استانا قالاسىندا ەرەكشە قاجەتتىلىكتەرى بار ادامدارعا تەگىن كومەك كورسەتىلەدى. وندا ماسساج, ەمدىك دەنەشىنىقتىرۋ, ەلەكتروفورەز جانە باسقا دا قىزمەت تۇرلەرى بار. مامانداندىرىلعان ورتالىق 2 جىل عانا جۇمىس ىستەيدى.
– ورتالىق ۇجىمى مەكەمەنىڭ جۇمىسىن قولداۋعا مۇقتاج جانداردىڭ بارلىعى بىلسە دەگەن ۇمىتتە, – دەيدى «است استانا الەۋمەتتىك-تەحنولوگيالىق» قوعامدىق بىرلەستىگى توراعاسىنىڭ ورىنباسارى ماۆلانوۆا دينارا كۋرمانوۆنا.
تەگىن كومەكتى 29 جاسار عابيدەن بايدەنوۆ الادى. بيىل ينسۋلت العان. اياق-قولى دۇرىس جۇمىس ىستەمەيدى. قازىر قارقىندى ەم الىپ ءجۇر. بار قيىندىق ارتتا قالىپ, ءتاۋىر بولىپ كەتەتىنىنە ءۇمىتتى. ورتالىققا كەلگەنگە دەيىن عابيدەن اربانىڭ كومەگىمەن جۇرگەن. بۇگىندە وعان بالداقتىڭ ءوزى جەتكىلىكتى.
«كەلەسى اپتالاردا بالداقتان دا باس تارتسام دەپ وتىرمىن. دومبىرادا تارتۋدى ۇيرەنىپ جاتىرمىن.
قازىرگى تاڭدا جاعدايىم جاقسى» دەيدى قالا تۇرعىنى ع.بايدەنوۆ.
«است استانا الەۋمەتتىك-تەحنولوگيالىق» وڭالتۋ ورتالىعى 2021 جىلدىڭ قاڭتارىنان باستاپ ەرەكشە قاجەتتىلىكتەرى بار ادامدارعا قىزمەت كورسەتەدى. كەلۋشىلەر ماسساج, ەمدىك دەنەشىنىقتىرۋمەن اينالىسىپ, موتوريكانى دامىتۋ, ءان ايتۋ, سۋرەت سالۋ, ءجۇزۋ, سونداي-اق اتپەن ءجۇرۋدى ۇيرەنەدى.
«ءوزىڭدى ۇيدە جۇرگەندەي سەزىنەسىڭ. قىزمەتكەرلەردىڭ قارىم-قاتىناسى ەرەكشە. بىزگە, مۇمكىندىگى شەكتەۋلى جاندارعا, ادەتتە قوعامنىڭ نازارى جەتپەي جاتادى. ال مۇندا مۇمكىندىكتەر بارلىعىنا اشىق. تازا اۋاعا ۇجىم بولىپ شىعامىز» دەيدى ورتالىقتىڭ ەمدەلۋشىسى قايرات قاسىمبەك.
ول سوڭعى 20 جىل بويى اربادا وتىر. چەرنوبىل ارداگەرلەر وداعىنىڭ قاتارىندا بار قايرات ءتىپتى جۇمىس ىستەيدى. ءوزى سەكىلدى جانداردىڭ قۇقىعىن قورعاۋدا الدىنا جان سالمايدى. ونىڭ ايتۋىنشا, بۇل ورتالىق ءومىر سۇرۋگە دەگەن ىقىلاسىن ارتتىردى.
ورتالىقتا كورسەتىلەتىن قىزمەتتەر جارتىلاي ستاتسيونارلىق نەگىزدە تەگىن. كەلۋشىلەر سانىنا شەكتەۋ قويىلماعان. مەكەمە قالا اكىمدىگى مەن جەكە ينۆەستورلار تاراپىنان قارجىلاندىرادى.
«مەنىڭ ەستۋ قابىلەتىم ناشار. كوپتەگەن قيىندىقتاردى باسىمنان وتكەردىم. سوندىقتان بۇل وڭالتۋ ورتالىعى ادامدارعا كومەك بەرۋ ءۇشىن اشىلدى» دەيدى «است استانا الەۋمەتتىك-تەحنولوگيالىق» قوعامدىق بىرلەستىگىنىڭ توراعاسى جاسۇلان جاسانوۆ.
انىقتاما الۋ ءۇشىن تەلەفون ءنومىرى: 87071815051
