مەملەكەت باسشىسىنىڭ جىل سايىنعى قازاقستان حالقىنا جولداۋىنان كوپتەگەن وتانداسىمىز ءوزىن تولعاندىرعان سۇراقتارعا جاۋاپ الدى. ماسەلەن, بۇل – اتوم ەلەكتر ستانتسياسىن سالۋعا, سالىق تولەۋشىلەرگە, سونىڭ ىشىندە ميلليونداعان كاسىپكەرلەر ارمياسىنا سالىقتىق جەڭىلدىكتەرگە, سۋ, ەلەكتر جانە جىلۋ ەنەرگياسىنىڭ تاپشىلىعىنا قاتىستى ماسەلەلەر. الداعى ءۇش جىلعا ارنالعان ەلدىڭ دامۋىن كوزدەيتىن باعدارلامالىق قۇجات بارلىق دەڭگەيدەگى ءماسليحات دەپۋتاتتارىنا دا جۇمىس ىستەۋگە تۋرا كەلەتىن بارلىق نارسەنى قامتىدى.
ءبىلىم كۇنىندە پرەزيدەنتتىڭ 2020 جىلدان باستاپ مۇعالىمدەردىڭ جالاقىسى, سونداي-اق مەديتسينا قىزمەتكەرلەرىنىڭ جالاقىسى ەكى ەسەگە ءوستى دەگەن سوزدەرى جاقسى جاڭالىق بولدى. «جايلى مەكتەپ» جوباسى اياسىندا بۇكىل ەل بويىنشا 400 مەكتەپ سالىنادى. تەك ەلوردادا 2025 جىلعا دەيىن ولاردىڭ 24-ءى سالىنادى, بۇل – 96 مىڭعا جۋىق وقۋشى ورنى.
جولداۋدىڭ ەداۋىر بولىگى وسكەلەڭ ۇرپاققا ارنالعانى قۋانتادى. «كەلەشەك» بىرىڭعاي جيناقتاۋشى جۇيەسىن ەنگىزۋ تاپسىرىلدى, ول 5 جاستان باستاپ بالالاردى قامتيدى جانە مەملەكەتتەن باستاپقى ءبىلىم بەرۋ كاپيتالىن, ينۆەستيتسيالىق كىرىستى جانە مەملەكەتتىك سىيلىقتىڭ جىل سايىنعى تولەمىن كوزدەيدى. بۇل جاڭالىق, ەڭ الدىمەن, بالالارىمىزعا ساپالى ءبىلىم الۋعا كومەكتەسەدى.
ەرلان كاناليموۆ,
استانا قالاسى ءماسليحاتىنىڭ توراعاسى
