Prezident Qasym-Jomart Toqaevtyŋ töraǧalyǧymen Işkı ıster ministrlıgınıŋ keŋeitılgen alqa otyrysy öttı. Jiynǧa Prezident Äkımşılıgı men memlekettık organdardyŋ basşylyǧy, öŋırlerdıŋ äkımderı, IIM alqa müşelerı, ortalyq apparattyŋ basşylyq qūramy jäne aumaqtyq polisiia departamentterınıŋ jetekşılerı qatysty.
Qūqyqtyq sauatty arttyraiyq
Memleket basşysy elımızde «Zaŋ jäne Tärtıp» qaǧidatyn bırjola ornyqtyruda polisiia airyqşa röl atqaratynyn atap öttı.
«Qylmyspen küresu jäne qoǧamdyq tärtıptı saqtau – asa maŋyzdy mındet. Būl – jauapkerşılıgı öte ülken jūmys. Elımızdıŋ ärbır azamaty özın qauıpsız sezınuge tiıs. Ol üşın qūqyq qorǧau jüiesı üilesımdı ärı tiımdı jūmys ısteuı qajet. Eŋ aldymen, memlekette zaŋ talaptary mültıksız oryndaluy kerek. Zaŋ būzǧan kez kelgen adam jazasyn aluǧa tiıs» dedı Prezident.
Qasym-Jomart Toqaevtyŋ pıkırınşe, qūqyqtyq sauattyŋ tömen boluy jaǧymsyz ürdısterdıŋ beleŋ aluyna äkep soqtyrady.
«Onyŋ bärı, tüptep kelgende, elımızdıŋ damuyn tejeidı, memlekettıŋ abyroiyna nūqsan keltıredı. Qoǧamdyq jerlerdegı vandalizm – sonyŋ aiqyn körınısı. Halqymyzdyŋ dünietanymyna jat ideologiia da elımızge zor qauıp töndıredı. Äsırese, jas ūrpaq jasandy ideialar men «jalǧan batyrlardyŋ» jetegıne ılesıp ketuı mümkın. Äleumettık jelıde jastardy zaŋsyz ıs-äreket jasauǧa şaqyratyn materialdar taraluda. Tıptı, zaŋ būzǧan adamdardy ülgı etıp körsetetınder bar. Bızdıŋ azamattarymyz kez kelgen zaŋsyzdyqqa qarsy boluy kerek, iaǧni bızge zaŋ būzuşylyqqa tötep beretın myqty immunitet qajet. El ışıne ırıtkı salatyn, qauıp töndıretın äreketterdı aqtauǧa qataŋ tosqauyl qoiu kerek. Qūqyqtyq nigilizmge, iaǧni zaŋ üstemdıgın joqqa şyǧaruǧa jol berılmeuge tiıs. Zaŋǧa degen qūrmet adal azamatqa tän qasiettıŋ bırı retınde därıpteluı qajet. Būl – memlekettık organdarǧa ǧana emes, barşa halyqqa ortaq mındet. Qysqasy, zaŋ men tärtıptıŋ üstemdıgın qamtamasyz etu – Ädılettı Qazaqstandy qūrudyŋ basty şarty» dedı Qasym-Jomart Toqaev.
Qylmystyŋ aldyn alu nege tiımdı emes?
Memleket basşysy qūqyq qorǧau organdary qūqyq būzuşylyqtyŋ aldyn alu mäselesıne basa män bergenı jön dep sanaidy.
«Qylmystardyŋ negızgı sebebı köbıne qoǧamǧa jat äreketterden tuyndaidy. Sondyqtan zaŋdy būzuǧa beiım azamattarmen jüielı jūmys jürgızu maŋyzdy. Sondai-aq olardyŋ qoǧamdyq tärtıpke qaişy ısterıne türtkı bolatyn alǧyşarttardy tügel joiu qajet. Bıraq bügınde qylmystyŋ aldyn alu şaralary tiımdı jürgızılıp jatqan joq. Mūny moiyndau kerek. Sondyqtan jüienı tübegeilı jaŋartu qajet. Osy rette qauıptı toptarǧa jatatyn azamattardyŋ basym bölıgı nazardan tys qalyp qoiady. Al keibır aldyn alu şaralary şekteu-mäjbürleuden ärı aspaidy. Mūndai jūmystar jergılıktı jerlerde jüiesız jürgızılıp jatyr. Naqty üilestıru tetıkterı joq. Qūqyq būzuşylyqtyŋ aldyn alu salasynda bıryŋǧai zaŋ äzırleitın uaqyt jettı. Zaŋ jobasynda profilaktikadan ötetın azamattar tızımın tolyqtai qaita qaraǧan jön. Jauapty organdardyŋ qūzyretterın, üilestıru tetıkterın, jeke profilaktika qūraldaryn naqtylau qajet» dedı Prezident.
Qasym-Jomart Toqaev mūnyŋ, äsırese, tūrmystyq zorlyq-zombylyqqa qarsy küreste maŋyzy zor ekenıne senımdı. Onyŋ aituynşa, būl jerde aldyn alu jūmystarynyŋ maŋyzy jedel äreket etu jäne ädıl jazasyn beru ısınen kem emes.
«Özderıŋızge mälım, būǧan deiın mūndai qylmystar üşın jauapkerşılıktı küşeitudı qoldaitynymdy aitqan edım. Qylmystyq kodekske engızılgen tiıstı tüzetuler jaqyn arada qabyldanady. Işkı ıster ministrlıgı öz qyzmetkerlerın jaŋa jūmys täsılıne köşuge aldyn ala daiyndauy kerek. Qūqyq qoldanu täjıribesındegı būǧan deiın bolǧan barlyq mäselenı eskeru qajet. Būdan bölek, kämeletke tolmaǧan azamattardyŋ qūqyǧyn qorǧau jüiesın jaŋǧyrtu – öte özektı mäsele. Ükımet azamattyq qoǧam instituttary men sarapşylardy tarta otyryp, būl jūmysqa mūqiiat qarauy kerek» dedı Memleket basşysy.
Polisiia tübegeilı özgeruı tiıs
Prezidenttıŋ aituynşa, polisiianyŋ servistık modelınıŋ negızgı qaǧidattaryn ıs jüzınde jüzege asyru qajet. Būl, eŋ aldymen, qoǧamnyŋ talap-tılegıne qūlaq asyp, şūǧyl äreket ete bılu degen söz.
«Halyqqa yntymaqtastyqtyŋ özara tiımdı formasyn ūsynyp, kerı bailanystyŋ oŋtaily joldaryn retteu maŋyzdy. Bastamaşyl jäne zaŋǧa qaişy äreketterge bei-jai qaramaityn azamattarǧa arqa süieu qūqyq būzuşylyqtarǧa müldem tözbeuşılık qaǧidatynyŋ ıs jüzınde saqtaluyna mümkındık beretınıne senımdımın» dedı Qasym-Jomart Toqaev.
Sonymen qatar Memleket basşysy qoǧammen bırge polisiia da tübegeilı özgeruge tiıs ekenın aitty.
«Polisiia qaşanda halyqqa ülgı-önege boluy kerek. Sonda ǧana jūrt polisiiaǧa senedı, ony qorǧan köredı. Ökınışke qarai, tärtıp saqşylarynyŋ bärı bırdei sondai dep aita almaimyz. Auyr qylmys jasaǧan qyzmetkerler anyqtalyp jatyr. Soŋǧy kezde mūndai oqiǧalar jiılep kettı. Būǧan jol bermeuımız kerek jäne ondai äreketterdı müldem aqtauǧa bolmaidy. Osyndai jaǧdailar bükıl jeke qūramnyŋ jūmysyn bır sätte joqqa şyǧarady. Ondai adamdardy polisiia qatarynan şyǧaru qajet. Olar bilıktıŋ abyroi-bedelın tüsıredı. Qyzmetkerlerın der kezınde tärtıpke salmaǧan basşylar mäselesın de qarau kerek» dedı Prezident.
Alqa otyrysy barysynda Qasym-Jomart Toqaev orta buyndaǧy basşylyq qūramdy biyl kezekten tys attestasiiadan ötkızu turaly Işkı ıster ministrınıŋ ūsynysyn qoldady.
«Ministrlık osy synaq kezınde tabandylyq tanytuǧa tiıs. «Barmaq basty, köz qysty» bolmauy kerek. Alaida attestasiia bıreuden ese qaitarudyŋ qūraly bolmauǧa tiıs. Basty maqsat – jeke qūramdy bılıksız jäne jūmysyna adal emes basşylardan tazartu, iaǧni käsıbi kadr rezervın jasaqtau. Sonda ǧana ahualdy tübegeilı özgerte alamyz. Prezident Äkımşılıgı būl jūmysty baqylauda ūstaidy» dedı Memleket basşysy.
Bala qauıpsızdıgı – basty nazarda
Prezident balalardyŋ qauıpsızdıgın qamtamasyz etu mäselesıne airyqşa nazar audardy. Atap aitqanda, byltyr kämeletke tolmaǧandarǧa qarsy jasalǧan qylmys sany 22 paiyzǧa artqan. Memleket basşysynyŋ pıkırınşe, osy baǧytta aldyn alu jūmystaryn küşeitu qajet. Polisiia mektep basşylyǧymen bırlese jūmys atqaruǧa tiıs.
«Jas ūrpaqtyŋ taǧdyry, ömırı men densaulyǧy bärınen maŋyzdy. Ükımetke balalardy zorlyq-zombylyqtan qorǧau mäselesın mūqiiat saralap, naqty şaralar qabyldaudy tapsyramyn. Jasöspırımder bos jürmeuge tiıs. Olardyŋ şyǧarmaşylyqqa, sportqa qyzyǧuşylyǧyn arttyru jaǧyna köbırek köŋıl bölu qajet. Balalardy eŋbekke baulyp, volonterlık qyzmetke jūmyldyrǧan abzal. Közboiauşylyq üşın jasalatyn jūmysty doǧaru kerek» dedı Memleket basşysy.
Közboiauşylyq üşın jūmys ısteudı doǧaru kerek
Būdan bölek, Prezident esırtkınıŋ taraluyna batyl türde tosqauyl qoiudy talap ettı.
«Men bırneşe ret osy mäselege qatysty tapsyrma berdım. Alaida auyz toltyryp aitatyn nätije joq. Sintetikalyq esırtkınıŋ qoljetımdılıgı jäne onyŋ barynşa tez taraluy jastar arasynda naşaqorlyqtyŋ beleŋ aluyna äkep soqtyrady. Olarǧa naşaqorlyqtyŋ qanşalyqty qaterlı ekenın ünemı tüsındırıp otyru qajet. Polisiia esırtkı öndıru, ony satu jäne taratuǧa qarsy belsendı küres jürgızuı kerek. Nauqanşyldyq, közboiauşylyq jäne statistika üşın jūmys ısteu degendı toqtatu qajet» dedı Qasym-Jomart Toqaev.
Sonymen qatar kiberqylmyspen jäne internet-alaiaqtyqpen küres şaralaryn küşeitu jönınde tapsyrma berıldı.
«Ūrylar men banditter türmede otyruy kerek. Būl – sızderdıŋ kriminalǧa qarsy äreketterıŋızdıŋ bırden-bır maqsaty. Qylmystyq toptarmen ymyrasyz küresu – sızderdıŋ tıkelei mındetterıŋız ärı qyzmettık boryştaryŋyz» dedı Memleket basşysy.
Qasym-Jomart Toqaev jazasyn ötep jatqandardyŋ negızgı qūqyqtaryn saqtau maŋyzdy ekenın atap öttı. Onyŋ pıkırınşe, abaqty degenımız aiypty adamdy jazalau orny ǧana emes, adamnyŋ qaitadan qylmys jasauyna jol bermeitın mekeme boluǧa tiıs.
Adal qyzmetkerdı laiyqty baǧalaiyq!
Sonymen bırge Prezident qūqyq qorǧau organdarynyŋ qyzmetı halyq arasynda bükıl memlekettık jüienıŋ bet-beinesı turaly tüsınık qalyptastyrady dep sanaidy.
«Bız özderınıŋ qyzmettık mındetterın adal atqaryp jürgen poliseilerdı eskerusız qaldyrmauymyz kerek. Äsırese olardyŋ naǧyz erlık ısterın (al mūndai jaǧdailar az emes), jūmysyn laiyqty baǧalap, eŋ joǧary nagradalarmen marapattauymyz qajet. Käsıbilık, jauapkerşılık tanytqan, erlık körsetken naqty jaǧdailardy ülgı etu, ışkı ıster organdary qyzmetınıŋ tiımdılıgın arttyru arqyly polisiianyŋ oŋ imidjın qalyptastyru maŋyzdy» dedı Memleket basşysy.
Alqa otyrysy barysynda Işkı ıster ministrı Erjan Sädenov qylmysqa, tūrmystyq zorlyq-zombylyqqa, jasöspırımder arasyndaǧy qylmysqa, internet-alaiaqtyqqa qarsy küres jäne onyŋ aldyn alu şaralary men jürgızılıp jatqan jūmystar, sondai-aq ışkı ıster organdary qyzmetınıŋ tiımdılıgın arttyru mäselesı turaly esep berdı.
