaruda. Ştabta 5 myŋnan asa belsendı volonter bar.
«Astana jastary» jastar resurstyq ortalyǧy volonterler qozǧalysyn damytu bölımınıŋ mamany Aizat Äli ūiym qūrylǧaly berı volonterlık qyzmettı damytuǧa, jastar arasynda volonterlerdı oqytuǧa jäne resurstyq kömek körsetuge basymdyq beretının aitady.
– Qoǧamnyŋ ılgerıleuın volonterlık qozǧalystyŋ belsendılıgınen baiqauǧa bolady. Soŋǧy jyldary jas buyn osy qyzmetke qyzyǧyp, öz erkımen erıktıler qataryna qosylyp jatady. «Astana jastary» volonterlık qozǧalysyndaǧy volonterlerdıŋ ortaşa jasy 15-16 jasty qūraidy. Būl – jastar uaqytty paidaly ötkızuge, jaŋa dos, tyŋ äser aluǧa jäne qorşaǧan ortaǧa qolǧabys körsetuge tyrysatyn kezeŋ. Al qalalyq volonterler ştaby jobasyndaǧy volonterlerdıŋ ortaşa jasy 30-dan bastalady. Mūndaǧy volonterler sanaty qoǧamǧa kömektesu, tabiǧatty qorǧauǧa jūmylady. Negızınen, mekteptıŋ joǧary synyp oquşylary, kolledj, universitet studentterı imidjdık ıs-şaralardy ūiymdastyruǧa dem beredı.
Volonter bolǧysy keletınder sany artyp keledı. Bırı şyn peiılımen özgelerge kömekteskısı keledı, endı bırı jaŋa orta tabuǧa ūmtylady, uaqytyn tiımdı ötkızgısı keledı. Jastar event-volonterlık, äleumettık volonterlık, eco-volonterlık jäne adamdardy ızdeu sekıldı bırneşe baǧytta jūmyldyrylady. Dälırek aitqanda, event baǧyty halyqaralyq deŋgeidegı jiyndarǧa arnalsa, keiıngısınde jastar äleumettık maŋyzy bar bastamalarda qyzmet etedı. Al eco bölımınıŋ erıktılerıne tabiǧatty aialap, qorşaǧan ortany qorǧau mındetı tapsyrylady. Iz-tüssız joǧalǧan jandardy da tabuǧa kömektesedı» dedı volonter.
Bügıngı taŋda volonterlık ūiymdarmen bırlesıp «BizBirgemiz», «Qauıpsız qala», «Qamqorlyq mekenjailary», «Ardagerlerdı ardaqtaiyq», «Taza Alem» jäne t.b. jobalar aiasynda 1000-nan astam aksiia ötkızıldı. Astanalyq erıktıler qalalyq jäne respublikalyq deŋgeide ǧana emes, halyqaralyq ıs-şaralardan da qalys qalmaidy. Mäselen, forum, konsertterde audarmaşy, gid, ūiymdastyruşy, top imidjı, taǧy basqa da pozisiialarda jürıp qolǧabys etedı. El basyna kün tuyp, tötenşe jaǧdai bola qalsa, ünemı bır jaǧadan bas, bır jeŋnen qol şyǧaryp bırınşı bolyp järdemdesedı. Sondai-aq Polisiia departamentı, TJD-men bırlesıp gazdandyru turaly halyqty aqparattandyru, jylytu mausymy men köktemgı su tasqyny kezındegı qauıpsızdık şaralary, şomylu mausymyndaǧy mınez-qūlyq erejelerı, halyq sanaǧy mäselesı boiynşa halyqqa aqparattyq-tüsındıru jūmystaryn tūraqty negızde jürgızedı jäne esırtkı satu turaly mälımetterı bar qabyrǧalardy boiauǧa kömektesedı.
Jas talǧamaityn qyzmet ülkenge qūrmet, kışıge ızet körsetudı belsendı nasihattaidy. Erıktı qyzmet bolǧanymen, volonterlerge de talap qoiylady. Volonterlık qozǧalysqa qosylǧysy keletınder adamǧa ruhani jäne materialdyq ziianyn tigızbeuı tiıs. Halyqaralyq deŋgeide ötetın jobaǧa volonter şet tılın bılgenıne maŋyz berıledı. Volonterlık qyzmettı jüzege asyratyn adam köpşıl, qarapaiym, adamdarmen tez tıl tabysatyn bolǧany jaqsy.
P.S: Adamgerşılıkke negızdelgen janaşyr ıster elordanyŋ kelbetın jaqsartatyny sözsız. Elde volonterlık qyzmettı aqysyz jūmys demei, abyroily mındet, jaŋa bastamaǧa jol aşatyn qadam dep qaraityn jastardyŋ qatary köbeiıp keletını quantady.
