Түркістан облысының тұрғыны өзінің бұрынғы қызын Астанадан күшпен алып кетуге тырысты, деп хабарлайды astana-akshamy.kz.
Ауа-райының қолайсыздығына байланысты ол өз идеясын жүзеге асыра алмады.
«102 басқару пультіне біреулердің 20 жастағы қызды еркінен тыс Daewoo Nexia маркалы автокөлігіне отырғызып, белгісіз бағытқа алып кеткені туралы хабарлама түсті. Қоңырау шалушы хабарлағандай, кешкі уақытта ол туысымен бірге жұмыстан оралып келе жатқан. Осы кезде төрт жігіт отырған көлік олар тұрған үйдің ауласына келіп, оның әпкесін салонға күштеп отырғызып алған», – делінген Астана қаласы Полиция департаментінің баспасөз қызметі таратқан хабарламада.
Хабарласушы танып қалғандай, жігіттердің бірі олардың ауылдасы болып шыққан. Олар бұрын араласып тұрған, бірақ кейіннен сөйлеспей кеткен.
«Автокөлік пен қызды іздеу үшін қалада «Қолға түсіру» жоспары жарияланды. Полиция күдіктілерді тез тауып, оларды тоқтатты. Қыз олармен бірге көлікте болған. Кейін белгілі болғандай, жігіттер оны Түркістан облысына алып кетуді жоспарлаған, бірақ ауа-райының қолайсыздығына байланысты қала сыртына шыға алмапты. Адамды заңсыз бас бостандығынан айыру фактісі бойынша сотқа дейінгі тергеу жүргізілуде», – деп хабарлады полиция департаменті.
Еске сала кетсек, бұл баптың санкциясы үш жылға дейінгі мерзімге бас бостандығын шектеу түріндегі жазаны немесе сол мерзімге бас бостандығынан айыруды көздейді.
