ەلوردادا وتباسى كۇنىنە وراي «باقىتتى وتباسى – مىقتى مەملەكەتتىڭ نەگىزى» اتتى فەستيۆال ءوتتى. نۇر-سۇلتان قالاسى ىشكى ساياسات باسقارماسىنىڭ قولداۋىمەن «رۋحاني قوعام الەمى» قوعامدىق قورى بۇل فەستيۆالدى بيىل ءۇشىنشى رەت ۇيىمداستىردى.
شاراعا قوعام قايراتكەرلەرى, قالا اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا مۇشەلەرى, وتباسى قۇندىلىقتارىن ناسيحاتتاۋ, گەندەرلىك مادەنيەتتى قالىپتاستىرۋ, جالپى وتباسى ينستيتۋتىن نىعايتۋعا ۇلەس قوسىپ جۇرگەن ۇەۇ مەن قوعام بەلسەندىلەرى قاتىستى.
شارانى نۇر-سۇلتان قالاسىنىڭ جاستار ساياساتى ماسەلەلەرى باسقارماسىنىڭ باسشىسى قايرات قامباروۆ اشتى. ول بارشا كورەرمەندى وتباسى مەرەكەسىمەن قۇتتىقتاي وتىرىپ, وتباسى قۇندىلىقتارىن نىعايتۋ كەرەكتىگىن اتاپ ءوتتى.
– ۇلى جول – وتباسى تابالدىرىعىنان باستالادى. قازىرگى تاڭدا قوعامدا نەگiزگi وتباسى قۇندىلىقتارىن نىعايتۋدىڭ ماڭىزدىلىعىنا ەرەكشە نازار اۋدارىلۋدا. وتباسى ينستيتۋتىن نىعايتۋ ماقساتىندا وسى جىلدىڭ تامىزىندا ەلوردامىزدا «مەرەيلى وتباسى» ۇلتتىق كونكۋرسى ۇيىمداستىرىلىپ, 151 وتباسى قۇجات تاپسىرعان بولاتىن. ۇسىنىلعان وتىنىمدەر سانىنىڭ كوبەيۋى قوعامنىڭ وتباسى قۇندىلىقتارىنا اسا ءمان بەرىپ, قىزىعۋشىلىقتىڭ ارتقانىن كورسەتەدى. ۇرپاقتىڭ بويىنداعى ادامگەرشىلىك پەن ادالدىق, ەڭبەكقورلىق پەن مەيىرىمدىلىك, ۇلتجاندىلىق پەن وتانشىلدىق سياقتى اسىل قاسيەتتەردىڭ ءبارى, ەڭ الدىمەن, وتباسىندا قالىپتاساتىندىعى انىق, – دەدى قايرات قامباروۆ.
«مەرەيلى وتباسى-2022» قالالىق كەزەڭىنىڭ جەڭىمپازى ساعيتوۆتار وتباسىنىڭ اتىنان التى بالانىڭ اناسى ايناگۇل ساعيتوۆا ءسوز سويلەپ, بەرىك وتباسىن قۇرۋدىڭ نەگىزى, ەرى مەن ايەلدىڭ سىيلاستىعى, ۇرپاق تاربيەسى جايلى تەبىرەندى.
ەرەكشە قاجەتتىلىگى بار 14 جاسار ەرنۇر تۇرماعانبەتوۆ پەن 15 جاستاعى ءمولدىر جانتورەنىڭ شىرقاعان اندەرى فەستيۆال قاتىسۋشىلارىنا ەرەكشە اسەر سىيلادى.
«الەم ايەلدەرى دوستىعى» قوعامدىق بىرلەستىگىنىڭ ءتورايىمى التىناي تاڭىربەرگەنوۆا جاقىندا قىزىن ۇزاتقاندا ۇلتتىڭ نەگىزى قازاقتىڭ سالت-داستۇرلەرىندە جاتقانىن تۇسىنگەنىن جەتكىزدى.
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ءدىنتانۋ كافەدراسىنىڭ دوتسەنتى كەڭشىلىك تىشحان قازىر اجىراسۋ ۇلكەن تراگەديا بولىپ جاتقانىن ايتىپ, بۇل ۇيادا دۇرىس تاربيە كورمەگەندىگىنىڭ كەسىرى ەكەنىن اتاپ ءوتتى.
فەستيۆال سوڭىندا قاتىسۋشىلارعا قالا اكىمدىگى اتىنان العىس حاتتار تاپسىرىلدى.
بايان اسىلبەكوۆا
