Jaŋa mümkındıkterge jol aşqan joba

Astanada «JOLTAP» äleu­mettık jobasy jüzege asyp jatyr. Joba elordalyqtardyŋ naryqqa qajettı mamandyqtardy meŋgerıp, jūmysqa ornalasuyna mümkındık tudyryp otyr.

Ötken jyldyŋ qyrküiek aiynan bastap ıske qosylǧan «JOLTAP» äleumettık jobasy künı bügınge deiın nätijelı jalǧasuda. Sonyŋ arqasynda astanalyqtar qysqa merzımdı baǧdarlamalar arqyly belgılı bır käsıp türıne tegın oquǧa mümkındık aldy. Elorda äkımdıgınıŋ bastamasymen qolǧa alynǧan joba aiasynda memlekettık qoldau şaralary, atau­ly äleumettık kömek, biznes aşuǧa qūjattardy resımdeu jäne jūmys tabu üşın keŋes berıledı.

«JOLTAP» jobasy aiasynda qala tūrǧyndary ekı qysqa merzımdı baǧdarlama boiynşa tegın bılım ala alady. Bırınşı baǧdarlama naubaişy, baris­ta, satuşy-kassir, qoǧamdyq tamaqtandyrudyŋ ämbebap qyzmetkerı, tıgınşı siiaqty 5 jūmysşy mamandyǧyn oqytuǧa arnalǧan. Ekınşı baǧdarlama – «Freelance mümkındık» dep atalady, būl 7 sifrlyq daǧdylardy oqytudy ūsynady. Olar: targetolog, SMM, videograf, marketpleis menedjerı, mobilograf, grafikalyq dizainer jäne veb-dizainer.

Qalalyq äkımdıktıŋ bastamasymen jäne «Jaŋa mümkındık» qoǧamdyq qorynyŋ qatysuymen jüzege asyrylyp jatqan auqymdy jobanyŋ aiasynda elordanyŋ 18 ben 50 jas aralyǧyndaǧy kez kelgen tūrǧyny sifrlyq jäne jūmysşy mamandyqtary boiynşa qysqa merzımdı oqytudan tegın ötıp, sertifikat alady. Bügınde joba aiasynda 2 myŋnan astam elordalyq türlı mamandyqtar boiynşa oqytu kurstarynan ötken.

Osy uaqytqa deiın jobaǧa qatysuşylardyŋ bır bölıgı tehnikalyq mamandyqtardy igerse, endı bır bölıgı sifrlyq salanyŋ tılın meŋgerdı. Solardyŋ bırneşeuı tömende pıkır bıldırdı.

Abylbek SADYQOV, 30 jasta:

– Astanaǧa köşıp kelgen soŋ, bıraz uaqyt qūrylysta jūmys ıstedım. Alaida keiın kompaniiada qysqartu bolyp, soŋǧy kelgendermen bırge jūmyssyz qaldym. Sodan bır künı köşede ketıp bara jatyp osy joba turaly jarnamany közım şaldy. Sodan qaladaǧy «Barşaǧa mümkındık» moduldık punktınıŋ bırıne baryp, dänekerleuşı salasy boiynşa tegın oqytu kursyna jazyldym. Būl qaŋtar aiynyŋ ortasy bolatyn, al oqytu aqpan aiynyŋ bas kezınde bastaldy. Kün saiyn sabaqqa qatysyp, bır aidyŋ ışınde jaŋa mamandyqty meŋgerıp şyqtym. Kurs barysynda köptegen sūraqqa jauap alyp, bırşama jaŋa närsenı üirendım.

Men därıs alǧan topta adam köp bolmady, degenmen sabaqtar öte qyzyqty jäne mazmūndy öttı. Qazırgı kezde qaladaǧy zauyttardyŋ bırınde dänekerleuşı bolyp jūmys ıstep jürmın. Būl jobanyŋ köpke tigızer paidasy mol. Sebebı «JolTap» arqyly är adam özı üşın jaŋa mamandyqty igere alady jäne bılıktılıgın arttyrady. Bastysy būl joba – jūmys ısteimın degen är adamǧa jaqsy mümkındık.

Eleonora NAHİPOVA, 50 jasta:

– Būǧan deiın dükende satuşy bolyp jūmys ıstedım. Jaŋa joba turaly kezdeisoq bıldım. «JOLTAP» mümkındıkterı turaly men baǧdarlama pavilonynyŋ janynan ötıp bara jatqanda bıldım. Özım qosymşa jūmys ızdep jürgen edım. Sodan ne bolsa da, kırıp söilesıp, män-jaidy bıleiın dep şeşım qabyldadym. Keŋesşı maǧan baǧyttar men şarttar turaly aityp berdı. Osylaişa, men oquǧa jazyldym. Ol kezde men dükende satuşy bolyp jūmys ıstep jürgen edım jäne jaŋa daǧdyǧa ie bolǧym keldı. Söitıp būl jerde kassamen jūmys ısteudı üirenudı közdep, kassir-satuşy mamandyǧyn taŋdadym.

Jalpy, «JOLTAP»-ta oqu maǧan ūnady. Kurstarda öz salasynyŋ mamandary sabaq berdı, bärı oŋai jäne tüsınıktı boldy. Bız jaŋa bılım men daǧdylardy tez meŋgerdık. Kurs­ty aiaqtaǧan kezde men jūmys ıstegen dükenge kassa ornatylǧan edı. Qazır men kassada satuşy kassir bolyp jūmys ısteimın. Äkımdıkke jäne osy jobany engızgenderdıŋ barlyǧyna alǧysym şeksız.

Marjan BAUYRJAN, 35 jasta:

– Bügınde joldasym ekeu­mız 4 balany tärbielep otyrmyz. Özım on jyldan berı bala kütımıne bailanysty dekrettık demalystamyn. Bala-şaǧama, otbasyma özım kiım-keşek tıkkım keletın. Bır künı äleumettık jelıden osy joba turaly habarlandyrudy körıp qaldym. Sodan dereu qaladaǧy punktterdıŋ bırıne baryp, tıgınşı kursyna jazyldym. Arada köp uaqyt ötpei kursty bastap kettım. Söitıp, bır aidyŋ ışınde tıgınşılıktı tolyq meŋgerıp şyqtym.

Kurs bır ai boiy kündelıktı boldy. Kırıspe sabaqta tıgın tıgudıŋ negızın jäne türlerın üirendık. Odan ärı kiımdı pışu men tıgudı körsettı. Oqytu prosesı öte qyzyqty öttı. Oqytuşylar barlyǧyn qarapaiym tılmen tüsındırıp berdı. Keiın alǧan bılımdı ıs jüzınde körsetıp, üirettı. Kursty aiaqtaǧan soŋ sertifikat aldym.

Är adam az uaqytta tegın mamandyq igere alady. Menıŋ oiymşa, tıgın tıgudı är kelınşek bılgenı abzal. Osy jobanyŋ arqasynda jaŋa orta, jaŋa tanystar taptym.

Jomart JOLAMANOV, 38 jasta:

– Būǧan deiın men ekspeditor-jürgızuşı bolyp jūmys ıstedım. «JOLTAP» baǧdarlamasy turaly tanysymnan estıp, bardym. Menı jobanyŋ şarttary qyzyqtyrdy, ekı baǧyt boiynşa oquǧa ötınış qaldyr­dym. Aldymen elektrmen dänekerleuşı jäne mobilograf bolǧym keldı. Dänekerleu boiynşa oqytu erterek bastaldy, men oquǧa tolyǧymen qatystym, sondyqtan ekınşı baǧyttan bas tartuǧa mäjbür boldym.

Qazaqstanda käsıbi dänekerleuşılerge qajettılık bar ekenın bıletınmın. Bıreu üşın būl mamandyq qiyn boluy mümkın. Mūnda mūqiiat bolu jäne zeiın qajet. Keibır jerlerde būl qauıptı. Bıraq men paidaly mamandyq tapqym keldı. Aldymen naryqty zerttep, käsıbi dänekerleuşılerdıŋ şynymen de öte laiyqty jalaqysy bar ekenın, olardyŋ eŋbegı qoǧam üşın köp paida äkeletının bılgen soŋ osy sala boiynşa oquǧa kırıstım.

Sabaqtar joǧary deŋgeide öttı. Bırınşı künnen bastap bärı jaqsy ūiymdastyryldy. Oqudan keiın bırden jūmys taptym. Olardyŋ aǧymynda synaq jürgızılıp, dänekerlengen tūstardyŋ sapasyn körsetu qajet boldy. Tapsyrmany oidaǧydai oryndap, qazırgı taŋda YDA türık köpsalaly zauytynda jūmys ıstep jürmın. Oqu jäne jūmysqa ornalasu prosesı şamamen bır aiǧa sozyldy. Bügınde barlyq dostarym men tanystarymdy osy tegın baǧdarlamaǧa qatysyp, jaŋa käsıp üirenuge şaqyramyn.

İä, «JOLTAP» jobasy arqyly kez kelgen mamandyqty bır aida meŋgerıp şyǧuǧa bolady. Elordalyqtar osy jobaǧa qatysyp, mobilograf, SMM, target sekıldı trendtegı mamandyqtardy üirenıp jür. Ärı osy baǧyt boiynşa jūmysqa ornalasyp jatyr. Qysqa merzımdı oqytuǧa jazylu qaladaǧy «Barşaǧa mümkındık» moduldık punktterınde ötedı.

Elordada «Barşaǧa mümkındık» moduldık punktterı kelesı mekenjailarda ornalasqan:

* Jastar saraiy, Respublika daŋǧyly, 34;

* «Ailand» ODO, Qorǧaljyn tasjoly, 2;

* «Vstrecha» SÜ Abylai han daŋǧyly, 31;

* «Aziia park» SOO, Qabanbai batyr daŋǧyly, 21;

* «Tūlpar» SO, Ş.Uälihanov köşesı, 24;

* «Euromall» SÜ, Qosşy­ǧūlūly köşesı, 23;

* «Mechta» SÜ, Syǧanaq köşesı, 3;

* «Rahmet» SÜ, Tılendiev daŋǧyly, 15;

* «EMO, Beibıtşılık köşesı, 9;

* «Rahmet» SÜ, Momyşūly daŋǧyly, 10;

* «Janūia», Beibıtşılık köşesı, 14.

Astana tūrǧyndary osy mekenjailarda ornalasqan «Barşaǧa mümkındık» moduldık punktterınde ūsynylatyn barlyq mümkındıktı paidalanu arqyly tegın oqyp, jaŋa käsıptı meŋgere alady.