Прокурорлар Астанадағы бір пәтерде шетелдіктерді қосқанда 937 адамды тіркеген тұрғынды анықтады, бірақ онда бір ғана отбасы тұрған, деп хабарлайды astana-akshamy.kz Бас прокуратураға сілтеме жасап.
Еліміздің алты өңірінде (Жамбыл, Түркістан, Солтүстік Қазақстан, Қарағанды облыстары, Алматы және Астана қалалары) прокурорлар заңсыз көші-қон арналарын анықтап, сотқа дейінгі тергеп-тексеруді бастады.
Мысалы, Қарағанды облысында ХҚКО, медициналық мекемелер мен «көмекшілер» деп аталатын қызметкерлерді қамтитын қылмыстық топтың жұмысы тоқтатылды, олар ақша үшін еңбек шарттарын, медициналық анықтамаларды қолдан жасап, тұрғын үйді жалған тіркеуді ресімдеген.
Қордай ауданында Жамбыл облысы прокуратурасының үйлестіруімен 20 пәкістандыққа шекараны заңсыз кесіп өтуді ұйымдастырған Қазақстан мен Қырғызстанның үш азаматы ұсталды.
«Олардың бірі мигранттарды көлікпен және тұрғын үймен қамтамасыз еткен және ол сотталды, қалған екеуіне қатысты іс сотқа жолданды (М есімді азамат бас бостандығынан айыруға сотталды, А және О есімді азаматтарға қатысты іс сотқа жіберілді)», – делінген хабарламада.
Прокурорлар жалған мекен-жайлар бойынша және «резеңке пәтерлерде» тіркелген 22 мың шетелдікті анықтады.
«Тексеріс нәтижелері бойынша құжаттарды қолдан жасауға, шекараны заңсыз кесіп өтуге, сот актілерін орындамауға және басқа да бұзушылықтарға байланысты барлығы 42 сотқа дейінгі тергеп-тексеру басталды. Қазіргі жағдайда көші-қон процестерін тиімді басқару елдің қауіпсіздігін, тұрақтылығын және дамуын қамтамасыз етудің негізгі элементіне айналады Осыған байланысты алқа қорытындылары бойынша шекаралардың инженерлік-техникалық қорғалуын нығайтуды, ақпараттық жүйелерді жаңғырту мен интеграциялауды, сондай-ақ заңнамалық түзетулерде көзделген жаңа ережелерді іске асыру шараларын пысықтауды көздейтін кешенді шаралар әзірленді», – делінген хабарламада.
