Keşe elordadaǧy Köktal şaǧyn audanynda №24 mamandandyrylǧan ört söndıru bölımı aşyldy. Saltanatty aşylu jäne kılttı tabystau räsımıne Tötenşe jaǧdailar ministrı Şyŋǧys Ärınov, Astana qalasynyŋ äkımı Jeŋıs Qasymbek, Astana qalasy mäslihatynyŋ töraǧasy Erlan Kanalimov, azamattyq qorǧau organdarynyŋ ardagerlerı, elordalyq TJD basşylyǧy men jeke qūramy qatysty. Jergılıktı atqaruşy organdardyŋ qoldauymen salynǧan jaŋa ekı qabatty ört söndıru bölımınıŋ jalpy aumaǧy ekı gektardy qūraidy.
Jaŋa ört söndıru deposynda negızgı jäne arnaiy maqsattaǧy segız bırlık tehnika bar, būl – avtosisterna, jyldam äreket etetın avtokölık, biıktıgı 32 metr avtosaty.
Ört söndıru bölımınıŋ negızgı ǧimaratynda şyǧuǧa arnalǧan 4 boks, qyzmettık bölmeler, keŋes zaly, oqu mūnarasy, sport jäne oiyn alaŋy ornalasqan. Sondai-aq depo aumaǧynda elordalyq garnizon qyzmetkerlerı üşın 18 qyzmettık päterge arnalǧan jataqhana qarastyrylǧan.
Ört söndıru bölımımen tanysu barysynda şaqyrylǧan qonaqtar, azamattyq qorǧau organdarynyŋ ardagerlerı bölımnıŋ formuliaryna estelık jazba qaldyrdy.
Bügınde Astana qalasynyŋ ört qauıpsızdıgı 16 bölımşenıŋ küşımen qamtamasyz etıledı. Ört söndıru qyzmetınıŋ ielıgınde 200-den astam ört söndıru avtotehnikasy bar, kün saiyn jeke qūramnyŋ 250-ge juyq qyzmetkerı täulıktık kezekşılıkke tüsedı.
