Ана тілімізді ардақтағандар
![](https://astana-akshamy.kz/wp-content/uploads/2022/10/whatsapp-image-2022-10-26-at-18.10.29-1-780x470.jpeg)
Елордада Республика күніне орай іс-шаралар жалғасып жатыр. Төлеген Айбергенов атындағы 16-орта мектепте «Жаса, жайна, жаңа Қазақстан!» атты өзге ұлт өкілдері арасында сайыс өткізілді.
Қазақтың өнерін, ұлттық тағамдары мен салт-дәстүрін насихаттайтын іс-шараға қатысушылар өзге ұлт өкілі бола тұра ана тілімізде ән айтып, би билеп, ұлттық тағамдарды жасап, өз өнерлерін ортаға салды.
Педагогтарға, ата-аналарға, оқушыларға ерекше дем берген сайыстың өтуіне мектеп директоры – Сауле Азимханова мен Т.Айбергенов атындағы мемориалдық музей жетекшісі Гаухар Жүсіпова мұрындық болғанын атап өту керек.
Отбасы, бала тәрбиесінде тілімізді, ділімізді, ұстанған дінімізді, салт-дәстүрімізді, әдет-ғұрпымыздың озығын насихаттап, үйрету, тәлім-тәрбиенің өзегі етуді мақсат етіп, тәртіп пен тәрбиесіз білім де, байлық та құнсыз екеніне көрсеткен сайыста дәстүріміз лайықты түрде насихатталды.
Қатысушылар қолданбалы қолөнер шеберлігі, ұлттық салт-дәстүр жөніндегі білім деңгейі, ән-би өнері бойынша сайысқа түсті. Ол бес кезеңнен тұрды, оған қатысқан өзге ұлт өкілдері – Галина Мұсабекова, Анна Чалык, Гюльнара Аскерова, Жанна Ергалиева және Евгения Климова өз өнерлерін көрсетіп, ұлттық салт-дәстүріміз жайлы сындардан сүрінбей өтті. Нәтижесінде, бастауыш буын оқу ісінің орынбасары – Евгения Андреевна бас жүлдені қанжығасына байласа, ағылшын тілі мұғалімі – Галина Мусабекова мен информатика пәнінің мұғалімі – Жанна Ергалиева 2-орынды, ал ата-ана Гюльнара Аскерова мен асхана меңгерушісі Анна Чалык 3-орынды иеленді.
Кеш тек ұрпақ тәрбиесіндегі ұлттық құндылықтардың дәріптелуімен ғана емес, аға буын мен жастар арасындағы сабақтастыққа, рухани бірлікке жол салуымен, парасат пен ізгіліктің ерекше салтанатымен ерекше әсерге толы болды.