Jaz mausymy bastalysymen armanyna qanat bailaǧan oquşylardyŋ demalys orny men balalar lagerı öz jūmysyn jalǧastyrady. Astanalyq balalar 29 tamyzǧa deiın onkündık jazǧy demalysyn osy lagerlerde ötkızedı.
Kım qaida demalady?
Astana qalasy Bılım basqarmasynyŋ mälımetınşe, elordada 2024 jyly jazǧy demalystyŋ barlyq türımen 1-10-synyptyŋ 200 myŋnan astam oquşysy (96 paiyz) qamtylady.
Qalalyq bılım beru ūiymdarynyŋ bazasynda 97 mektep janyndaǧy lager, oquşylar qyzyqqan ärtürlı baǧyt boiynşa 75 beiındık lager aşylǧan.
№43 qosymşa bılım beru mektep-ortalyǧynda 3 mausymnan 23 tamyzǧa deiın 720 balany qamtityn «Aq jelken» sport lagerı jūmys ısteidı.
Az qamtylǧan otbasynan şyqqan balalardyŋ jazǧy demalysyn tegın negızde ūiymdastyru üşın jalpyǧa bırdei bılım beru qorynyŋ qarajaty esebınen 7326 bala tegın demalady.
1-4-synyp oquşylary «Böbek», 5-9-synyp oquşylary «Baldäuren-Şuchinsk», «Baldäuren-Qapşaǧai», «Baldäuren-Balqaş» respublikalyq sauyqtyru lagerlerınde sauyqtyrudan ötedı. Oqu-aǧartu ministrlıgınıŋ berılgen kvotasyna säikes, mūnda az qamtylǧan jäne köpbalaly otbasynan şyqqan 458 bala jaz boiy demalady.
Jalpy alǧanda, balalardyŋ jazǧy demalysyn ūiymdastyru sauyqtyru jäne jūmyspen qamtu sekıldı ekı baǧyt boiynşa jüredı. Bırınşı baǧyt boiynşa 97 mektep janyndaǧy lager jäne oquşylardyŋ müddesı boiynşa 75 beiındık lager jūmys ısteidı.
2025 jylǧa deiın ūlttyq qūndylyqqa beiımdelgen tärbie jūmysy lagerde ǧana emes, qala mektepterıne de engızılgen. Qanatqaqty joba ıske qosylǧan 2022 jyldan berı mektepterde oŋ özgerıs baiqadyq: balalar sabaqqa keşıgudı qoidy, oquşylar arasyndaǧy tärtıp būzuşylyq nöl deŋgeiıne tömendedı. Ärine, pedagogtarmen jürgızılgen üzdıksız tärbie jūmysy aldaǧy uaqytta da jalǧasady.
– Biyl 20 mektepte kiız üi ornatylǧan etnolager, 21 mektepte sport lagerı jūmys ısteidı. Jattyqtyruşylar balalarǧa arnaiy alaŋdarda sport türlerın üiretedı. Odan bölek, tanymal sportşylarmen kezdesu ötedı, – dedı Astana qalasy Bılım basqarmasy qosymşa bılım beru jäne tärbie jūmysy bölımınıŋ bas mamany Mädina Süleimenova.
Erekşe etnolager
Astanadaǧy Qadyr Myrza Älı atyndaǧy №88 mektep-liseiınde «Aqbota» jazǧy sauyqtyru lagerı aşyldy. Aşylu saltanatyna qalalyq Bılım basqarmasynyŋ ökılderı, mūǧalımder, mekteptıŋ bastauyş jäne 5-8-synyp oquşylary, arnaiy şaqyrylǧan qonaqtar men ata-analar qatysty.
– Bızdıŋ tobymyz «Jūldyz» dep atalady. Maǧan lager öte qatty ūnap jatyr. Ūsynys aitqan Klara Saparqyzyna alǧysym şeksız. Denımız sau bolu üşın Janar Älimūratqyzymen kün saiyn taŋǧy jattyǧu jasaimyz. Ärtürlı oiyn oinap, uaqytymyzdy öte qyzyqty ärı tiımdı ötkızemız. Aspazşylar bızge dämdı tüskı as äzırlep beredı, – deidı №88 mektep-liseiınıŋ 2-synyp oquşysy Erjıgıt Haqnazar.
– Dostarymyzben qyzyqty kinoǧa bardyq. Barlyq balanyŋ tılın tauyp, erekşe meiırımge bölegen ūstazdarymyzǧa, lagerge baruǧa keŋes bergen synyp jetekşımız Saltanat Tūrsynbaiqyzyna raqmet! – deidı Erjıgıt Aisūltan.
Balalarynyŋ jazǧy kanikuldy mazmūndy, qyzyqty ötkızıp jatqanyna ata-analar da dän riza.
– Mektep janyndaǧy jazǧy lager tärbieşılerıne raqmet aitamyz. Balalarymyz neşe türlı qyzyq oiyn oinap, kinoǧa, sirkke baryp ülgerdı. Alǧaşqy bes künı balama ūnap jatyr, – deidı ata-ana Äsemgül Jūmaǧalieva.
– Jazǧy lager aiasynda qyzym özıne jaŋa dostar tapty, tanymdyq oiyndardy qyzyqtady. Kün saiyn mektepten jaqsy köŋıl küimen kelgenıne quanamyn, – deidı ata-ana Mahabbat Nūrahmetova.
№88 mektep-lisei direktory Janat Aitova etnolagerde jas örkenge ūlttyq qūndylyqtar, salt-dästürlerımız, ana tılımız ben ädebietımız därıpteletının aitty. Mysaly, jün sabap, ūrşyq iıru, qūraq qūru, şi, keste toqu jäne t. b.
– Mektebımızde «Elorda – baqytty balalyq mekenı» atty lager aşyldy. Maqsatymyz – etnolager arqyly ūlttyq qūndylyqty därıpteu. Etnolagerde qyzdar jaǧy ūlttyq taǧamdardy äzırleudı, qamyr ileu men nan jaiudy, bauyrsaq pısırudı üirense, ūldar jaǧy bata berudı üirenıp, onyŋ män-maǧynasyn zerdeleidı. Osy aptadan bastap sütten qatyq-airan ūiytyp, şılde aiynda ūrşyqpen jün iırıp, kädımgı tekemet jasaimyz. Osyǧan 5 qoidyŋ jünın kütıp otyrmyz, kelgen boida oquşylarmen bırge juyp, keptırıp, jün iırıp, basqan kiızımızdı, ūiytqan qatyǧymyzdy, balalar qolynan şyqqan dünielerdı lager qorytyndysy boiynşa el-jūrtqa körsetıp, nätijesın, bala eŋbegınıŋ jemısın paş etsek deimız. Öitkenı bızdıŋ maqsat – ūltyn, öz qūndylyǧyn süietın, el bolaşaǧyna qyzmet etetın adal, eŋbekqor, parasatty ūrpaq tärbieleu. Üide, ia köşede ūialy telefonǧa telmırıp otyrǧanşa, balalardyŋ osyndai igı ıske aralasqanyn dūrys dep eseptedık, sondyqtan osy baǧyttaǧy tärbie jūmysyn jalǧastyra beremız. Bala jazda siyr sauu, atpen seruendeu, qymyzdy baptaudy üirenedı, – deidı mektep direktory Janat Tūrysbekqyzy.
Lagerde ärı tynyqqan, ärı şynyqqan balalar öz densaulyǧyn nyǧaityp, jazda tolyqqandy demalyp, jaŋa oqu jylyn tyŋ küşpen bastamaq.
