Astananyŋ Almaty, Baiqoŋyr, Esıl, Nūra jäne Saryarqa audandarynda Halyqaralyq balalardy qorǧau künınde taǧy 20-dan astam aula men qoǧamdyq keŋıstık aşyldy. Bügıngı taŋda bas qalany jüielı deŋgeide abattandyru jalǧasuda. Būl rette Astana äkımı Jeŋıs Qasymbek qoǧamdyq keŋıstıkter qatary köbeiıp, aǧaştar otyrǧyzu, baqtarda jügıruge arnalǧan jolaqşalar men velojoldardy jaŋartu, jaryqtandyrudy qalpyna keltıru jäne t. b. jūmys jürıp jatqanyn aita kele, biyl elordada 170 qoǧamdyq keŋıstık pen aula aumaǧyn abattandyrudyŋ josparlanyp otyrǧanyn jetkızgen bolatyn. Būl jūmys qalanyŋ barlyq bes audanyn, onyŋ ışınde eldı mekenderdı de qamtidy.
7 aula paidalanuǧa berıldı
Almaty audanynyŋ aumaǧynda biyl 50 aulany abattandyru közdelıp otyr. Sondai-aq, taǧy 100 aulada jöndeu-qalpyna keltıru jūmysyn jürgızu josparda bar.
«Halyq qatysatyn biudjet» baǧdarlamasy aiasynda balalar merekesı künı Mailin 8, Küişı Dina 44/1, Abylai han 25, Jūmabaev 12a jäne Müsırepov 6/1, 6/2, 6/3 mekenjailary boiynşa abattandyrylǧan 7 aula paidalanuǧa berıldı. Aulalardyŋ aşylu saltanatynda öskeleŋ ūrpaqqa arnalǧan konserttık baǧdarlama ūiymdastyrylyp, animatorlar balaqailarǧa köterıŋkı köŋıl-küi syilady. Būl aumaqtarda şaǧyn säulet nysandaryn, balalar oiyn keşenderın ornatu, aldyŋǧy baqtardy, oiyn alaŋdaryndaǧy jabyndardy auystyru, futbol jäne basketbol alaŋdaryn jöndeu, sondai-aq jaŋa sport alaŋdary men tūraq aimaqtaryn aşu sekıldı auqymdy jūmystar jürgızıldı. Sonymen qatar, qala tūrǧyndarynyŋ jailylyǧy üşın oryndyqtar men qoqys jäşıkterı ornatyldy.
Audan äkımdıgı baspasöz qyzmetınıŋ habarlauynşa, būl jobanyŋ erekşelıgı qos ätkenşek, teŋgergış ätkenşek, karusel jäne t.b. ūlttyq stil elementterı bar şaǧyn säulet nysandaryn ornatu boldy. Öz kezegınde būl qala infraqūrylymyn damytudaǧy bıregei qadam jäne Almaty audanynyŋ tūrǧyndaryna arnalǧan demalys üşın jaŋa mümkındıkter tuǧyzdy.
Aula aumaqtaryn abattandyrumen qatar, 3 qoǧamdyq keŋıstıktı abattandyru jūmysy da jürgızılıp jatyr. Täuelsızdık daŋǧylynyŋ jaiau jürgınşıler bölıgın damytu maqsatynda Aqbūlaq özenınıŋ jaǧalauynan B.Momyşūly daŋǧylyna deiıngı jaiau jürgınşıler bölıgın jailastyrylyp, daŋǧyl kögaldandyryldy jäne jaryqtandyryldy. Täuelsızdık daŋǧyly boiynda mügedekter arbasyna taŋylǧandar üşın kedergısız orta qūrylady. Jaiau jürgınşılerge qolaily jaǧdai jasau üşın köleŋkelı şatyrlar jasau da nazarǧa alynǧan. Sonymen bırge T.Jürgenov köşesın abattandyru arqyly Ainaköl köşesınen J.Näjımedenov köşesıne deiıngı jaiau jürgınşılerge arnalǧan demalys aimaqtaryn jailastyra otyryp, jaiau jürgınşıler bölıgın jöndep, abattandyru jäne köşelerdı jaryqtandyru jūmystary jürgızılude. Būl aumaqqa 6 myŋnan astam aǧaş jäne 44 myŋ būta otyrǧyzu josparlanyp otyr. Aqbūlaq özenınıŋ jaǧalauyn abattandyru maqsatynda Abylai han daŋǧylynan Amman köşesıne deiıngı qoǧamdyq keŋıstıktı abattandyru jūmystary jürgızılude.
Qoǧamdyq keŋıstıkter qatary köbeidı
Baiqoŋyr audanynyŋ aumaǧynda ornalasqan Bögenbai batyr daŋǧyly 54, Abai daŋǧyly 71 jäne Respublika daŋǧyly 10, 10/1 mekenjailaryndaǧy aula aumaqtary tūrǧyndar igılıgıne tapsyryldy.
Abai daŋǧyly 71 meken- jaiynda 13 jyldan berı abattandyru jūmystary jürgızılmegen. Aǧymdaǧy jyly osy üidıŋ tūrǧyndary «Halyq qatysatyn biudjet» jobasy arqasynda öz aulalaryn abattandyruǧa qatysuǧa mümkındık aldy.
Aulalardyŋ aşyluy saltanatty türde atalyp öttı. Barlyq aula aumaqtarynda kışkentai tūrǧyndar üşın futboldan turnir ötkızıldı. Üzdık oiynşylar men komandalarǧa arnaiy syilyqtar jäne diplomdar tabystaldy. Sondai-aq, türlı animatorlardyŋ qatysuymen oiyn-sauyq baǧdarlamalary ūiymdastyrylyp, ıs-şaraǧa qatysqan tanymal elordalyq sportşylar balalar men tūrǧyndardy merekemen qūttyqtady.
Biyl audanynda barlyǧy 44 aula aumaǧy, 6 qoǧamdyq keŋıstık jaŋadan abattandyrylady. Būdan bölek, 70 aula aumaǧynda jöndeu-qalpyna keltıru jūmystary jürgızıledı. Būl audanda ötken jyly auqymdy abattandyru jūmystary jürgızılgen bolatyn. Onyŋ aiasynda barlyǧy 11 qoǧamdyq keŋıstık jailastyryldy.
4 joba ıske asyrylady
Esıl audanynyŋ «Prigorodnyi» tūrǧyn alabyndaǧy Qabanbai batyr daŋǧyly, 105 jäne Qabanbai batyr daŋǧyly, 105 «A» mekenjailarynda abattandyrylǧan ekı aula aumaǧynyŋ saltanatty aşyluy öttı. Balalardy qorǧau künıne orai, kışkentai qonaqtar üşın konserttık baǧdarlama ūiymdastyrylyp, animatorlar şaqyryldy. Is-şaraǧa «Prigorodnyi» tūrǧyndary qatysty. Aulalarda keşendı abattandyru jūmystary jürgızıldı, şaǧyn arhitekturalyq formalar qoiyldy. Jerge tartan jäne asfalt jabyny töseldı, ätkenşekter, karuselder, eŋ kışkentai büldırşınderge qūmsalǧyştar, al eresekterge sporttyq trenajerler ornatyldy. Aulalarda oryndyqtar men qoqys jäşıkterı de qoiyldy.
Biyl taǧy 7 aulada jöndeu jäne qalpyna keltıru jūmystary jürgızıldı. Kei aulalardyŋ sporttyq alaŋdaryna jaŋa tartan töselse, keibırınde balalar oiyn alaŋdary boialyp, qiraǧan oryndyqtary auystyryldy. Sondai-aq, biyl «Halyq qatysatyn biudjet» jobasy aiasynda audanda 4 aula qaita jöndeuden ötıp, tolyqtai jaŋartylatyn bolady. Jalpy osy joba boiynşa Esıl audany tūrǧyndarynan 30 ötınış qabyldanǧan edı. Onyŋ 11-ı Erejege säikes, dauys beruge jıberılıp, nätijesınde, eŋ köp dauys jinaǧan 4 joba biyl ıske asyrylady. Olar: Almaty köşesı, 13 üi nemese «Otandastar» tūrǧyn üi keşenı tūrǧyndarynyŋ «Otandastar TK aulasyn abattandyru» jobasy; Saraişyq köşesı, 5/1 üi tūrǧyndarynyŋ «Balalar alaŋy men aula aumaǧyn qaita qūru» jobasy; Qabanbai batyr daŋǧyly, 42 üide ornalasqan «İnfiniti-2» TK tūrǧyndarynyŋ «Baqytty balalyq şaq» jobasy jäne Qabanbai batyr daŋǧyly, 40 üidegı «İnfiniti-1» TK tūrǧyndarynyŋ jobasy.
Aula aumaqtaryn ūiymdastyrumen qatar, qoǧamdyq keŋıstıkterde de jūmystar jürgızılude. Mäselen, Botanikalyq baqta velo jäne jügıru joldaryn auystyru, eskırgen tösenışterdı qaita töseu, köpırdı boiau jūmystary jürgızılude. Sonymen qatar, bükıl Botanikalyq baqta jaryqşamdar qalpyna keltırılıp, sport alaŋdary jäne t. b. jaŋartylady.
Abattandyrylǧan oiyn alaŋdary
Elordanyŋ Nūra audanynda Halyqaralyq balalardy qorǧau künıne orai abattandyrylǧan jaŋa balalar alaŋy paidalanuǧa berıldı. Jöndeu barysynda balalar alaŋy jaŋartylyp, work out aumaǧy jäne üi aumaǧy abattandyrylyp, şyrşalar egıldı. Qyz Jıbek, 32 mekenjaiynda ornalasqan aulada jöndeu jūmystary «Halyq qatysatyn biudjet» jobasy aiasynda öttı.
Biyl audan boiynşa barlyǧy 17 aula jaŋartylsa, 65-ınde jöndeu jäne qalpyna keltıru jūmystary jürgızılmek. Tolyqtai abattandyru jūmystary josparlanǧan aulalarda jaŋa şaǧyn säulettık formalar men sporttyq jabdyqtar ornatylyp, bruschatka auystyrylady, aula ışındegı aumaqtar asfalt töselıp, jaryqtandyru qalpyna keltırılıp, jasyl jelekter otyrǧyzylady.
Jaǧalau yqşam audanynda 18 gektar aumaqty keşendı abattandyru jūmystary jürgızılude. Jūmys aiasynda 2 qoǧamdyq keŋıstık pen 7 oiyn alaŋy abattandyrylady. Jol infraqūrylymyn jaqsartu üşın 20 beinebaqylau kamerasy, 150 saiabaq jaryqtandyru baǧanalary, 150 qosymşa tūraq orny abattandyrylyp, 9 şaqyrymdyq jaiau jürgınşıler joly jelısı jöndelıp, salynady. Abattandyru aimaǧy men ırgeles köşelerdıŋ boiyna 1125-ke juyq aǧaştar otyrǧyzyldy. Mūndai auqymdy jūmystar 10 myŋnan astam astanalyq tūratyn 19 üidıŋ aulasynda jürgızılude.
Baspasöz qyzmetınıŋ mälımetınşe, biyl Nūra audanynda 3 skver abattandyrylady. Onyŋ ışınde kögaldandyrylǧan 2 qoǧamdyq keŋıstık Tūran daŋǧylynda, būryn sauda ortalyqtarynyŋ qūrylysy josparlanǧan uchaskelerde paida bolady. Aldaǧy uaqytta EK-32 köşesınde türıkmendık aqyn Mahtumkulidıŋ eskertkışı ornatylǧan qoǧamdyq keŋıstıktıŋ abattandyryluy aiaqtalady.
«Aqjaiyq» saiabaǧy jaŋartyldy
Saryarqa audanynda «Halyq qatysatyn biudjet-2024» jobasy aiasynda D.Babataiūly köşesı 6, 8, 14, 16, 18 jäne Keŋdala köşesı 2, Botaly köşesı 26 mekenjailaryndaǧy aulalar kürdelı jöndeuden öttı.
Kürdelı jöndeu jürgızılgen aulalarda jaŋa rezeŋke jabyny jailastyrylyp, oiyn elementterı jaŋartyldy, sport alaŋdary men futbol alaŋdary jabdyqtaldy. Būl jobalardyŋ barlyǧy da öz bastamalaryn ıske asyruǧa eleulı üles qosqan tūrǧyndardyŋ ötınışterı negızınde jüzege asyryldy. Sonymen qatar, aǧymdaǧy jyly «Halyq qatysatyn biudjet-2024» jobasy boiynşa 30 aulany abattandyru josparlanǧan. Jöndelgen aulalardyŋ resmi aşyluynan keiın balalar özderınıŋ süiıktı multfilm keiıpkerlerımen kezdesıp, oiyndar men baiqaularǧa qatysyp, syilyqtar aldy.
Audandy abattandyru jūmystary mūnymen şektelmeidı. Aǧymdaǧy jyly Bırjan sal, Gete, Qūtpanov köşelerı men Respublika daŋǧylyn qaita jöndeu josparlanǧan. Aldaǧy uaqytta köşelerdegı eskı jaryq tırekterın jaŋasymen almastyra otyryp, qosymşa jaryqtandyru jürgızıledı. Sondai-aq, biyl Saryarqa audany aumaǧynda Iýbileinaia köşesı, 22 jäne Jeŋıs daŋǧyly, 34 mekenjailary boiynşa ekı jaŋa qoǧamdyq keŋıstık paida bolady.
