Jergılıktı bilık Prezident bastamasyn jalǧastyrsa, BAQ ökılderı baspanaly bolar edı
Ötken apta soŋynda elımızde BAQ ökılderı käsıbi merekesın atap öttı. Qalamynyŋ ūşynda qoǧam dertın közge şūqyp körsetıp, bilık nazaryn soǧan audartu arqyly şeşımın tabuǧa yqpal etetın jäne eldegı barlyq oŋ özgerısterdı eŋ aldymen jetkızetın mamandyq ielerınıŋ marapatqa bölenetın merekesı Memleket basşysynyŋ nazarynan da tys qalmaidy.
Osy joly da Prezident eldegı eŋ myqty degen jurnalisterdı Aqordada jinaǧan kezınde: «Jurnalist – märtebelı mamandyq. Ol – aqiqat sözdıŋ, ötkır oi men şynaiy pıkırdıŋ jäne ädıl ıstıŋ jaqtauşysy. Sondyqtan bız media salasynyŋ mamandaryna ärdaiym zor qūrmetpen qaraimyz. Tüptep kelgende, memleket te, jurnalist te ūlt üşın qyzmet etedı, el taǧdyryn şeşuge atsalysady. Öitkenı ūlt baspasözı men ūlt müddesı qai kezde de özektes bolǧan. Qazır de solai. Kez kelgen eŋbek baǧalanuǧa tiıs. Örkeniettı qoǧam mass-media maitalmandaryn erekşe qadırleidı. Jyl saiyn elımızde üzdık jurnalisterge syilyqtar tabystalady. Būl – qalyptasqan dästür. Būdan bölek, byltyrdan berı mereke qarsaŋynda jurnalisterge päter kıltın tabystaudy dästürge ainaldyrdyq. Būl ürdıs biyl da, aldaǧy uaqytta da jalǧasa beredı» degen bolatyn.
İä, rasymen qazırgıdei qūbylmaly zamanda halyqqa jan-jaqty saraptalǧan, tekserılgen, şynaiy aqparatty ūsynudyŋ, azamattardy adastyratyn aqparatqa jol bermeudıŋ maŋyzy zor. Osy jolda ūlt müddesın közdegen aqparat qūraldarynda ondaǧan jyldar boiyna eŋbek etıp jürgen jurnalister köp. Olardyŋ köbı, äsırese, aimaqtaǧy jurnalister az ǧana jalaqymen jürse de, baspanasyz jaldamaly päterlerde kün keşse de qalamyn basqa käsıpterge aiyrbastamai, öz qyzmetıne adal bolyp qaluda. Öz mamandyǧyn şynaiy jaqsy köretın sondai jurnalisterge Prezident bastamasymen soŋǧy ekı jylda 132 päter berılıptı. Sonyŋ ışınde biyl da bırqatar BAQ qyzmetkerlerıne 67 päter berılıp, jurnalister qonys toiyn toilauda.
Sol päterler kıltterın tiıstı jurnalisterge tabystaǧan Memleket basşysynyŋ keŋesşısı – Prezidenttıŋ baspasöz hatşysy Berık Uäli «Dara» Prezidenttık bastamalar qorynyŋ ūiymdastyrumen mūndai şara osymen ekınşı jyl qatarynan ötkızılıp otyrǧanyn jetkızdı.
– Şyny kerek, jurnalister arasynda «bız ne memlekettık qyzmetşılerdıŋ, ne biudjettık mekeme qyzmetkerlerınıŋ sanatynda joqpyz, memlekettık baǧdarlamalardyŋ igılıgın köre almaimyz» degen mäsele jiı köterıletın. Tıptı būl mäsele Parlamentte de aitylatyn. Byltyr Prezident Qasym-Jomart Toqaevtyŋ tapsyrmasymen sol olqylyqtyŋ orny tolyp, jyl saiyn jurnalisterge baspana beru dästürge ainaldy. Ötken jyly Memleket basşysynyŋ atynan BAQ qyzmetkerlerıne 1 jäne 2 bölmelı 65 päter, al biyl 67 päter berıldı. Onyŋ ışınde, 13-ı – 3 bölmelı, 45-ı – ekı bölmelı, 9-y – bır bölmelı päterler. Eŋ bastysy, päter kıltterı elımızdıŋ damuyna, Memleket basşysy jürgızıp otyrǧan reformalardy halyqqa jetkızuge eleulı üles qosyp kele jatqan BAQ ökılderıne, onyŋ ışınde baspanaǧa şyn mänınde mūqtaj jandarǧa berılıp otyr. Atap aitqanda, 21 päter köpbalaly otbasylarǧa, 5 päter jalǧyzbasty analarǧa berıldı. Sonymen qatar otbasynda mümkındıgı şekteulı balasy nemese jūbaiy bar 11 azamat baspanaly boldy. Päter alǧan BAQ salasy qyzmetkerlerınıŋ arasynda 6 janūia osy uaqytqa deiın jatahanada tūryp kelgen. Bır otbasy baspanaly bolsa, quanyp, halyqtan süiınşı sūraityn jurnalisterdıŋ üilı boluy – öte quanyşty jaǧdai. Būl igı dästür aldaǧy uaqytta da jalǧasyn tabady, – dedı ol päter kıltın tabystau jiynynda.
Rasynda qalamynyŋ quaty küştı, aitary bar, eldıŋ özektı mäselelerın jeterıne jetkızıp aityp, jurnalistikanyŋ damuyna üles qosyp jürse de köptegen jurnalisterdıŋ päter ala almauyna qyzmet etetın mekemesınıŋ biudjettık sala bolmaǧany da kedergı keltıretını ras. Memleketten üi aluda mūǧalım men därıger, basqa da biudjettık sala qyzmetkerlerıne arnalǧan türlı baǧdarlamalar bolsa da, sonyŋ ışınen jurnalisterge üi alu tetıkterı qarastyrylmaǧany qynjyltatyn. Būl mäsele jaqynda qabyldanǧan «Mass-media» turaly zaŋda da qamtyluy kerek degen ūsynystar da berıldı. Osy rette ekı jyldan berı Memleket basşysynyŋ özı kötergen būl bastama bıraz sala mamanynyŋ päterlı boluǧa degen ümıt otyn oiatty.
Tek eŋ bastysy – päterden päterge köşıp, bala-şaǧa qamymen jürıp, qoǧamnyŋ jarasyn jazamyn degen BAQ ökılderınıŋ arasynan laiyqtysy, şyn mūqtajy alsa eken deisıŋ. Olardy ırıktegende jäne päter aluǧa ūsynǧanda sol BAQ-qa köp jyldyq eŋbegı sıŋgen, jurnalistık qyzmetımen tüiındı mäselelerdıŋ şeşımın tabuyna şyn mänınde atsalysyp jürgen jäne baspanasy joq jandardyŋ tızımı berıluı kerek. Sonymen qatar Prezidenttıŋ özı köterıp otyrǧan būl igı bastamany jergılıktı äkımder qoldap, osyny ülgı etse BAQ salasyndaǧy bıraz zamandas ärıptesterımız qoǧamdaǧy basty mäselesın şeşıp, ärı qarai eşteŋege alaŋdamai, eldık müdde jolyndaǧy qyzmetıne qarqynmen kırısıp, saladaǧy san taqyrypty jazuda erkın kösıler edı. Sondyqtan aldaǧy uaqytta Memleket basşysy Qasym-Jomart Toqaevtyŋ osy igı bastamasyna jan-jaqty üles qosatyndar qatary köbeiıp, äsırese, jergılıktı bilık tarapynan qoldau tabady degen senımdemız.
