1 قازان – حالىقارالىق مۋزىكا كۇنى. مۋزىكا ادامداردى, حالىقتاردى جاقىنداستىرادى, اراداعى مادەني-ەستەتيكالىق قۇندىلىقتاردى دارىپتەيدى. قازاق ۇلتىن دۇنيە جۇزىنە ونەر ارقىلى ناسيحاتتاپ جۇرگەن ديماشتىڭ اندەرى – قازاق ەلىنىڭ عانا ەمەس, بارشا ادامزاتتىڭ بايلىعى, قۇندىلىعى.
قازاقستاننىڭ وڭتۇستىك استاناسى – الماتىدا وتكەن العاشقى «Stranger» كونتسەرتىندە ديماش ءتورت ساعات بويى تىك تۇرىپ, جاندى داۋىسپەن تۋعان ەلى الدىندا ەسەپ بەردى, ونەرىنىڭ جاڭا جوعارى دەڭگەيگە كوتەرىلگەنىن پاش ەتتى. شوۋ ەلىمىزدىڭ ەڭ ۇلكەن سپورت نىساندارىنىڭ ءبىرى – ورتالىق ستاديوندا ءوتتى.
ديماش قۇدايبەرگەننىڭ شەتەلدىك تىڭدارماندارى الماتىداعى كونتسەرتىنە ارنايى ۇشىپ كەلدى. بۇل جولى, ايتا كەتۋ كەرەك, ديماشتىڭ كونتسەرتىنە كەلگەن الىس-جاقىن شەتەلدەن قوناقتاردا ەسەپ جوق, الماتىنىڭ قوناقۇيلەرىندە ءتىپتى ورىن تابۋ قيىن بولدى. قازاقتىڭ انىنە, قازاقتىڭ تىلىنە جارنامانىڭ وسىنداي جوعارى دەڭگەيگە جەتكەنى وسى عانا شىعار, تاۋبە دەدىك وعان دا. ەشبىر ساياساتكەر, ەشبىر ونەر يەسى قازاق تىلىندە مۇنداي شوۋ-باعدارلاما جاساماعان بولار.
«ءبىز ديماشتىڭ كونتسەرتىنە دۇيسەنبى كۇنى سلوۆاكيادان ارنايى ۇشىپ كەلدىك. بۇرىن ءساۋىر ايىندا پراگادا ونىڭ كونتسەرتىندە بولعانبىز. بىزگە ونىڭ ونەرى قاتتى ۇنايدى. قازىر ءبىز 20 ادامبىز جانە قازاقستانعا العاش رەت كەلىپ وتىرمىز. العان اسەرىمىز كەرەمەت! مۇنداعى تابيعات وتە ادەمى, تاماعى ءدامدى, ونىڭ ۇستىنە ءبىز جىلقى ەتىن جەپ كوردىك. ءبىز الماتىدا «كوك بازار», كوكتوبە مەن كولسايعا باردىق, ەندى مەدەۋگە بارماقشىمىز» دەدى سلوۆاكيادان كەلگەن قوناق ارىپتەستەرىمىزگە بەرگەن سۇحباتىندا.
فرانتسيا مەن اقش-تان, جاڭا زەلانديا مەن اۆستراليادان, تاعى باسقا الىس شەتەلدەن كەلگەن قوناقتار قازاقستاننىڭ تابيعاتىنا, الاتاۋدىڭ باۋىرىنداعى ارۋ الماتىنىڭ ءسان-سالتاناتىنا ءتانتى بولدى.
ءبىر عانا تۋريستىك كومپانيا ديماش قۇدايبەرگەننىڭ ءان كەشى بولاتىن كەزدە 200-دەن استام ءتۋريستتى قابىلداپ, قىزمەت كورسەتتى. ولار الەمنىڭ 35 ەلىنەن ءوتىنىش بىلدىرگەن. العاشقى لەگى, ونداعى 11 فانات, اقتوبەنى كورۋدى ماقسات ەتكەن. اقش, ۇلىبريتانيا, ۋرۋگۆاي, ليتۆا, مالايزيا, ۆەتنامنان كەلگەندەر بار. جالپى مۇنداي تۋر 2017, 2019 جىلدارى ۇيىمداستىرىلعان بولاتىن. كوپتەگەن فاناتتار الماتى, استانا, تۇركىستان, تاراز, شىمكەنتكە باردى. اقش-تان كەلگەن فاناتتىڭ ءبىرى ارالعا بارىپ, ەندى ونىڭ پروبلەماسىن كوتەرمەك.
كونتسەرت باسىنان اياعىنا دەيىن قازاق تىلىندە ءوتتى. كەش الدىندا ديماشتىڭ الەمنىڭ 68 ەلىنەن كەلگەن جانكۇيەرلەرى ستاديون الدىنداعى سۋرەتكە تۇسەتىن ايماقتا فوتوعا ءتۇسىپ, ءبىر-بىرىمەن ەركىن سۇحباتتاسىپ جاتتى. ورتالىق ستاديونداعى وتكەن كونتسەرتكە 35 مىڭ بيلەت ساتىلدى, بيلەت تابا الماعاندارى قانشاما, كونتسەرت باستالاردان بىرەر كۇن بۇرىن قانات ايتباەۆ الەۋمەتتىك جەلىدەگى پاراقشاسىندا كوپشىلىكتىڭ سۇراۋى بويىنشا قوسىمشا ورىندارعا بيلەت ساتىلاتىندىعىن جازدى.
ديماش كونتسەرتىنىڭ باستى جاڭالىقتارى – بەينەكليپ, بەينەجازبالارمەن ارلەنگەن, ساحناداعى ورىندالعان اندەر 31 كومپوزيتسيادان قۇرالدى. ديماشتىڭ الماتىداعى كونتسەرتى تەك ءان كەشى, شوۋ عانا ەمەس, ادامزاتقا ادامي قۇندىلىقتاردى ەسكە سالاتىن, تاتۋلىققا, بىرلىككە ۇندەيتىن بىتىمگەر جاننىڭ ءۇنجارياسى رەتىندە, بارلىق تىرشىلىك اتاۋلىنى قادىرلەۋگە وي سالاتىن تاماشا ويلى كەش بولىپ وتكەنىن اتاپ ءوتۋ كەرەك. اتا-اناسىنىڭ ادال ءسۇتىن ەمگەن اقەدىل كوڭىلدى التىن ۇل الەمدە سوعىستى بولدىرماۋعا بارشا ادامزات مۇددەلى بولعانىن قالايتىنىن انمەن, بەينەكورىنىسپەن اسەرلى جەتكىزدى. ءانشىنىڭ بەيبىتشىلىكتى اڭساعان, بەيبىت ءومىردى قولداعان يدەياسى وزىنە دەيىنگى الەمدەگى ەڭ ۇزدىك, تانىمال انشىلەردى ەسكە سالعانداي بولدى. كونتسەرتتىڭ ەڭ باستى يدەياسى, باستى تاقىرىبىنداي كورىندى ماعان – «ءبىر اسپاننىڭ حيكاياسى» اتتى اۆتورلىق كومپوزيتسياسى ورىندالدى. بۇل – ديماشتىڭ رۋحاني, ساياسي جاعىنان ءوسىپ, ەسەيگەندىگىنىڭ كورىنىسى.
التىن بالا ديماش «التىن ادامنىڭ» كيىمىمەن جارقىراپ شىقتى, اسپاننان اسپالى جىپپەن ەرەكشە كومپوزيتسيامەن ءتۇستى. كونتسەرت وسىلاي باستالدى.
كونتسەرتتە ديماش قۇدايبەرگەن, بۇرىننان ايتىپ جۇرگەن اندەرىمەن قاتار, جاڭا تۋىندىلاردى دا ورىندادى.
جۇلدىزدى كەشتە ديماش تۋعان ءىنىسى ءابىلمانسۇر قۇدايبەرگەندى ۇلكەن ساحناعا الىپ شىقتى, بۇل جاس مۋزىكانتتىڭ قالىڭ كورەرمەننىڭ الدىنداعى دەبيۋتى بولاتىن. ديماش ءابىلمانسۇردىڭ سوزىنە جازىلعان ءاندى ساحناعا الىپ شىقتى. كومپوزيتور رەنات گايسين جازعان اۆتورلىق اسپاپتىق شىعارمانى ءابىلمانسۇردىڭ ءوزى ورىندادى.
كونتسەرتتە حالىقارالىق بيشىلەر ۇجىمى, قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترى مەن «سالتانات» مەملەكەتتىك بي ءانسامبلى ونەرىن ورتاعا سالدى.
شوۋعا جينالعان حالىق ديماشپەن بىرلەسە ءان ورىندادى. كونتسەرتتە سونداي-اق قوبىز, دومبىرانىڭ تاريحىنان سىر شەرتەتىن بەينەروليكتەر كورسەتىلدى. شوۋ بارىسىندا ديماشتى ءوزىنىڭ بەند-توبى سۇيەمەلدەدى.
الاتاۋدىڭ اسپانىن عاجايىپ ءان مەن سازعا بولەگەن التىن ۇلدىڭ كونتسەرتى وسىلايشا تۋعان جەرىندە ايرىقشا انشلاگپەن ءوتتى. ەرتەڭىنە فاناتتار ديماشپەن, ونىڭ وتباسىمەن تاعى كەزدەستى, فوتوعا ءتۇستى. ديماشتىڭ ءانىن تىڭداپ, سويلەۋ ءتىلى دامىعان گابريەل – اۋتيزم دياگنوزىمەن اۋىرعان بالا. اناسى نەنسيمەن وسى الماتىداعى كونتسەرتكە سوناۋ اقش-تان ارنايى كەلدى, ديماشتىڭ ونەرىن تاماشالادى. ديماشتىڭ اندەرى ارقىلى دەرتىنە داۋا تاپقان قانشاما ادام وسى ورتالىق ستاديونداعى الاڭدا كەزدەستى.
جەر شارىنداعى ميلليونداردىڭ جۇرەگىنە جارىق ساۋلەسىن شاشىپ, ءتىلىمىزدى, مۋزىكامىزدى الەمگە پاش ەتكەن «التىن ادام» – التىن ۇل ديماش قۇدايبەرگەنۇلىنىڭ جەڭىستى جولدارى, الەم ءانشىسى رەتىندە تانىلعان تۋرنەسى جالعاسىن تابا بەرسىن
