ەلوردادا الەمدىك جانە ءداستۇرلى دىندەر كوشباسشىلارى جاڭا ساياباقتىڭ كاپسۋلاسىن سالدى. جاڭا ساياباق بەيبىتشىلىك جانە كەلىسىم ساياباعى دەپ اتالادى جانە ەسىل وزەنىنىڭ بويىندا بوي كوتەرەدى.
اعاش وتىرعىزۋعا سەنات توراعاسى ماۋلەن اشىمباەۆ, ەلوردا اكىمى التاي كولگىنوۆ, الەمدىك جانە ءداستۇرلى دىندەر ليدەرلەرىنىڭ VII سەزىنىڭ دەلەگاتتارى, ەرىكتىلەر جانە قالا تۇرعىندارى قاتىستى.
ەلوردا اكىمدىگىنىڭ ۋربانيستيكا ورتالىعى حابارلاعانداي, جوبانىڭ باستى يدەياسى – «ءومىر اعاشى» مونۋمەنتى. بۇل قۇرىلىم كۇمبەز تۇرىندە جاسالادى, ونىڭ ورتاسىندا ەمەن اعاشى ورنالاسقان. ماڭايى اعاش شيىرشىقپەن ءورىلىپ, فونتانمەن بىرگە ۇيلەسىم تاۋىپ, قۇلپىرىپ تۇر.
بۇگىن الەمدىك جانە ءداستۇرلى دىندەر ليدەرلەرىنىڭ VII سەزى دەلەگاتسيالارىنىڭ سانىنا سايكەس «ءومىر اعاشى» مونۋمەنتىنىڭ اينالاسىنا 60-تان استام اعاش وتىرعىزىلدى.
«كونتسەپتۋالدى تابيعي-رەكرەاتسيالىق ايماق قۇرۋ الەمدىك جانە ءداستۇرلى دىندەر كوشباسشىلارىنىڭ VII سەزىنە ورايلاستىرىلعان. پارك تۇجىرىمداماسى قازاقستانداعى ءتۇرلى كونفەسسيالار مەن ۇلتتار اراسىنداعى ىنتىماقتاستىقتى, دوستىق پەن بىرلىكتى بىلدىرەدى. يدەياعا سايكەس, عاسىرلار بويى تامىر جايعان سۋ مەن ءومىر اعاشى جەر بەتىندەگى تىرشىلىكتىڭ جالپىادامزاتتىڭ قۇندىلىعىن بەينەلەيدى. وسىلايشا, ينستاللياتسيا بارلىق كونفەسسيالاردىڭ كەلىسىمگە, بەيبىتشىلىك پەن دوستىققا شاقىرۋىن بىلدىرەدى.
كۇمبەز ءوز كەزەگىندە ءبىر اسپان استىنداعى الەمدى بەينەلەيدى. وندا الەمنىڭ 4 جاعىن – وڭتۇستىكتى, سولتۇستىكتى, باتىستى, شىعىستى بەينەلەيتىن 4 كىرۋ ايماعى بولادى» دەدى ەلوردا اكىمدىگى ۋربانيستيكا ورتالىعىنىڭ باسشىسى ەلنار بازىكەن.
«بۇگىن كەرەمەت ءىس-شارا بولدى. ءبىز تەك اعاش وتىرعىزىپ قانا قويماي, بىرنەشە ۇرپاق باس سەرۋەندەيتن جاڭا ساياباقتىڭ كاپسۋلاسىن سالدىق. قازاقستاندا ءتۇرلى ءدىن وكىلدەرى بىرلىك پەن بەيبىتشىلىكتە ءومىر سۇرەدى. ۇيىمداستىرۋشىلارعا جىلى شىرايمەن قارسى العانى ءۇشىن العىس ايتامىن» دەدى ءباا يسلام جانە ۋاقىفتار ىستەرى جونىندەگى باس باسقارماسىنىڭ توراعاسى مۇحاممەد ماتار ساليم ءال-كاابي. پاركتىڭ قۇرىلىسىن اياقتاۋ جانە ونى پايدالانۋعا بەرۋ 2023 جىلعا جوسپارلانىپ وتىر.
