پرەزيدەنت قاسىم-جومارت توقاەۆتىڭ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىن تىڭدادىق.
ءبىلىم جانە عىلىم سالاسىنىڭ وكىلى رەتىندە جاستار تاربيەسى, مىقتى ماماندار دايارلاۋ مەن عىلىمدى دامىتۋ بويىنشا جولداۋدا ايتىلعان مەملەكەتتىك ماڭىزى مول ماسەلەلەردى ءسوز ەتكەندى ءجون كوردىم.
ادىلەتتى قازاقستاندى قۇرامىز دەسەك, ساياسي-ەكونوميكالىق رەفورما جاساۋ جەتكىلىكسىز ەكەنىن, ەڭ باستىسى, قوعامدىق سانا, ازاماتتاردىڭ نيەتى وزگەرۋى كەرەگى, ونسىز باسقا جۇمىستىڭ ءبارى بەكەر بولاتىنىنا مەملەكەت باسشىسىنىڭ ەكپىن تۇسىرە ايتۋىنىڭ ءمانى زور.
ينتەللەكتۋالدى ۇلت قالىپتاستىرۋ ەلدىڭ دامۋىنا ۇلكەن وزگەرىستەر اكەلەتىنى بەلگىلى. سوندىقتان جاستار تاربيەسىنە وتە قاتتى كوڭىل ءبولۋىمىز كەرەك. جولداۋدا ءاربىر ازاماتىمىز, اسىرەسە, جاستار ەڭ جاقسى قاسيەتتەردى بويىنا ءسىڭىرۋى قاجەتتىگى قاداپ ايتىلدى.
جاڭا قازاقستاننىڭ جاڭا تۇرپاتتى جاستارىن وتانشىل, ءبىلىمپاز, ەڭبەكقور, ءتارتىپتى, ادال, ءادىل ەتىپ تاربيەلەسەك, ەلىمىز ءوزىنىڭ ماقسات-مۇراتتارىنا قول جەتكىزەتىنى ءسوزسىز.
ابايدىڭ «تولىق ادام» ءىلىمىن نەگىزگە الا وتىرىپ, جاستاردى ادالدىق جوق جەردە ەشقاشان ادىلدىك بولمايتىنىنا تاربيەلەۋ, ادىلەتتى قازاقستان قاعيداتىن قاپەردە ۇستاۋ كەرەكتىگى تۋرالى جولداۋداعى مىندەتتەر ءبىلىم سالاسىنىڭ وكىلدەرىنە زور جاۋاپكەرشىلىك جۇكتەيدى. ادال ازامات تاربيەلەۋ بارشامىزدىڭ ورتاق پارىزىمىز بولۋى كەرەك. ۇزدىكسىز ءبىلىم بەرۋ جۇيەسىندە, ياعني بالاباقشادان باستاپ جوعارى وقۋ ورىندارىنا دەيىن بەرىلەتىن ساپالى ءبىلىم مەن تاعىلىمدى تاربيەدە ادال ازامات قالىپتاستىرۋ باستى ماقسات بولۋى ءتيىس.
ساپالى ورتا ءبىلىم بەرۋدى قامتاماسىز ەتۋ ءۇشىن ۇستازداردىڭ بىلىكتىلىگىن ارتتىرۋ جايى جولداۋدا جان-جاقتى ايتىلدى. ءبىلىمى مەن بىلىگى جوعارى ماماندار دايارلاۋ ماسەلەسى دە ورىندى كوتەرىلدى.
ءبىلىم بەرۋ جۇيەسى ەڭبەك نارىعىنىڭ سۇرانىسىنا قاراي وزگەرىپ وتىرۋى كەرەكتىگىنە نازار اۋدارىلدى. قازىرگى كەزدە تەحنيكالىق جانە جۇمىسشى ماماندار جەتىسپەيتىنى ءسوز بولىپ, وسى سالالارعا قاتىستى ءبىلىم بەرۋدى جولعا قويۋ كەرەكتىگىنە جولداۋدا ەرەكشە ەكپىن ءتۇسىرىلىپ ايتىلدى. اسىرەسە وتە ماڭىزدى ماسەلە – وقۋ ورىندارى تۇلەكتەرگە جۇمىس بەرە الاتىن مەكەمەلەرمەن ۇزاق مەرزىمگە ارنالعان ارىپتەستىك ورناتۋى قاجەتتىگىنە كوڭىل ءبولۋ مىندەتتەلدى.
سونداي-اق جولداۋدا اگروعىلىمدى دامىتۋ ماسەلەسىنە ەرەكشە كوڭىل ءبولىندى. مەملەكەت باسشىسى ۇلتتىق اگرارلىق عىلىمي-ءبىلىم بەرۋ ورتالىعىن زەرتتەۋ ءىسىنىڭ بارلىق ساتىسىن قامتيتىن اگروتەحنولوگيا حابىنا اينالدىرۋ قاجەتتىگىنە ەرەكشە توقتالىپ, شەتەلدىڭ تانىمال اگرو-عىلىمي ورتالىقتارىمەن تولىققاندى عىلىمي-تاجىريبەلىك ىنتىماقتاستىق ورناتۋ كەرەكتىگىن ايتتى. سونداي-اق ءبىلىم بەرۋ باعدارلامالارىن اۋىل شارۋاشىلىعى تالاپتارىنا بەيىمدەۋ كەرەكتىگىنە نازار اۋداردى.
جوعارىدا ايتىلعانداي, بۇل شاعىن عانا جازبامىزدا جولداۋدا ايتىلعان ءبىلىم جانە عىلىم بويىنشا اتقارىلار مىندەتتەرگە قىسقاشا توقتالدىق. جولداۋدا كورسەتىلگەن مىندەتتەر ۇدەسىنەن شىعۋ ءۇشىن اركىم ءوز سالاسى بويىنشا ايانباي اتسالىسۋى ءتيىس. ەندەشە ءبىلىم جانە عىلىم سالاسىنىڭ وكىلدەرى دە پرەزيدەنت العا قويعان بيىك ماقساتقا جەتۋ ءۇشىن بار كۇش-جىگەرىن جۇمسايتىنى كۇمان تۋدىرمايدى.
كارىمبەك قۇرماناليەۆ,
پرەزيدەنت جانىنداعى ۇلتتىق قۇرىلتاي مۇشەسى, اكادەميك,
قالالىق قوعامدىق كەڭەس مۇشەسى
