Polisiia qyzmetkerınıŋ ışkı ömırlerı tūŋǧiyq ta jūmbaq bolyp sezıledı. Alaida qyzmettık formasyn kiıp, qaşanda är qadamyn aŋdyp basatyn būl salanyŋ mamandary syrt közge qatygez körıngenımen, olar da – jyly jürek pen näzık sezımnıŋ iesı. Saqşylardyŋ da otbasy, bala-şaǧasy bar. Bır şaŋyraq astynda, bır qyzmet salasynda da bırge jürıp, «Otan otbasynan bastalady» degen qaǧidany qataŋ ūstanyp, jūp bolyp jūrtqa qyzmet etıp jürgen tärtıp saqşylarynyŋ qatarynda Mūqūşevtar otbasyn airyqşa atap ötuge bolady.
Atalǧan otbasynyŋ otaǧasy bolyp otyrǧan Rinat Serıkūly, 1987 jyly Şyǧys Qazaqstan oblysy Kürşım audany Burabai auylynda düniege kelgen. Ol özınıŋ balalyǧy turaly aitqanda, auyl turaly eske almau mümkın emestıgın aitady. Sonymen qatar ol özınıŋ oquşy künnen alǧyr bolǧanyn da jasyrmady.
– Men 1994 jyly Şyǧys Qazaqstan oblysy Kürşım audany Burabai auylynda ornalasqan Burabai orta mektebıne 1-synypqa oquǧa tüsıp, 3 synypqa deiın sonda oqydym. 1997 jyly otbasylyq jaǧdaiǧa bailanysty Leninogorsk qalasyna köşıp, sol jerdegı №15 orta mektebınde oquymdy jalǧastyrdym. 2003 jyly joǧaryda atalǧan mekteptı bıtırıp, sol jyly orta bılım alu maqsatynda Ridder qalasyndaǧy käsıptık-tehnikalyq mekteptıŋ 7-bastauyş käsıptık oqytu ortalyǧyna oquǧa tüstım. 2007 jyly Ridder qalasynyŋ qalalyq äskeri komissariaty Qazaqstan Respublikasynyŋ Qaruly Küşterıne merzımdı qyzmetke şaqyrylyp, Zaisan qalasynda bır jyl äskeri mındetımdı ötedım. 2009 jyly atalǧan qaladaǧy Nūrǧaliev atyndaǧy Gumanitarlyq kolledjge oquǧa tüsıp, 2011 jyly osy kolledjdı Qūqyqtanu mamandyǧy boiynşa bıtırdım. Sol jyly Qazaqstan – Amerika erkın universitetıne, zaŋ fakultetıne syrttai oquǧa qabyldanyp, 2014 jyly atalǧan universitettı tämamdap, 2008 jyldan bastap Ridder qalasynyŋ polisiia departamentınde, 2023 jyldyŋ qaŋtar aiynan bastap Astana qalasy PD Polisiia basqarmasy Jedel-kriminalistikalyq bölımınde qyzmet atqaryp kelemın, – dep öz ömırın jıpke tızgendei qylyp aityp bergen ol qazırgı kezde halyqtyŋ polisiia qyzmetkerlerıne degen senımın nyǧaitu jolynda jūmys ıstep kele jatqanyn aitady.
– Negızı halyq bızdı basqaşa oilaidy. Şyn mänınde bız de adambyz. Mysaly, menıŋ de tuys-tuǧandarym, körşılerım bar. Men özım solarǧa jaqsy qarym-qatynas pen ülgı körsetu arqyly polisiianyŋ el aldyndaǧy abyroi bet-bedelın köteruge jūmys jasap jürmın dep oilaimyn. Öitkenı «ūltqa qyzmet etu bılımnen emes, mınezden» degen Älihan Bökeihanovtyŋ sözı bar. Poliseiler, eŋ bırınşı, halyqqa sol mınezı arqyly qyzmet etıp bastai bıluı kerek dep oilaimyn, – deidı ol.
Ärine, «myqty jıgıttıŋ artynda jaqsy äiel tūrady» demekşı, Mūqūşevtar otbasynyŋ oşaǧynyŋ otyn öşırmei, berekesın kırgızıp otyrǧan Rinattyŋ aiauly jary Rabiǧa Erkebaiqyzy da polisiia qyzmetkerı bolyp jūmys ısteidı.
Jalpy erlı-zaiyptylardyŋ ekeuı de qūqyq qorǧau organdarynda 18 jyldan astam qyzmet etıp keledı. Olar 2010 jyly Şyǧys Qazaqstan oblysynyŋ Ridder qalasynda qyzmette jürıp tanysqan. Alǧaşqy tanystyqtaryn esıne alǧan Rabiǧa Mūqūşeva küieuınıŋ batyldyǧy men sypaiylyǧyna täntı bolǧanyn aitady.
– Qyz bala üşın eŋ äuelı özıne qorǧan kerek. Ärine, mende polisiia qyzmetkerı bolǧanymmen, tabiǧatym bärıbır näzıktıkten jaralǧan. Sondyqtan da men Rinatty körgende bırınşı özıme qorǧan, otbasyma tıreu bolatyn azamat ekenın sezındım. Bıraq bız de bırden qol ūstasyp ketken mahabbat bolǧan joq. «Üilenu oŋai, üi bolu qiyn» dep atalarymyz aitpaqşy, Rinat ekeumız bolaşaq taǧdyrymyzdy qosu jolynda köp oilandyq. Aqyry bır-bırımızge süieu bola alatynymyzǧa sengen kezden bastap bas qūrauǧa bel budyq. Qazırgı taŋda ekı balamyz bar. Baqytty otbasymyz. Er azamat öz moinyndaǧy otbasyna degen jauapkerşılıgın tolyqtai sezıngen kezde üide bereke bolady dep esepteimın. Al Rinat maǧan adal jar, balalaryma jaqsy äke bola bıldı. Men onyŋ boiyndaǧy qazaqy qasietı men er-jıgıtke tän mınezın qūrmetteimın, – deidı Rabiǧa Erkebaiqyzy.
İä, aqqu men qazdai, jūptaryn jazbai jürgen qos polisiia üşın ärbır kün mahabbat, ärbır minut estelık. Rabiǧa özınıŋ otbasy
turaly oiyn aita kele, şaŋyraqty şaiqaltpai ūstaudyŋ syry nede ekendıgıne de toqtaldy.
– Berık otbasyn qūryp, ony ūstap tūrudyŋ syry – ystyq mahabbat pen adal senımde. Bız ädette otbasynyŋ berekesı, sol üidegı süiıspenşılıkke bailanysty dep jatamyz. Menıŋşe, adamdar da süiıspenşılık bolmasa üilenbes edı. Sondyqtan şaŋyraq kötergen jastarǧa süiıspenşılıkten basqa, tözımdılık pen keşırımdılık de auadai qajet. Ekı adam bırın-bırı tyǧyryqqa tıremei tüsıngen kezde ǧana ol otbasynda baqyttyŋ säulesı jarqyrai tüsedı, – deidı ol.
Şynynda da baqyt qajyrlyqpen qairaty toǧysqan ekı adamnyŋ esıgınen ǧana qaraityny anyq. Sondyqtan da dombyranyŋ qos ışegındei, tüienıŋ ekı örkeşındei bolyp ömır men tūrmysty, mamandyq pen jūmysty bırge alyp jürgen Rinat pen Rabiǧadai jandar qaşanda eldıŋ eleulısı, halyqtyŋ qalaulysy bola bergei.
Şapaǧat ÄBDIR
