Jastar qoldaryndaǧy veip pen temekını sporttyq qūral-jabdyqtarǧa aiyrbastady
Elordada temekı şegudıŋ taraluyna qarsy «Naşaqorlyqty sportqa aiyrbasta» aksiiasy ötıp jatyr, dep habarlaidy astana-akshamy.kz
ksiia aiasynda elordalyq sportşylar ötıp bara jatqandarǧa elektrondy temekını sporttyq qūral-jabdyqtarǧa aiyrbastaudy ūsyndy. Is-şara Saryarqa audany äkımdıgınıŋ, Dene şynyqtyru jäne sport basqarmasy men Jastar saiasaty mäselelerı basqarmasynyŋ qoldauymen ūiymdastyryldy.
«Bügıngı künı aksiia aiasynda bız temekı jäne veip şegetın jastarǧa qoldaryndaǧy ziiandy zattardy boks qolǧabyna, dopqa, turniketke aiyrbastaudy ūsynamyz. Osylaişa, bız elordalyqtardy salauatty ömır saltyna şaqyra otyryp, qalamyzǧa, tabiǧatymyzǧa degen jaqsy közqarasqa tartamyz», – dedı Astana qalasy Jastar saiasaty mäselelerı basqarmasynyŋ basşysy Samat İbraev.
Elordalyq kiokuşinkai-kan karateşı Älihan Asubaev ta mūndai şaralardyŋ maŋyzdylyǧyn atap ötıp, jastardy sportpen ainalysuǧa şaqyrdy.
«Osy aksiia arqyly bız jastarǧa sportpen şūǧyldanyp, densaulyqtaryn kütu kerektıgın körsetkımız keledı. Bız bırge olardy dūrys jolǧa salǧymyz keledı. Bızdıŋ äreketımız köpşılıkke motivasiia bolady dep senemız», – dedı Älihan Asubaev.
Elorda mäslihatynyŋ deputaty, «Jastar ruhy» jastar qanatynyŋ töraǧasy Arslanbek Maǧzūmnyŋ aituynşa, aksiianyŋ maqsaty jastar men jasöspırımderdı kınälau emes, ziiandy ädetterden bas tartuǧa şaqyru.
«Qazır bız terıs tendensiiany baiqap jürmız. 25 jasqa deiıngı jastar arasynda elektrondy temekınıŋ keŋ taraluy baiqalady. Būl mäsele öte özektı. Sondyqtan bügıngı maqsatymyz – jaman ädetterden arylu üşın bırıgıp jūmys ısteu», – deidı Arslanbek Maǧzūm.
Deputattyŋ aituynşa, mūndai şaralar būǧan deiın de elordada bolǧan.
«Bır ai būryn ataqty qazaqstandyq sportşy Vasilii Tahtaimen bırge osyndai aksiia jürgızgen bolatynbyz. Aldaǧy uaqytta mūndai şaralardy jalǧastyramyz. Oŋ nätije körıp otyrmyz. Mysaly, jastar ūiymdarynyŋ keibır belsendı jıgıtterı osyndai aksiialardy ötkızdı», – dep bölıstı Arslanbek Maǧzūm.
Mäslihat deputaty aksiia barysynda jinalǧan elektrondy qūrylǧylar mamandandyrylǧan zauytta joiylatynyn aitty.
