Dostyq üiınde 9 jeltoqsan – Halyqaralyq jemqorlyqqa qarsy küres künıne orai Astana qalasynyŋ Işkı saiasat basqarmasy men Sybailas jemqorlyqqa qarsy ıs-qimyl agenttıgınıŋ qalalyq departamentı «Jemqorlyq – ındet, onymen küresu – mındet» atty döŋgelek üstel mäjılısın ötkızdı. Alqaly basqosuǧa qalanyŋ qoǧamdyq ūiymdary ökılderı men jas volonterler, türlı sala qyzmetkerlerı qatysty.
Jasyratyny joq, qoǧamǧa tamyryn tereŋ jaiǧan ındetke jahandyq deŋgeide küş bırıktırıp, tosqauyl qoiuǧa ūmtylǧanymyzben, äzırge būl jeŋ ūşynan jalǧasqan jymysqy bälekettıŋ tamyryna tüpkılıktı balta şabu mümkın bolmai keledı.
Memleket basşysy Qasym-Jomart Toqaev sybailas jemqorlyqqa qarsy küres bır sät te bäseŋdemeuı kerek ekenın qataŋ eskertıp, būl baǧyttaǧy jüzege asatyn jūmystardyŋ strategiialyq maŋyzyn atap körsetken edı. Osy tūrǧyda qoǧamdyq sanany jäne sybailas jemqorlyqqa tözbeuşılık ahualyn qalyptastyru maqsatynda Astana qalasynyŋ äkımdıgı memlekettık äleumettık tapsyrys aiasynda üşjyldyq «Elordada parasattylyq ideologiiasyn ılgerıletu jäne sybailas jemqorlyqqa qarsy mädeniettı qalyptastyru» jobasyn qolǧa aldy. Ony jüzege asyruǧa memleketten jyl saiyn 8 million teŋgeden asa, al 3 jylǧa 24 million teŋgeden asa qarjy bölınıp otyr.
– Negızı, sybailas jemqorlyq turaly söz qozǧaǧanda bız eŋ bırınşı qoǧamdyq sanany özgertu mäselesın keŋınen oilanuymyz kerek. Mäselen, 80-100 myŋ teŋgenıŋ töŋıregınde jalaqy alatyn memlekettık qyzmetkerler bar. Bügıngı qymbatşylyq jaǧdaiynda mūndai qarajatpen tolyqqandy ömır süru mümkın be? Mıne, eldegı jemqorlyqtyŋ jolyn keskımız kelse, adamdardyŋ äleumettık jaǧdaiyn köteruımız qajet. Onsyz būl aitylyp otyrǧan mäselenı şeşu mümkın emes, – dedı Käsıpkerler palatasy käsıpkerler qūqyǧyn qorǧau jäne sybailas jemqorlyqqa qarsy ıs-qimyl jönındegı keŋesınıŋ töraǧasy İrak Elekeev.
– Jemqorlyqty toqtatu üşın aldymen sanany özgertu kerek. Biyl 3 aidyŋ ışınde ǧana elımızde 1500 sybailas jemqorlyq qylmysy tırkelıptı. Adamdar para alǧany üşın türmege otyratynyn, ataq-abyroiynan jūrdai bolatynyn bıledı. Söite tūra para berıp, para aludy toqtatpaidy. Nege? Öitkenı bızde zaŋ solqyldaq. Qylmystyq kodekstıŋ köptegen baby jūmys ıstemeidı. Bälenbai milliard teŋge memleket mülkın jymqyrǧan adam şartty türde 5 jylǧa sottalyp jatady. Sondyqtan osy baǧyttaǧy memlekettık keşendık ıs-şaralardy naqty jandandyru – kezek küttırmeitın mäsele, – dedı zaŋ ǧylymdarynyŋ doktory, professor, Qazaqstannyŋ eŋbek sıŋırgen qairatkerı Esbergen Alauhanov.
Keiıngı kezde Sybailas jemqorlyqqa qarsy ıs-qimyl agenttıgınıŋ Astana qalasy boiynşa departamentınde qūqyqtyq mınez-qūlyqty joǧarylatuda jäne aşyq sanany qalyptastyruda köpşılıkke arnalǧan taqyryptyq mazmūndaǧy anyqtamalyq, tanymdyq jäne paidaly aqparattardy qoǧamdyq oryndarda, äleumettık jelılerde taratu jobasy aiasynda BAQ pen azamattyq qoǧamnyŋ belsendı ökılderı keŋınen jūmys jürgızude.
Būl – adamnyŋ sanaly jäne adamgerşılıkpen atalǧan keleŋsızdıkke qarsy tūru qabıletı. Ol – belsendı azamattyq ūstanym. Osy baǧytta elorda äkımdıgınde jastardy bauli, tärbielei otyryp, volonterlık qyzmettı keŋınen örıstetuge küş salynuda. Döŋgelek üstel mäjılısınde Sybailas jemqorlyqqa qarsy ıs-qimyl agenttıgı Astana qalasy boiynşa departamentı basşysynyŋ orynbasary Mahmūd Baqdäulet pen Astana qalasy Işkı saiasat basqarmasy basşysynyŋ orynbasary Läzzat Qūsaiynova osy töŋırektegı atqarylǧan jūmystardy tılge tiek etse, «Jaŋaru» sybailas jemqorlyqqa qarsy jalpyūlttyq qozǧalysy RQB Astana qalasy filialynyŋ direktory Däuletkerei Rahmatullin, «Ädıldık joly» RQB filialynyŋ basşysy Darhan Qūljambekov pen taǧy da basqa qatysuşylardyŋ sözı sybailas jemqorlyqsyz qoǧam qūruda otbasyndaǧy tärbienıŋ maŋyzy zor ekenı, öskeleŋ ūrpaqtyŋ boiynda jastaiynan qūqyqtyq sana men mädeniet qalyptastyru, otansüigıştık baǧyttaǧy qūndylyqtar negızınde tärbieleu jaiy jalpy būl kesapatpen pärmendı küresu üşın halyqtyŋ qūqyqtyq sauattylyǧyn arttyryp, tüsındıru jūmysynyŋ deŋgeiı men sapasyn jetıldıru töŋıregınde örbıdı.
Döŋgelek üstel mäjılısı soŋynda qoǧamda sybailas jemqorlyqqa qarsy mädeniet pen sybailas jemqorlyqqa tözbeuşılıktı qalyptastyruǧa baǧyttalǧan üzdık jurnalistık jūmystar baiqauynyŋ jeŋımpazdary men osy salaǧa atsalysyp jürgen bır top belsendı azamat marapattaldy.
