Астана қаласының әкімдігі Ұлттық академиялық кітапханада Халық қаһарманы Рахымжан Қошқарбаевтың туғанына 100 жыл толуына орай «Рахымжан Қошқарбаев: Рейхстагқа тігілген ту» атты жаңа жинақтың таныстырылымына арналған дөңгелек үстел өткізді. Дөңгелек үстелді Астана қаласы әкімдігінің Тілдерді дамыту және архив ісі басқармасының басшысы Сәкен Есіркеп жүргізіп отырды. Іс-шараға қалалық Ішкі саясат басқармасының басшысы Нұрдәулет Әлмұханов қатысты.
Жиналғандар Астана қаласы мемлекеттік архив қорындағы Рахымжан Қошқарбаевтың өмір тарихына қатысты «Ерлікке тағзым» атты архив құжаттарының көрмесімен танысты.
Есімі ерліктің символына айналған Халық қаһарманы Рахымжан Қошқарбаев туралы алғашқы сөзді ғалым, мемлекет және қоғам қайраткері, «Ардагерлер ұйымы» республикалық қоғамдық бірлестігі Орталық кеңесі төрағасының бірінші орынбасары Өмірзақ Озғанбаев бастады, Халық қаһарманы, генерал-лейтенант Бақытжан Ертаев, қоғам қайраткері, генерал-лейтенант Абай Тасболатов, мемлекет және қоғам қайраткері Дархан Мыңбай сұрапыл соғыс кезіндегі аға буынның өшпес ерлігі мен ерен еңбегін ұрпақ жадында жаңғыртудың маңыздылығын, Рахымжан Қошқарбаевтың қайсарлығы мен батырлығын көзімен көргендердің дәйекті деректерін тілге тиек етті.
Рақымжан Қошқарбаев 1924 жылы 19 қазанда Ақмола облысы Тайтөбе ауылының маңында туған. Ол 1945 жылдың 30 сәуірінде жауынгер Григорий Булатовпен бірге алғашқы болып Рейхстагқа Жеңіс туын тігеді. Соғыстан соң лейтенант Қошқарбаев Эльба бойындағы советтік оккупациялық әскер бөлімінде қызмет етеді. Ал 1947-67 жылдары Қошқарбаев Ақмола облыстық Атқару комитетінде нұсқаушы, Қазақ КСР министрлер кеңесі жанындағы қоныс аударушылар жөніндегі бас басқармада инспектор болады.
Өлім мен өмірді, құрмет пен табынуды ұлтқа бөлген саясаттың кесірінен еленбеген, небәрі 21 жасында адам сенгісіз ерлік жасаған Рақымжан Қошқарбаевтың ерлігі туралы алғаш рет сөз қозғаған Бауыржан Момышұлы «Мен де соғысқа қатыстым. Дивизияға дейін басқардым. Төрт жыл бойғы көрген сұрапылдың небір сұмдықтары көз алдымда. Бірақ Берлинді алардағы, Рейхстагқа ту тігердегі қырғын – ол нағыз ақырзаманның өзі. Жаңағы жігіт сол тозақ отының ішінде болған. Сол алапаттан аруақ қолдап, аман шыққан. Жеңіс туын тіккен! Тағдыр оның тарихи адам ретіндегі өмірбаянын сол сәтте жазған! Сендердің міндеттерің – енді соны елге айтып, жалпақ жұртқа жеткізу» деп айтқан сөзі ұрпақтан-
ұрпаққа беріліп келеді.
Содан бері солақай саясаттың кесірінен ерлігі еленбеген, алғашқылардың бірі болып, Рейхстагқа ту тіккен батыр Рахымжан Қошқарбаевтың өшпес ерлігі туралы талай жыр-дастан, естеліктер, сыр-сұхбаттар, әңгіме, хикаяттар жазылды. «Халық қаһарманы» атағы берілді. Астанада еңселі ескерткіш орнатылды, оның есімімен көшелер аталады, есімі мектепке берілді.
Адамзат тарихынан өшпес орын алған хас батырдың өмірі мен ерлігі мән-мазмұнымен қымбат, бүгінгі және болашақ ұрпақ үшін үлгі-өнеге.
Ғазиза ИСАХАН
