Ǧalamtordyŋ Google mälımetterdı ızdeu jelısınde «Jeltoqsan köterılısı» dep terseŋızder, «Uikipediia» aşyq ensiklopediiasynan būl tarihi oqiǧa turaly derekter men bırneşe suret şyǧa keledı. Sonyŋ bırınde aldyŋǧy qatarda Almatydaǧy Qazaq auylşaruaşylyq institutynyŋ studentterı tūr. Arasynda keiıpkerımız, sol uaqytta osy joǧary oqu ornynyŋ 2-kursynda oqyǧan, bügınde Astana qalasynyŋ tūrǧyny Gülbarşyn Şubaeva da (surette belgılengen) bar. Namysqoi jastardy jeltoqsannyŋ yzǧarly jelı toŋdyrǧan sol künderı ol kurstas-gruppalastarymen bırge alaŋǧa şyǧyp, KSRO ükımetınıŋ şeşımıne qarsylyq bıldırdı.
– Taŋerteŋ ädettegışe ūiqymyzdan oiandyq. Sol künı sabaqtan keiın «Medeuge» baramyz dep josparlap qoiǧanbyz. Radiodan Dınmūhamed Qonaevtyŋ ornyna Kolbinnıŋ taǧaiyndalǧanyn habarlady. Sol kezde bır bölmedegı qyzdar bärımız bır kısıdei «Qazaqstandy basqaratyn bır qazaq tabylmaǧany ma? Būl qalai?» dep oilanyp qaldyq. Sosyn sabaqqa kettık. Bıraq sabaqta da osy oi basymyzdan şyqpady. Basqa jastardyŋ da būl turaly sybyrlasyp jürgenın baiqadyq. Ekı sabaqtan keiın bärımızdı jataqhanalaryna qaityŋdar dep bosatty. Al bızdıŋ jataqhanamyz Brejnev alaŋyna jaqyn edı. Bız tıkelei alaŋǧa tarttyq. Jolda äigılı änşı Bibıgül Tölegenovany jolyqtyrdyq. Ol kısı alaŋnan qaityp kele jatyr eken. Barsaq, qūraqūrym halyq jinalǧan. Bır kezde jastarǧa küş qoldana bastady. Üstımızge su şaşty. Basqa da sūmpaiy äreketter kezınde jataqhanamyzǧa qaşyp, tyǧylyp ülgerdık. Bızde şeteldık azamattar köp oqityn. Sol sebepten jataqhanamyzdy qataŋ baqylauǧa aldy, – deidı Gülbarşyn Kenbaiqyzy.
Onyŋ aituynşa, Almaty oblystyq partiia komitetınıŋ bırınşı hatşysy Marat Meŋdıbaev alaŋda aldaryna şyǧyp söiledı. Jastardyŋ talaptarynyŋ bırı Dınmūhamed Qonaevtyŋ özınıŋ sözın mınberden estu boldy. Ol ne dese de, sonyŋ uäjıne ǧana toqtaimyz degen jastardyŋ būl talaby qanaǧattandyrylmady.
«Mınberge şyǧyp söilegenderdıŋ eşqaisysy jastarǧa dūrys jauap bere almady. Tek qana «Tarqaŋdar, ūiat bolady» degen sözder köp aityldy. Köterılıske şyqqan jastardyŋ arasynda orys tıldı qazaqtar da boldy. Sonyŋ bırınıŋ orysşa «Men oqyǧan Petropavl qalasynda bırde-bır qazaq mektebı joq. Osynyŋ saldarynan öz ana tılımdı bılmeimın, soǧan ūialamyn. Men de Qazaqstandy qazaqtyŋ basqarǧanyn qalaimyn» degenın estıdım. Bızdı köterılıske şyǧyŋdar dep eşkım qinap, qystaǧan joq. Sol oqiǧa boiymyzdaǧy ūlttyq namysty oiatty» deidı keiıpkerımız.
Keiınnen qarap otyrsa, kurstas-gruppalastarymen bırge sol künderı beinekameraǧa, fotolarǧa tüsıp qalǧan eken. Būl kadrlar Jeltoqsan köterılısı turaly derektı filmderde, basylymdarda, ǧalamtorda, äleumettık jelılerde paidalanyp jür. Soǧan qaramastan, alaŋǧa şyqqany üşın eş jazalanbady.
«İnstitut basşylyǧynyŋ jaqsylyǧy şyǧar. Olarǧa «üş ärıp» qyzmetkerlerınıŋ suretterdı äkelıp körsetpeuı mümkın emes. Bıraq bızdı basşylyǧymyz körsetpedı. Oquymyzdy oidaǧydai aiaqtadyq. Dekanymyz Ermek Jūmabekov degen azamat edı. Būl kısı bızdı qoldady» deidı Gülbarşyn Şubaeva.
Äkesı Kenbai partiia qyzmetkerı edı. Bıraq ol qyzy köterılıske qatysqanyn estıgende sökken joq, riza bolyp «özıme tartqan jaujüregım» dep maqtady. Gülbarşyn Kenbaiqyzy sol student şaǧynda tūrmysqa şyǧyp, ana atandy. Jiyrma jyl būryn Astana qalasyna köşıp keldı. Qazır jeke käsıpker retınde elımız ben elordamyzdyŋ örkendeuı jolynda eŋbektenıp jatyr. Bızben äŋgımesınde sol künderı alaŋda bırge bolǧan Älıbek Amanjolov, Bürkıt Qozybekov, Däulet Qonaqbaev, Däulet Darauzov, Janna Apuşeva, Tūrlybek Donbaev, Vladimir Nevesenko, Joldas Aitov, Samat Jalmaǧambetov, Aqmaral Biǧozieva, Nūrǧanym Öteşova, Quan Niiazbekov, Meiırjan Moldabaev degen gruppalastaryn atap ötudı de ötındı. Būl täuelsızdıktı jaqyndatqan sol uaqyttaǧy jastar bolǧannan keiın ötınışın qanaǧattandyrmai tūra almadyq.
