پرەزيدەنت قاسىم-جومارت توقاەۆ جولداۋىنىڭ ءمانى ايرىقشا, ماڭىزى ەرەكشە. ستراتەگيالىق قۇجاتتا ساياسي رەفورمالاردان ەكونوميكالىق باعىتقا باعدار العانىمىزدى اڭعاردىق.
قازاقستان – ارداقتى اتامەكەنىمىز, قاسيەتتى جەرىمىز. وسى وتانىمىزدى وزىق ەلدەر قاتارىنا قوسامىز دەسەك, شۇعىل جاڭا ەكونوميكالىق ۇلىگىگە كوشۋ كەرەك. ياعني مىقتى ونەركاسىپتىك نەگىز قالىپتاستىرۋ, پروتەكتسيونيستىك ونەركاسىپكە كوشۋ. قاراپايىم تىلمەن ايتقاندا, وتاندىق ونەركاسىپكە كومەكتەسۋ ءۇشىن سىرتتان كەلەتىن ءونىم يمپورتىن ازايتۋ دەگەن ءسوز. بۇل تەك ۇلتتىق ەكونوميكانى كوتەرۋ ءۇشىن عانا ەمەس, سونىمەن قاتار قاۋىپسىزدىكتى قامتاماسىز ەتىپ, ساپانى ارتتىرۋ ءۇشىن ماڭىزدى.
مەملەكەت باسشىسىنىڭ كوتەرگەن ماسەلەلەرى «حالىق ۇنىنە قۇلاق اساتىن مەملەكەت» قاعيداتىنىڭ جۇمىس ىستەپ تۇرعانىن كورسەتەدى. حالىق اراسىندا الاڭداتۋشىلىق تۋدىرعان اتوم ەلەكتر ستانتسياسىن سالۋ ماسەلەسى جالپىۇلتتىق رەفەرەندۋمدا قاراستىرىلماق. جىلۋ ەلەكتر ستانتسيالارىندا بولعان اپاتتار بويىنشا دا ۇكىمەتكە تاپسىرما بەرىلدى. گازبەن قامتاماسىز ەتۋ, تاريفتەردى قايتا قاراستىرۋ, جاڭا ادىستەمە ەنگىزۋ قازىرگى وزەكتى ماسەلەلەردىڭ ءبىرى بولىپ تۇر. سونىمەن قاتار كاسىپكەرلەرگە قولداۋ كورسەتۋ, بيزنەسىن دامىتۋعا مۇمكىندىك بەرۋ ماقساتىندا ولاردى قۋدالاۋدى ءبىرجولا توقتاتۋ ماڭىزدى.
ارينە ەكى جاقتاپ شەشىلەتىن ماسەلەلەر دە بار. مىسالى سۋ رەسۋرسىنا قاتىستى مەملەكەت تاراپىنان ينفراقۇرىلىمداردى جاڭارتۋ, وزىق تەحنولوگيالاردى ەنگىزۋ بولسا, حالىق تاراپىنان ىسىراپسىز, ورىندى پايدالانۋ. سول سەكىلدى جەكە تۇلعالاردىڭ بانكروتتىعى تۋرالى زاڭ 500 مىڭ ازاماتتى قيىن جاعدايدان شىعارعان بولسا, ازاماتتار دا قارجى ساۋاتىن ارتتىرۋعا تىرىسۋ كەرەك.
مادەنيەت, ءبىلىم, عىلىمدى دامىتۋ ءار ادامنىڭ وزىنەن باستالادى. بۇل جونىندە پرەزيدەنتىمىز جاقسى وي سالدى. قوعامدى قۇرايتىن ادامدار, سوندىقتان دۇرىس قوعامدىق سانا قالىپتاستىرعىمىز كەلسە اركىم ءوزىنىڭ نيەتىن تۇزەۋ كەرەك. بىزگە قازىر ەڭ كەرەگى ىزدەنىمپاز, ەڭبەكقور, ەڭ باستىسى وتانشىل كادرلار. بۇگىنگى جولداۋدىڭ نەگىزگى ءمانى وسى.
ەرلان داكەنوۆ,
استانا قالاسى ءماسليحاتىنىڭ دەپۋتاتى
