اسكەري بورىشىن وتەگەندەر جوو-عا گرانتپەن تۇسە الادى. ياعني 2023 جىلدان باستاپ اسكەري بورىشىن وتەگەن قازاقستاندىقتار جوعارى وقۋ ورىندارىنا ۇلتتىق بىرىڭعاي تەستىلەۋ ناتيجەسىن ەسەپكە الماي-اق تۇسە الادى.
سونداي-اق اقىلى تۇردە ءبىلىم الۋعا ءوتىنىش بەرۋگە بولادى. قورعانىس ءمينيسترىنىڭ كەڭەسشىسى ايگۇل تولەمباەۆانىڭ ايتۋىنشا, قورعانىس ۆەدومستۆوسىندا قازىردىڭ وزىندە ەرەجەلەر قاراستىرىلىپ جاتىر. «جوبانى ىسكە اسىرۋ كەلەسى جىلى باستالادى. الايدا قازىرگى ۋاقىتتا اسكەري بورىشىن وتەپ جۇرگەن ساربازدارعا دا ءبىلىم بويىنشا جەڭىلدىكتەر قاراستىرىلعان. ءبىزدى عىلىم جانە جوعارى ءبىلىم مينيسترلىگى, جوعارى وقۋ ورىندارىنىڭ رەكتورلارى قولداپ وتىر» دەدى ول.
ساربازدار وقۋعا كۇنتىزبەلىك كەزەڭدە, مىسالى, كۇزدە زاپاسقا اۋىستىرىلعاننان كەيىن جانە قىزمەت اياقتالعان سوڭ ەكى جىل ىشىندە تۇسە الادى. اسكەري قىزمەت وتكەرۋ كەزەڭىندە ءتارتىبى جاقسى, جاۋىنگەرلىك دايىندىقتا جوعارى ناتيجەلەرگە قول جەتكىزگەن ۇزدىك اسكەري قىزمەتشىلەرگە جوو گرانتى ەسەبىنەن تەگىن جوعارى ءبىلىم الۋعا مۇمكىندىك بەرىلەدى. «قورعانىس ءمينيسترى گەنەرال-پولكوۆنيك رۋسلان جاقسىلىقوۆ جوعارى وقۋ ورىندارىنىڭ رەكتورلارىنا ەڭ لايىقتى اسكەري قىزمەتشىلەر وقۋ ورنىنىڭ گرانتىنا سەنە الادى دەگەن ۇسىنىسپەن جۇگىندى. بۇل باستامانى ءبىز ۇسىنىس ايتقان بارلىق ۋنيۆەرسيتەت قولدادى» دەدى قورعانىس ءمينيسترىنىڭ كەڭەسشىسى.
بارلىق وڭىردەگى 40-قا جۋىق جوعارى وقۋ ورنى, سونىڭ ىشىندە ل.ن. گۋميلەۆ اتىنداعى ەۇۋ, Satbayev University, Astana IT University بار.
قورعانىس مينيسترلىگى ۋنيۆەرسيتەتتەر جىلىنا كەمىندە 3000 گرانت بولەدى دەپ شامالاپ وتىر. وسىلايشا, اسكەرگە شاقىرىلعان ءاربىر ونىنشى سارباز وقۋعا تەگىن تۇسۋگە مۇمكىندىك الادى. بۇل تەك قارۋلى كۇشتەردىڭ قۇرامالارى مەن بولىمدەرىندە عانا ەمەس, باسقا دا اسكەري قۇرىلىمدا – شەكارا قىزمەتى, ۇلتتىق ۇلاندا قىزمەت ەتكەن جاۋىنگەرلەر دە بولماق.
قورعانىس مينيسترلىگى قازىردىڭ وزىندە جاۋىنگەرلەردىڭ دايىندىق بارىسىندا جيناعان ۇپايلارىن قورىتىندىلاپ, رەيتينگىن انىقتايتىن ادىستەردى ازىرلەپ جاتىر. «بۇل – الىنعان باعالاردىڭ جيناقتاۋشى جۇيەسىنىڭ ءبىر ءتۇرى. جاۋىنگەرلەر اسكەري ءتارتىپتى ساقتاعانى, اسكەري قۇرامانىڭ قوعامدىق ومىرىنە بەلسەنە قاتىسقانى ءۇشىن قوسىمشا ۇپاي الادى» دەدى ا.تولەمباەۆا.
بيىل جىل باسىندا, مەملەكەت باسشىسى قاسىم-جومارت توقاەۆ ءماجىلىس وتىرىسىندا جاستاردىڭ اسكەري بورىشىن وتەۋدەن قاشاتىنىن سىنعا الىپ, «جاستاردى اسكەري بورىشىن وتەۋگە ىنتالاندىرۋدى ويلاستىرۋىمىز كەرەك» دەپ تاپسىرما بەرگەن بولاتىن. «باسا نازار اۋدارۋدى قاجەت ەتەتىن تاعى ءبىر ماسەلە بار. كوپتەگەن جاس ازاماتىمىز قارۋلى كۇشتەر قاتارىنا اسكەري بورىشىن وتەۋدەن قاشادى. اسكەري بيلەتكە يە بولۋ جاستاردىڭ ماقتانىشىن تۋدىرمايدى جانە وتانعا قىزمەت ەتۋدىڭ بەلگىسى سانالمايتىن بولدى. ارميا قاتارىندا قىزمەت ەتۋ, قۇقىق قورعاۋ سالاسىندا جۇمىس ىستەۋ – ايرىقشا ميسسيا. بۇل وتان ءۇشىن جانىن سالۋعا بەل بۋعان ازاماتتاردىڭ سانالى تاڭداۋى. جاستارىمىزدى اسكەري بورىشىن وتەۋگە قالاي ىنتالاندىرۋعا بولاتىنىن بۇكىل قوعام بولىپ ويلاستىرۋىمىز كەرەك» دەدى مەملەكەت باسشىسى. وسى تۇرعىدان العاندا, بورىشىن وتەسە, گرانتقا ءتۇسىرۋ دە جاستاردى اسكەري بورىشىن, وتان الدىنداعى مىندەتىن وتەۋگە شابىتتاندىرۋدىڭ ءبىر ءتاسىلى ەكەنى ايتپاسا دا تۇسىنىكتى.
