Қазақстанда танымал смартфондар шығарыла бастауы мүмкін, деп хабарлайды astana-akshamy.kz
Бұл туралы Цифрлық даму, инновациялар және аэроғарыш өнеркәсібі министрлігі хабарлады.
Министрлік мәліметінше, Қазақстан Оңтүстік Кореяға Samsung смартфондарын бірлесіп шығаруды ұсынды. Бүгінде олар республикадағы ең танымалдардың бірі саналады.
«Бұл құрылғыларға сұраныс тұрақты түрде өседі. Қазақстан нарығының 50 пайыздан астамын оңтүстіккореялық бренд алатынын ескере отырып, Қазақстанда смартфондардың бірлескен өндірісін құру мәселесі қарастырылып жатыр», – деді Цифрлық даму министрлігі өкілдері Tengrinews.kz ресми сауалына берген жауабында.
Сондай-ақ, ведомство біздің ел «бұл жобаға серіктес табуға дайын» деп сендірді.
«Қазақстанда дарынды жастар, университеттер және кешенді инновациялық экожүйе базасы бар, бұл елді смартфондарды бірлесіп шығаруға қолайлы ете алады», – деп қосты ведомство.
Сурет: depositphotos.com
